ᐃᓚᓐᓇᑳ, ᖃᐅᔨᒪᓂᐊᕈᑦᑕ ᓇᑭᓐᖔᓯᒪᒻᒪᖔᑦᑕ, ᓇᒧᖓᓂᐊᕐᒪᖔᑦᑕᓗ, ᓯᕗᓪᓕᒥ ᖃᐅᔨᒪᒋᐊᖃᓚᐅᕐᑐᒍᑦ ᓇᖏᓐᖔᓂᕐᒪᖔᑦᑕ. 

ᖃᐅᔨᒪᒋᐊᖃᕐᑐᒍᑦ ᐊᑐᕐᓯᒪᔭᑦᑎᓂᒃ.

ᐊᕐᓱᕈᕐᓇᑐᐊᓘᓚᐅᕐᓯᒪᔪᓂᒃ ᐊᑐᕐᓯᒪᔭᑦᑎᓂᒃ ᐊᑐᕆᐊᖃᓚᐅᕐᑐᒍᑦ ᐊᑐᕐᓯᒪᒐᑦᑎᒍᑦ.

ᐊᑯᓂᐅᓗᐊᕐᑐᖅ, ᒐᕙᒪᒃᑯᑦ ᐱᓇᓱᐊᑎᒌ ᐃᓄᓐᓂᒃ  ᐊᓯᔾᔨᑕᓗᐊᕐᓯᒪᒻᒪᑕ, ᐊᒻᒪ, ᐃᓚᐃᓈᓯᒪᑦᓱᑎᒃ, ᐊᒻᒪ ᑕᐃᒫᑦᓴᐃᓇᖅ ᑲᒪᒐᑎᒃ ᐃᓄᓐᓂᒃ.

ᑲᓇᑕᐅᑉ ᒐᕙᒪᖏᑦ ᐱᓇᓱᐊᕐᑐᒪᕆᐅᓚᐅᕐᓯᒪᔪᑦ ᔪᓇᐃᑎᑦ ᓇᐃᓴᓐᒥ ᓯᓚᕐᔪᐊᒥ  ᓇᓗᓇᐃᕐᓯᑎᒥᒃ ᑭᓇᑐᐃᓐᓇᒧᑦ ᐱᔪᓐᓇᐅᑎᓂᒃ, ᐃᒫᒃ ᐃᓄᐃᑦ ᓄᓇᖓᓂ ᐃᓄᐃᑦ ᒥᑭᓂᕐᓴᐅᑎᑕᐅᑦᓱᑎᒃ, ᐃᓄᐃᑦ ᓇᐃᓴᐅᑎᖃᑎᑕᐅᖔᓚᐅᕐᓯᒪᒻᒥᔪᑦ ᐊᑎᒃᑲᓂᖃᑎᑕᐅᓇᑎᒃ.

ᑲᒃᑲᓛᑦ ᖃᓪᓗᓈᑦ ᓄᓇᖓᓂ ᐅᐱᒋᔭᐅᒻᒪᕆᑦᑎᓗᒋᑦ ᖃᓪᓗᓈᑦ ᓄᓇᖓᓂ ᐃᓕᓐᓂᐊᓂᖏᓐᓄᑦ ᐊᓪᓚᒋᐅᕐᓴᓂᕐᒧᑦ, ᐊᐃ, ᐲ, ᓰᓂᒃ,ᓂᒃ, ᐃᓄᐃᓪᓕ ᕿᑐᕐᖓᖏᑦ ᐃᓂᕐᑎᑕᐅᕐᔪᐊᐸᑦᑎᓗᒋᑦ ᐅᖃᐅᓯᕐᒥᓂᒃ ᐃᓄᑦᑎᑐᑦ ᐊᑐᕆᐊᖅ.

ᒐᕙᒪᐃᑦ ᐊᕐᓱᕈᕈᑎᖃᖅᔪᐊᑎᓪᓗᒋᑦ ᓯᓇᕐᔪᐊᒧᑦ ᖃᓄᐃᖏᑦᓯᐊᓂᓕᕆᓂᕐᒧᑦ ᐃᑲᔪᕈᑎᑦᓴᓂᒃ, ᑭᓯᐊᓂᓗ ᐃᓄᓐᓂᑦ ᓅᑦᓯᒋᐊᖃᖅᐸᓚᐅᕐᑐᑦ ᐋᓐᓂᖃᓕᑐᐊᕐᒪᑕ ᐅᕝᕙᓘᓐᓃᑦ ᖃᓂᒪᓕᑐᐊᕐᒪᑕ ᓯᐊᒻᒪᒍᓐᓇᑐᒥᒃ.

ᐊᕐᕌᒎᐃᑦ 70 ᐊᓂᒍᕐᓯᒪᓕᕐᒥᔪᑦ, ᐳᕙᓪᓕᓂᖅ ᐊᑐᕐᑕᐅᒪᕆᓚᐅᕐᓯᒪᒻᒪᑦ ᓇᓂᓕᒫᖅ ᑲᓇᑕᒥ, ᑕᐃᒪᐃᒻᒪᑦ ᒐᕙᒪᒃᑯᑦ ᐃᓱᒪᓕᐅᕈᑎᖃᓚᐅᕐᓯᒪᔪᑦ ᖃᓪᓗᓈᕐ ᓄᓇᖓᓂ ᒪᑐᐃᕐᓯᒋᐊᖅ ᑕᑯᔭᐅᕕᒻᒥᒃ ᐊᒻᒪ ᐃᓕᓴᐃᕕᑦᓴᒥᒃ ᓘᑦᑖᓄᑦ ᐊᒻᒪ ᐋᓐᓂᐊᓯᐅᑎᓄᑦ. ᑭᓯᐊᓂ ᐅᑭᐅᕐᑕᑐᒥ, ᒐᕙᒪᒃᑯᑦ ᐱᐅᓯᖃᓚᐅᕐᒪᑕ ᐳᕙᓪᓗᑐᓕᕆᓂᕐᒥᒃ ᓂᑲᒍᓱᓐᓂᖃᕋᑎᒃ ᐅᕝᕙᓘᓐᓃᑦ ᐃᒃᐱᒍᓱᑦᓯᐊᕋᑎᒃ, ᑭᓯᐊᓂᓗ ᐊᕕᑦᑐᐃᒍᑎᒋᑦᓱᒍ ᐃᓚᒌᓂᒃ ᐊᒻᒪ ᑭᓇᑐᐃᓐᓇᒧᑦ ᐱᔪᓐᓴᐅᑎᓂᒃ ᐊᑐᕋᑎᒃ.

ᖃᓪᓗᓈᑐᑦ ᐊᐅᓚᒍᓯᖃᕕᐅᓚᐅᕐᓯᒪᔪᑦ ᐊᒻᒪ ᑲᒪᒋᔭᐅᑦᓯᐊᕋᑎᒃ.  ᐃᓄᓐᓂᒃ ᐋᓐᓂᑎᕆᒍᑕᐅᓯᒪᔪᑦ. ᖃᐅᔨᒪᔪᖓ ᐊᒥᓲᔪᓯ ᐅᖃᐅᓯᕆᑲᐃᓐᑐᓄᑦ ᐅᓛᖅ ᐊᑦᑐᑕᐅᓯᒪᔪᑦ ᐊᒥᓱᑦᒪ ᐊᒻᒪ ᓱᓕ ᐅᓪᓗᒥ ᕿᓵᒍᑎᓖᑦ ᑐᖁᔨᐊᕕᓂᕐᒥᓂᒃ.

ᐅᓪᓗᒥ, ᑕᒫᓃᑉᐳᖓ ᒪᒥᐊᒍᑦᓯᒋᐊᕐᑐᓱᖓ ᒐᕙᒪᒃᑯᑦ ᐊᐅᓚᑦᓯᓂᕕᓂᐊᓂᒃ ᐳᕙᓪᓕᑐᓂᒃ ᐅᑭᐅᕐᑕᑐᒥ ᐊᑯᓐᓂᖏᓐᓂ 1940,ᓂᑦ ᐊᒻᒪ 1960,ᓄᑦ.

ᐊᒥᓲᔪᓯ ᖃᔨᒪᕗᓯ ᖃᓄᖅ ᒪᓕᒐᐃᖏᑦ ᐊᑐᕐᑕᐅᓂᒪᖔᑕ.

ᐊᖏᓚᖅᑳᓚᐅᖏᑎᓪᓗᒋᑦ, ᐃᓄᐃᑦ ᖃᐅᔨᓴᕐᑕᐅᕙᓚᐅᕐᑐᑦ. ᑭᓇᑐᐃᓐᓇᖅ ᐳᕙᓪᓗᕆᔭᐅᔪᖅ ᐊᐅᓪᓚᑎᑕᐅᕙᑦᓱᓂ ᓲᕐᓗ ᕼᐊᒧᓪᑕᓐᒧᑦ, ᐃᑦᒪᓐᑕᓐᒧᓪᓗ, ᑕᖅᑭᓂ ᐅᕝᕙᓘᓐᓃᑦ ᐊᕐᕌᒍᒐᓴᓐᓂ ᑲᒪᒋᔭᐅᕕᒻᒥᓂᐊᓕᕐᑎᓗᒋᑦ ᐳᕙᓪᑐᕕᒻᒥ ᐃᓄᑦᑎᑐᑦ ᐅᑳᔪᖃᕈᓐᓇᑎᓐᓇᒍ.

ᐊᑯᓂᒻᒪᕆᐊᓗᒃ, ᐃᓄᐃᑦ ᐅᑉᐱᐳᓱᑉᐸᓚᐅᕐᑐᑦ ᐃᑭᑐᐊᕈᑎᒃ ᐅᒥᐊᕐᔪᐊᒧᑦ, ᐊᖏᕐᕋᒧᑦ ᐅᑎᓚᐅᕐᓯᒪᓂᐊᕐᑐᒋᒍᓐᓇᐃᓱᑎᒃ.

ᐊᒥᓱᑦ ᐱᕕᑦᓴᖃᖅᑎᑕᐅᕙᓚᐅᖏᑐᑦ ᐸᕐᓇᒋᐊᖅ ᐅᕝᕙᓘᓐᓃᑦ ᐊᑦᓱᓇᐃᕆᐊᖅ ᓇᓪᓕᒋᔭᒥᓄᑦ. ᐊᒥᓱᓪᓗ ᑲᒃᑲᓛᑦ ᕿᒪᐃᑎᑕᐅᓯᒪᑦᓱᑎᒃ ᐊᓈᓈᒃᑯᒥᓂᑦ, ᐃᓄᑐᖃᐃᓪᓗ ᐊᒥᓱᑦ ᕿᒪᐃᑎᑕᐅᓯᒪᑦᓱᑎᒃ ᐊᖏᕐᕋᒥᓂᑦ.

ᐊᕐᓱᕈᕐᓇᑐᕐᔪᐊᕕᓂᐊᓗᒃ ᐃᖏᕐᕋᕆᐊᖅ ᑕᐃᓴᖏᓐᓂᑐᓂ ᑭᓚᒥᑐᕐᔅᓂᒃ, ᐅᒥᐊᕐᔪᐊᑯᑦ, ᓄᓇᒃᑰᔫᑯᑖᒃᑯ, ᐅᒻᒪ ᑎᒻᒥᔫᒃᑯᑦ - ᐊᑯᓂᐊᓗᓪᓗ ᐃᖏᕐᕋᓱᑎᒃ ᐅᓪᓗᒐᓴᓐᓂ ᐅᕝᕙᓘᓐᓃᑦ  ᐱᓇᓱᐊᕈᓯᒐᓴᓐᓂ. ᐊᐅᓪᓚᓂᕐᒥᒍᑦ ᐊᕐᓵᑕᐅᒍᑎᒋᑦᓯᒍ ᐃᓅᓯᕐᒥᓂᒃ.

ᐊᒻᒪ ᐊᓈᓇᐅᔪᑦ ᐊᑖᑕᐃᓪᓗ, ᐊᓂᒋᔭᐅᔪᑦ, ᓇᔭᐃᑦ, ᐊᒻᒪ ᐊᖓᔪᖏᑦ/ᓄᑲᖏᑦ ᕿᒪᑦᑕᐅᒥᑦᓱᑎᒃ ᐅᖃᐅᑎᔭᐅᓚᐅᕐᓯᒪᓇᑎᓪᓗ ᓇᒧᖓᒪᖔᑕ ᐋᓐᓂᐊᕕᒻᒧᐊᑐᑦ, ᐅᕝᕙᓘᓐᓃᑦ ᖃᓄᖅ ᐊᑯᓂᐅᑎᒋᔪᖅ ᐊᐅᓪᓚᓯᒪᓂᐊᕐᒪᖔᑕ. ᐋᓐᓂᐊᕕᒻᒦᑐᕐᓗ ᑐᖁᑐᐊᕐᒪᑦ, ᐃᓗᕕᕐᑕᐅᕙᑦᓱᑎᒃ ᖃᓪᓗᓈᑦ ᓄᓇᖓᓂ. ᐃᓗᕕᕐᓄᐊᑕᐅᕙᑦᓱᑎᒃ ᑐᖁᔪᑦ, ᐊᒻᒪ ᐃᓚᖏᑦ ᐅᖃᐅᑎᔭᐅᕙᒐᑎᒃ ᑐᖁᔪᖃᑐᐊᕐᒪᑦ.

ᐊᖏᕐᕋᑐᖃᑐᐊᕋᒥᓗ, ᕿᒪᑦᑕᐅᕙᓚᐅᕐᑐᑦ ᓄᓇᓕᖏᓐᓄᑦ ᐅᑭᐅᒃᑯᑦ - ᐊᓐᓄᕌᖃᑎᓇᒋᓪᓘᓃᑦ ᐸᖅᑳᑐᓂᒃ ᐊᒻᒪ ᐃᓚᖏᑦ ᐅᖃᐅᑎᔭᐅᓯᒪᓇᑎᒃ ᓯᕗᓂᐊᓂ ᑎᑭᓐᓂᐊᓂᖓᓂᒃ.

ᑕᐃᒃᑯᐊ ᓱᕈᓰᑦ ᐅᑎᕐᓂᑯᐃᑦ, ᐅᑎᕐᐸᓚᐅᕐᑐᑦ ᐃᓚᒥᓄᑦ ᐃᖅᑲᐅᒪᒍᓐᓇᐃᓱᒋᑦ, ᐅᖃᐅᓯᑐᖃᕆᖏᑕᒥᓂᓪᓗ ᐅᖃᐅᓯᖃᓕᕐᓱᑎᒃ, ᐊᒻᒪ ᐃᖅᑲᐅᒪᓇᑎᒃ ᓄᓇᒥᓂᒃ ᐃᓅᕕᕕᓂᕐᒥᓂᒃ. T

ᑖᒃᑯᓇᓂ ᐊᕐᕌᒍᒐᓴᓐᓂ ᐃᓄᑖᕙᑦᑐᕕᓃᑦ, ᓇᓗᓕᖅᑲᓇᕐᑐᒦᑦᓱᑎᒃ ᐊᒻᒪ ᐋᓐᓂᕈᑎᒋᑦᓱᒍ.

ᑭᓯᐊᓂ ᒐᕙᒪᒃᑯᑦ ᐊᐅᓚᑦᓯᒍᓯᕆᓯᒪᔭᖓ ᐳᕙᓪᓕᓂᕐᒥᒃ ᐱᐅᖏᑐᐊᓘᓚᐅᖏᑐᖅ ᒪᓕᒐᖓ - ᑭᓯᐊᓂ ᐊᑐᕐᑕᐅᓯᒪᔪᖅ ᐊᐅᓚᑦᓯᒍᓯᖓ ᒐᕙᒪᐃᑦ ᓱᕋᑦᑎᕆᓯᒪᔪᖅ.

ᑐᖁᖓᓕᕐᑐᖅ ᐋᕐᓗᑐᖅ ᐊᐃᐱᓕ ᐅᖃᓚᐅᕐᓯᒪᔪᖅ, ᐃᒫᒃ “ᐃᓕᓴᕐᑕᐅᒍᒪᓚᐅᕐᓯᒪᖏᑲᓗᐊᕐᑐᐊ ᐃᓕᖅᑯᓯᕆᖏᑕᓐᓂᒃ ᐊᒻᒪ ᐅᖃᐅᓯᕆᖏᑕᓐᓂᒃ.”

ᐃᓄᐃᑦ ᐃᑐᕐᖓᖏᑦ ᐊᐅᓪᓚᑎᑕᐅᕙᓚᐅᕐᒥᔪᑦ ᐃᓕᓐᓂᐊᕆᐊᕐᑎᑕᐅᔪᑦ ᐊᒻᒪ ᒐᕙᒪᒃᑯᑦ ᐃᓕᓐᓂᐊᕕᖏᓐᓄᐊᕐᑕᐅᔪᑦ ᐃᓕᓴᕆᐊᕐᓱᑎᒃ ᐅᖃᐅᓯᕆᖏᑕᒥᓂᒃ. ᑲᒪᒋᔭᐅᓯᐊᕕᒋᓇᓂᐅᒃ ᐊᒻᒪ ᐱᓂᕐᓗᑕᐅᕕᒋᑦᓱᓂᒋᑦ.

ᑭᓯᐊᓂ ᐊᐃᐱᓕᐅᑉ ᐊᓪᓚᓯᒪᓂᐊᒍᑦ, “ᓯᕗᓂᑦᓴᖅ ᑲᔪᓯᕙᑦᑐᖅ ᐊᑐᕐᓱᒍ, ᐅᕙᓐᓄᑦ ᐃᓱᒪᓕᐅᕈᑦᓯᓱᑎᒃ ᓇᑭᓐᖔᒥᕐᒪᖔᕐᒪ ᓇᒧᒻᖓᓂᐊᕐᒪᖔᕐᒪᓗ. ᓯᕗᓂᖅ ᐃᒪᓕᐅᕈᑕᐅᓪᓗᓂ - ᑲᓇᑕᐅᑉ ᒐᕙᒪᒃᑯᖏᓐᓄᑦ.

ᑲᓇᑕᐅᑉ ᒐᕙᒪᖏᑦ ᐃᓱᒪᓕᐅᕈᑎᖃᖅᐸᓚᐅᕐᑐᑦ ᐱᔾᔪᑎᓕᓐᓄᑦ ᐃᓚᒌᓂᒃ - ᐃᓚᑦᑎᓂᒃ - ᐊᐅᓪᓚᓂᐊᕐᓂᖏᓐᓄᑦ. ᑲᓇᑕᐅᑉ ᒐᕙᒪᖏᑦ ᐃᓱᒪᓕᐅᕐᓱᑎᒃ ᐃᓄᐃᑦ ᐊᑐᕐᑕᐅᓯᒪᒋᓪᓗᑎᒃ ᑲᓇᑕᒥᒃ ᓇᒻᒥᓂᖃᕋᓱᐊᕐᓂᕐᒧᑦ ᖁᑦᓯᑐᒥ ᑲᓇᑕᒥ.

ᖃᐅᔨᒪᔪᖓ ᐃᓄᐃᑦ ᐅᓪᓗᒥ - ᐃᓄᐃᑦ ᓄᓇᖓᓂ - ᐊᑐᕆᐊᖃᖅᓯᒪᔪᑦ ᑕᒪᒃᑯᓂᖓ ᒪᓕᒐᕐᓂᒃ, ᑕᒪᒃᑯᓇᓂᓗ ᐊᕐᕌᒍᓂ ᓄᓇᓕᓐᓂ ᐊᒻᒪ ᐱᔪᓐᓇᐅᑎᒥᓂᒃ ᐊᕐᕌᑕᐅᓯᒪᑦᓱᑎᒃ ᐊᒻᒪ ᐃᒃᐱᒋᔭᐅᑦᓯᐊᕋᑎᒃ.

ᑕᒪᒃᑯᐊᒐᓵᓗᐃᑦ ᐱᔾᔪᑕᐅᒻᒪᑕ - ᐃᓄᓐᓂᒃ ᓅᑎᕆᓂᕕᓂᖅ ᐅᖓᓯᑦᑐᐊᓗᒻᒧᑦ, ᐃᓕᓐᓂᐊᕆᐊᕐᑎᑦᓯᓂᕕᓂᖅ, ᐳᕙᓪᓗᑐᓄᑦ ᒪᓕᒐᐃᓪᓗ - ᑕᒪᕐᒥᐊᓗᒃ ᐊᑐᓯᔭᐅᓚᐅᓯᒪᒻᒪᑦ, ᐃᓄᓐᓄᑦ, ᐊᕐᕉᓂ ᐊᒥᓲᖏᑐᐊᐱᓐᓂ. ᐊᕐᕌᒍᓂᓗ ᐊᑕᐅᑦᓯᓇᓂᑦᓴᐃᓇᖅ ᒐᕙᒪᒃᑯᑦ ᑐᓂᐅᖅᑲᐃᓚᐅᕐᓯᒪᔪᑦ ᑭᑎᔾᔪᑎᓂᒃ ᐃᓄᓐᓄᑦ ᓇᓗᓇᐃᒃᑯᑕᖏᓐᓂᒃ ᐅᔭᒥᓐᓂᒃ, ᐊᒻᒪ ᐃᓚᒌᑦ ᕿᒻᒥᖃᕐᐸᓚᐅᕐᑑᒐᓗᐊᑦ, ᕿᒧᑦᓯᓂᒃ, ᑭᓯᐊᓂ ᕿᒻᒥᖏᑦ ᑐᖁᕋᕐᑕᐅᓯᒪᒻᒥᔪᑦ ᐳᓖᓯᒃᑯᓄᑦ.

ᑖᒃᑯᐊ ᐊᑐᕐᓯᒪᔭᕗᑦ ᑲᓐᖓᓇᕐᑐᑦ.

ᖃᐅᔨᒪᔪᓯ ᖃᓄᖅ ᐅᕙᑦᑎᓄᑦ ᐊᑦᑐᐃᓯᒪᒻᒪᖔᑦ:

ᐃᓕᖅᑯᓯᕗᑦ ᐊᒻᒪ ᐅᖃᐅᓯᕗᑦ ᐊᑐᕈᓐᓇᐃᓂᕐᓴᐅᓕᕐᓱᓂ.

ᐃᓚᒌᑦ ᐃᓗᐃᑦᑑᒍᓐᓇᐃᕈᑎᖓ.

ᐃᓅᓯᖏᑦ ᐃᓄᐃᑦ ᓱᕋᑦᑎᑕᐅᓯᒪᔪᑦ ᑕᐃᒪᖓᒧᑦ.

ᑕᒪᒃᑯᐊ ᐱᓂᕐᓗᑕᐅᓂᕕᓂᕗᑦ ᐊᓯᐅᓂᐅᔭᖏᑐᑦ - ᑲᓇᑕ ᐸᓯᔭᑦᓴᐅᔪᖅ ᐊᒻᒪ ᑲᓐᖑᓇᕐᑐᖅ.

ᐅᓪᓗᒥ, ᑕᒫᓃᑉᐳᖓ ᒪᒥᐊᒋᐊᕐᑐᓱᖓ. ᒐᕙᒪᓄᑦ ᒪᒥᐊᒍᔾᔨᕗᖓ ᖃᓄᖅ ᐊᐅᓚᑦᓯᓚᐅᕐᓂᐊᓄᑦ ᐳᕙᓪᓗᓂᕐᒥᒃ ᐊᕐᕌᒍᑦ ᐊᑯᓐᓂᖏᓐᓂ 40,ᓂᑦ 60,ᓄᑦ.

ᑖᓐᓇ ᒪᓕᒐᖅ ᑕᒻᒪᕈᑎᑐᐃᓐᓇᕕᓂᐅᖏᒪᑦ - ᐱᔭᖅᑯᑕᐅᔪᕕᓂᖅ.  

ᐊᑐᕐᑕᐅᓯᒪᔪᑦ ᐊᓪᓛᑦ ᒐᕙᒪᑐᖃᒃᑯᑦ ᖃᐅᔨᒪᒐᓗᐊᕐᕋᒥᒃ ᐊᕐᓱᕈᕐᓇᓂᖓᓂᒃ ᐃᓄᐃᑦ ᐃᓚᖏᓐᓄᑦ.

ᓄᓇᓕᓐᓂ ᐃᒃᐱᒋᔭᐅᖏᓐᓂᓴᐅᓯᒪᔪᑦ ᑕᕝᕘᓇ ᐃᓱᒪᒋᔭᖏᑦ.

ᑕᒪᒃᑯᐊ ᐊᐅᓪᓚᑎᑕᐅᕙᑦᑐᕕᓃᑦ ᖃᓪᓗᓈᑦ ᓄᓇᖓᓄᑦ - ᒪᒥᐊᑉᐳᒍᑦ ᐃᓕᑦᓯᓄᑦ. ᒪᒥᐊᐃᑉᐳᒍᑦ ᕿᒪᐃᑎᑦᓯᓯᒪᒐᑦᑕ ᐃᓚᑦᓯᓂᑦ, ᐃᒃᐱᒍᓱᑦᓯᐊᖏᓐᓂᑯᑦ ᐊᒻᒪ ᑲᒪᑦᓯᐊᖏᓐᓂᑯᑦ ᑲᒪᒋᔭᐅᑦᓯᐊᕆᐊᖃᖅᑎᓗᓯ. ᒪᒥᐊᑉᐳᒍᑦ ᐋᓐᓂᐊᑎᑦᓯᓂᑦᑎᓄᑦ ᐃᓕᑦᓯᓂᒃ.

ᕿᒪᑦᑕᐅᓂᑯᓄᑦ ᐊᕐᓴᑕᐅᑦᓱᑎᒃ ᓇᓪᓕᒋᔭᖏᓐᓂᑦ - ᒪᒥᐊᑉᐳᒍ. ᒪᒥᐊᑉᐳᒍᑦ ᓱᕋᑦᑎᕆᓐᓂᕋᑦᑕ ᐊᓐᓂᓇᕐᓂᐹᓂᒃ - ᐊᖏᕐᕋᕆᔭᐅᔪᓂᒃ ᓱᕋᑦᑎᕆᓂᒃᑯᑦ.

ᑕᒪᒃᑯᐊᓗ ᓱᓕ ᖃᐅᔨᒪᖏᑐᑦ ᖃᓄᐃᓕᔭᐅᓐᓂᒪᖔᑕ ᕿᑐᕐᖓᖏᑦ, ᐊᓈᓇᐅᔪᑦ, ᐊᑖᑕᐃᓪᓗ - ᒪᒥᐊᑉᑉᐳᒍᑦ.

ᓄᓇᓕᓐᓄᑦ ᐊᑐᕆᐊᖃᕐᑐᕕᓂᕐᓄᑦ ᐊᕐᓱᕈᕐᓇᑐᓂᒃ ᒪᓕᒐᖅ ᐱᔾᔪᑎᒋᑦᓱᒍ ᐊᒻᒪ ᐊᓯᖏᑦ - ᒪᒥᐊᑉᐳᒍᑦ. ᒪᒥᐊᑉᐳᒍᑦ ᐱᔾᔪᑎᒋᑦᓱᒋᑦ ᑕᒻᒪᓂᕕᓂᕗᑦ ᐊᒥᓱᓂᒃ ᐃᓄᓐᓂᒃ ᐅᑉᐱᕆᔭᐅᒍᓐᓇᐃᓱᑕ ᐱᔾᔪᑕᐅᑦᓱᓂ ᐱᓕᕆᒍᓯᖓ, ᐃᑲᔪᕐᑕᐅᒋᐊᖃᕐᑎᓗᒋᑦ ᐃᑲᔪᕐᑕᐅᖏᓐᓂᑯᑦ.

ᒪᒥᐊᑉᐳᒍᑦ ᖃᓪᓗᓈᑦ ᐊᐅᓚᒍᓯᖏᑦ ᐊᑐᕐᓯᒪᒻᒪᒋᑦ ᒐᕙᒪᐃᑦ ᖃᓄᐃᓘᕐᓂᖏᓐᓄᑦ . ᒐᕙᒪᐃᑦ ᒪᒥᐊᑦᓯᒪᓕᕐᑐᑦ ᐃᓕᓐᓂᐊᕆᐊᕐᑎᑦᓯᕙᓚᐅᕐᓂᒧᑦ ᐊᒻᒪ ᓅᑕᐅᓯᒪᔪᓄᑦ ᐃᓄᓐᓄᑦ. ᑭᓯᐊᓂ ᑕᑕᒥᐅᑕᐅᓯᒪᔪᑦ, ᑐᖏᓕᕇᑦᑐᓂᒃ, ᓱᓕ ᐊᑐᕐᑕᐅᖏᓐᓇᒪᑕ ᐊᒻᒪ ᐃᓗᒥᐅᑕᕆᔭᐅᔪᒻᒪᕇᑦ.

ᖃᐅᔨᒪᓕᕐᐳᒍᑦ  ᑕᒻᒪᓂᕋᑦᑕ. ᖃᐅᔨᒪᓕᕐᑐᒍᑦ ᖃᓄᐃᓘᕆᐊᖃᓂᑎᓐᓂᒃ ᑕᒪᒃᑯᐊ ᐋᖅᑭᒋᐊᕐᓗᒋᑦ.

ᐊᒥᓱᐊᓗᓐᓂ ᐊᕐᕌᒍᒐᓵᓗᓐᓂ ᐅᑕᖅᑭᒋᐊᖃᓂᖏᑦᑑᒐᓗᐊᑦ.  ᒪᒥᐊᑉᐳᒍᑦ ᐊᑯᓂᐊᓗᒃ ᐅᖁᒪᐃᑦᑐᓂᒃ ᐊᔾᔭᓯᓐᓂᕋᑦᓯ. ᒪᒥᐊᑉᐳᒍᓪᓗ ᐊᑯᓂᐊᓗᒃ ᐅᑕᖅᑭᑎᑦᓯᓯᒪᒐᑦ, ᐊᒥᓲᒻᒪᑕᓗ ᑐᓴᓂᐅᔭᕈᓐᓇᐃᑐᑦ ᒪᒥᐊᓐᓂᒥᒃ.

ᐅᓪᓗᒥ, ᑲᒪᒋᐊᖃᕐᐳᒍᑦ ᐋᓐᓂᑎᕆᒍᑎᕕᓂᖏᓐᓂᒃ ᒐᕙᒪᐃᑦ ᒪᓕᒐᖏᑕ ᐊᒻᒪ ᖃᓄᐃᓘᕐᓯᒪᓂᖏᑕ. ᐊᑭᕋᕐᑐᓂᖅ ᐊᐅᖃᑎᒋᖏᑕᒥᒃ ᐊᒻᒪ ᐃᓚᐃᓐᓈᓂᖅ ᐊᑐᕐᑕᐅᓯᒪᔪᑦ ᐃᓄᓐᓄᑦ, ᑭᖑᓂᕐᒥ, ᐊᑐᕐᑕᐅᒋᐊᖃᖏᒪᕆᑦᑎᓗᒍ.

ᒪᒥᐊᓐᓂᖅ ᑖᓐᓇᑑᓗᓂ ᓈᒻᒪᖏᒻᒥᔪᖅ. ᐊᖏᕐᓯᒪᒋᐊᖃᕋᑦᑕ ᐱᐅᓂᕐᓴᓂᒃ ᐱᓇᓱᒍᓯᖃᕆᐊᖅ.

ᑲᓇᑕᒥ ᐊᓯᔾᔨᑐᐃᒍᓐᓇᖏᒃᑲᓗᐊᕐᑐᒍᑦ ᐊᑐᕐᓯᒪᒋᕐᑐᓂᒃ ᑭᖑᓂᕐᒥ, ᑭᓯᐊᓂ ᓂᕈᐊᕐᕈᓐᓇᕋᑦᑕ ᖃᓄᐃᓘᕆᐊᖃᓕᕐᓂᑦᓐᓄᑦ.

ᐅᓪᓗᒥ, ᓂᕈᐊᕐᓯᒪᓕᕐᑐᒍᑦ ᐱᐅᓂᕐᓴᑯᑦ ᐋᖅᑭᓱᐃᕙᓪᓕᐊᒋᐊᖅ ᓯᕗᓂᒃᓴᒧᑦ. ᓯᕗᓂᑦᓴᒥᑦ ᐃᒃᐱᒍᓱᑦᓯᐊᓂᒃᑯᑦ ᐊᒻᒪ ᐱᓇᓱᖃᑎᒌᓐᓂᑯᑦ.

ᑲᓇᑕᒥ ᐊᖓᔪᖅᑳᖑᓪᓗᖓ, ᐊᖏᕐᐳᖓ ᓄᑕᐅᓕᕐᑎᑦᓯᒋᐊᖅ ᐱᓇᓱᐊᑎᒌᒋᐊᖃᓂᖓᓂᒃ ᑲᓇᑕᐅᑉ ᒐᕙᒪᖏᑕ ᐊᒻᒪ ᐃᓄᐃᑦ. ᐱᓇᓱᐊᑎᒌᓐᓂᑯᑦ ᐋᖅᑭᒋᐊᕈᓐᓇᕋᑦᑕ ᐊᖑᑎᓄᑦ ᐊᐅᓚᑕᐅᒍᓯᖏᓐᓂᒃ ᐊᒻᒪ ᒐᕙᒪᐃᑦ ᐊᐅᓚᑦᓯᒍᓯᖏᓐᓂᒃ ᓄᓇᓕᓐᓂᓯᒪᔪᓂᒃ. ᑲᔪᓯᑎᑦᓯᖏᓐᓇᓂᒃᑯᑦ ᒪᒥᓴᕈᑎᖃᐸᓕᐊᓂᒃᑯᑦ ᐃᓱᒪᒋᔪᓐᓇᐃᕕᒋᖃᑎᒌᓐᓂᑯᑦ.

ᑭᖑᓂᕐᒥ ᐊᑐᕐᑕᐅᓯᒪᔪᑦ ᐱᔭᕆᐊᑐᔪᑦ, ᑭᓯᐊᓂ ᐊᑐᕐᑕᓕᒫᕗᑦ ᑲᔪᓯᒋᐊᖃᓕᕐᑐᑦ ᑲᑐᑎᒍᑎᒋᓗᒋᑦ.

ᑕᒻᒪᓯᒪᔭᑦᑎᓂᒃ ᐋᖅᑭᓱᐃᒋᐊᖏᑯᑦᑕ, ᑲᔪᓯᒐᓱᐊᓚᖓᔪᒍᑦ ᑕᒻᒪᑐᒃᑯᑦ.

ᐅᓪᓗᒥ, ᑲᓇᑕᐅᑉ ᒐᕙᒪᖏᑦ ᓴᖅᑭᑎᑦᓯᔪᑦ ᑕᐃᔭᐅᔪᒥᒃ ᓇᓂᓚᕗᑦ ᐃᑲᔪᕈᑎᑦᓴᓂᒃ, ᐱᓇᓱᐊᖃᑎᖃᓂᑯᑦ ᐃᓄᓐᓂᒃ, ᐊᒻᒪ ᑮᓇᐅᔭᓂᒃ ᑐᓂᓯᓂᒃᑯᑦ ᐱᓇᓱᐊᒐᑦᓴᓄᑦ ᑲᒪᒍᑕᐅᒐᔭᕐᑐᓂᒃ.

ᐃᓄᐃᑦ ᐅᖃᐅᓯᖓᑎᑐᑦ, ᓇᓂᓚᕗᑦ ᑐᑭᓕᒃ “ᓇᓂᓚᐅᕐᓚᕗᑦ,” ᐊᒻᒪ ᑕᕝᕙ ᑲᒪᒋᔭᐅᓕᕋᔭᕐᑐᖅ ᔾ ᕿᓂᕐᓂᒧᑦ ᐊᒻᒪ ᐃᒃᐱᒍᓱᑦᓯᐊᓂᕐᒧᑦ ᐊᓯᐅᒪᓯᒪᔪᓂᒃ ᐳᕙᓪᓗᓇᕐᑎᓗᒍ, ᐊᒻᒪ ᒪᒥᓴᕆᐊᖃᓕᕐᓂᒧᑦ ᐊᒻᒪ ᑲᒪᑦᓯᐊᓂᕐᒧᑦ ᕿᒪᑦᑕᐅᕙᑦᑐᕕᓂᕐᓂᒃ.

ᐊᕐᓱᕈᕐᓇᑐᐊᓘᔪᑦᑕᐅᓂᐊᓂᒃ ᖃᐅᔨᒪᖏᓚᖓ ᓇᓪᓕᒋᔭᒥᒃ ᑲᑎᓐᖓᒍᓐᓇᐃᕆᐊᖅ, ᐊᒻᒪ ᖃᐅᔨᒪᓚᐅᕐᓯᒪᖏᓗᒍ ᖃᓄᐃᓕᓯᒪᒻᒪᖔᑦ.

ᑖᒃᑯᐊ ᐃᑲᔪᕈᑎᑦᓴᐃᑦ ᐊᑐᕐᓗᒋᑦ, ᑭᓇᑐᐃᓐᓇᖅ ᐊᑐᐃᓐᓇᖃᕈᓐᓇᑐᖅ ᑐᑭᓯᒋᐊᕐᕕᓴᓂᒃ  ᖃᓄᐃᓕᓯᓯᒪᒻᒪᖔᑕ ᐃᓚᒌ5, ᐊᒻᒪ ᑮᓇᐅᔭᓂᒃ ᐊᑐᐃᓐᓇᖃᕐᑎᑦᓯᓚᖓᔪᒍᑦ ᓯᑕᒪᓄᑦ ᐊᕕᑦᑐᓯᒪᔪᓄᑦ ᓄᓇᑖᕐᓯᒪᓂᒃᑯᑦ ᑲᑐᔾᔨᖃᑎᒌᓄᑦ ᐃᑲᔪᕈᑕᐅᒐᔭᕐᑐᓂᒃ ᐊᐅᓪᓚᕆᐊᖃᓂᖏᓐᓄᑦ ᐃᓚᒌᑦ ᐃᓚᒥᓂᒃ ᓇᓂᓯᓯᒪᓕᕐᑐᓄᑦ ᐃᓗᕕᕐᑕᐅᓯᒪᔪᓂᒃ.

ᐊᒻᒪ ᑮᓇᐅᔭᓂᒃ ᐊᑐᕐᓐᓇᕈᕐᑎᑦᓯᓚᖓᔪᒍᑦ ᐃᓗᕕᕐᓂ ᐊᑎᓕᐅᕕᓄᐊᖓᔪᓂᒃ ᐊᒻᒪ ᓇᓗᓇᐃᒃᑯᑕᖏᓐᓄᑦ. ᐅᑎᕐᕈᓐᓇᖏᒻᒪᑕ ᓇᓪᓕᒋᔭᑦ ᓂᐱᖏᑦ ᐊᖓᔪᖅᑳᖓᔪᑦ ᐅᕝᕙᓘᓐᓃᑦ ᐃᓚᓐᓇᕆᔭᑦ, ᑭᓯᐊᓂ ᐃᓕᑕᕐᓯᓂᖅ  ᐃᑯᓪᓚᐅᒥᒍᑕᐅᒍᓐᓇᑐᖅ ᐃᓂᓪᓚᑎᕆᓂᕐᒧᑦ ᐱᒋᐊᕈᑎᖃᓂᑯᑦ ᐃᖅᑲᐅᒪᑦᓯᐊᓗᒋᑦ.

ᐱᔾᔪᑎᒋᑦᓱᒍ ᑕᐃᒪᖓᓕᒫᑲᓴᒃ, ᑕᒻᒪᑕᐅᓂᕕᓂᖏᑦ ᐃᓄᐃᑦ ᐳᐃᒍᕐᑕᐅᑐᐃᓐᓇᖃᑦᑕᓯᒪᒻᒪᑕ ᐅᕝᕙᓘᓐᓃᑦ ᓴᓂᕐᕙᒋᐊᕐᑕᐅᑐᐃᓐᓇᓱᑎᒃ. ᑕᒪᓐᓇ ᐊᑐᕐᑕᐅᑎᒋᐊᓪᓚᒋᐊᖃᕈᓐᓇᐃᑕᕗᑦ. ᑕᐃᒪᐃᒻᒪᑦ ᐃᑲᔪᕐᓯᓯᒪᕗᒍᑦ ᓄᓇᓕᓐᓂ ᑲᒪᒋᔭᐅᓗᑎᒃ ᖃᓄᐃᓘᕐᓂᐅᒐᔭᕐᑐᓂᒃ ᐊᒻᒪ ᐃᖅᑲᐅᒪᓂᕐᓂᒃ, ᐊᒻᒪ ᑭᑯᓕᒫᓂᒃ ᐃᓕᓴᐃᕙᓪᓕᐊᐊᓂᒃᑯᑦ ᐊᑐᕐᓯᒪᔭᑦᑕ ᒥᒃᓵᓄᑦ.

ᑲᔪᓯᕙᓪᓕᐊᖏᓐᓇᓗᑕ ᐃᓱᒪᒋᔪᓐᓇᐃᕕᒋᖃᑦᑕᐅᑎᓂᒃᑯᑦ, ᑲᓇᑕᒥ ᑕᒻᒪᓯᒪᔭᒥᓂᒃ ᑭᖑᓂᑦᑎᓂᒃ ᑲᒪᒋᐊᕆᐊᖃᒪᑕ.

ᐊᒻᒪ ᓲᕐᓗ ᐃᓕᒋᐊᖃᖅᑐᒍᑦ ᐊᑐᕐᓯᒪᔭᑦᑎᓂᑦ ᑭᖑᓂᕐᒥ, ᐊᒻᒪ ᑕᑯᒋᐊᕐᓗᑕ ᓯᕗᓂᑦᓴᑎᓐᓂᒃ - ᐳᕙᓪᓗᓂᖃᖏᓂᕐᒥᒃ.

ᐳᕙᓪᓗᒃ ᓄᖅᑲᖓᑎᑕᐅᒍᓐᓇᐳᖅ ᐊᒻᒪ ᐱᔪᓐᓇᐃᑎᑕᐅᒍᓐᓇᓱᓂ. ᑐᖁᒍᑕᐅᖏᑑᒍᓐᓇᑐᖅ. ᑭᓯᐊᓂ ᐳᕙᓪᓗᓂᖅ ᐊᕐᓲᓯᒍᑕᐅᕙᑦᑐᖅ ᓱᕈᓯᕐᓂᒃ, ᐃᓄᑐᖃᕐᓂᒃ, ᐊᒻᒪ ᓯᕗᓕᐅᕐᑎᓂᒃ. ᐃᓄᐃᑦ ᐃᓄᐃᑦ ᓄᓇᒥᓂ 300,ᕕᓪᓗᒍ ᑲᓇᑕᒥ ᐊᓯᖏᓐᓂᑦ ᐳᕙᓪᓗᓯᒪᒻᒪᑕ. ᑕᒪᓐᓇ ᐊᑲᐅᖏᓈᕐᑐᒪᕆᒃ.  

ᐊᕐᕌᓂ, ᑲᓇᑕᐅᑉ ᒐᕙᒪᖏᑦ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐱᓂᐊᕐᓂᑖᓚᐅᕐᓯᒪᔪᑦ ᓄᖅᑲᑎᑦᓯᒐᓱᐊᕆᐊᖅ ᐳᕙᓪᓗᓂᕐᒥᒃ ᐃᓄᐃᑦ ᓄᓇᖓᓂ 2030,ᒥ, ᐊᒻᒪ ᐃᑯᓪᓚᐅᒥᑎᑦᓯᒋᐊᖅ ᐳᕙᓪᓗᓂᕐᒥᒃ 50%,ᒧᑦ ᐊᕐᕌᒍᓂᐊᕐᑐᓂ ᐱᖓᓲᔪᕐᑐᓂ.  

ᐳᕙᓪᓗᓂᕐᒥᒃ ᐲᕐᓯᓚᕆᓐᓂᖅ ᐱᑐᐃᓐᓇᐅᖏᒻᒪᑦ ᑲᐱᓯᓂᑐᐃᓐᓇᑯᑦ ᐅᕝᕙᓘᓐᓃᑦ ᖃᐅᔨᓴᕐᓂᑯᑦ - ᐃᓚᒋᔭᐅᒻᒪᕇᑦᑑᒐᓄᐊᑦ.

ᑕᒪᑐᒥᖓ ᐳᕙᓪᓗᓂᕐᒥᒃ ᓄᖅᑲᑎᑦᓯᓂᐊᕈᑦᑕ, ᐃᓕᑕᕐᓯᒋᐊᖃᖅᐳᒍᑦ ᐊᕐᑐᕐᓯᒪᔪᓂᒃ ᐳᕙᓪᓗᓂᕐᒥᒃ, ᐅᓪᓗᑕᒫᓪᓗ, ᐊᑐᖃᑦᑕᓯᒪᔭᖏᓐᓂᒃ ᒐᕙᒪᒃᑯᑦ ᐊᐅᓚᒍᓯᖏᑎᒍᑦ. ᐃᖅᑲᐅᒪᒍᕕᑦ ᐊᐅᓪᓚᑎᑕᐅᓯᒪᒋᐊᖅ ᖃᓪᓗᓈᑦ ᓄᓇᖓᓄᑦ, ᐃᖅᑲᐅᒪᒐᔭᕐᑐᑎᑦ ᒐᕙᒪᒃᑯᑦ ᐊᐅᓚᒍᓯᖏᑎᒍᑦ ᐅᓪᓗᒥ.

ᑕᒻᒪᑲᑦᑕᕆᐊᖃᕈᓐᓇᐃᕈᑦᑕ ᑭᖑᓂᕐᒥ ᐊᑐᕐᓯᒪᑦᑎᑎᑐᑦ. ᑐᓂᐅᖅᑲᐃᒐᓱᐊᕆᐊᖃᕈᓐᓇᐃᕋᑦᑕ ᐋᖅᑭᒋᐊᕈᑎᑦᓴᓂᒃ.

ᑕᐃᒪᐃᒻᒪᑦ ᐊᑕᐅᓯᐅᖏᑐᒥᒃ ᐱᓕᕆᒍᓯᓕᐅᕈᒪᕗᒍᑦ, ᐊᒻᒪ ᓯᕗᓂᑦᓴᑎᓂ.

ᒐᕙᒪᐃᑦ ᐸᕐᓇᑐᑦ, ᐃᓄᓐᓄᑦ ᓯᕗᓕᐅᕐᑕᐅᓗᑎᒃ, ᑮᓇᐅᔭᓂᓪᓗ ᑐᓂᓗᒋᑦ ᐅᖓᑖᓄᑦ $27 ᒥᓕᐊᓂᒃ ᐊᕐᕌᒍᓄᑦ ᑕᓪᓕᒪᓄᑦ ᑐᕌᖓᔪᓂᒃ ᐊᑐᕋᔭᕐᑐᓂᒃ ᓄᖅᑲᑎᑦᓯᒐᓱᐊᒻᒪᕆᓐᓂᒧᑦ ᐳᕙᓪᓗᓂᕐᒥᒃ ᐃᓄᐃᑦ ᓄᓇᖓᓂ. ᑕᕝᕘᓇ, ᐃᑲᔪᕐᓯᒥᔪᒍᑦ ᐅᑯᓂᖓ ᓄᓇᕗᑦ, ᓄᓇᕕᒃ, ᐊᒻᒪ ᐃᓄᕕᓗᐃᑦ ᓄᓇᖏᓐᓂ ᐋᖅᑭᑦᓱᐃᒍᑎᒋᓂᐊᕐᑕᖏᓐᓂᒃ ᐃᒻᒥᑯᑦ ᐸᕐᓇᐃᓂᒃᑯᑦ ᐱᓇᓱᒐᑦᓴᓂᒃ.

ᐊᒻᒪ, ᑖᓐᓇ ᐱᓇᓱᐊᕈᓯᒋᓂᐊᕐᑕᕗᑦ ᓄᑖᖅ ᐱᓇᓱᐊᑎᒌᓐᓂᐅᒐᔭᕐᑐᖅ, ᒪᓕᓪᓗᒋᑦ ᐳᕙᓪᓗᓂᒃᑯᑦ ᓱᓕᔪᑦ ᐅᖃᐅᓯᐅᓯᒪᔪᑦ: ᐳᕙᓪᓗᓂᖅ ᐋᖅᑭᑕᐅᔪᓐᓇᖏᒻᒪᑦ ᐃᓅᓕᓴᐅᑎᑐᐃᓐᓇᑯᑦ.

ᑲᒪᒋᐊᖃᕐᐳᒍᑦ ᐊᔪᕐᓴᓂᕐᒥᒃ, ᓂᕿᖃᑦᓯᐊᖏᓐᓂᒥᒃ, ᐊᒻᒪ ᐃᓪᓗᖃᑦᓯᐊᖏᓐᓂᒥᒃ. ᐱᓇᓱᐊᕐᓗᑕ ᐳᕙᓪᓗᓂᕐᒥᒃ, ᑲᒪᑦᓯᐊᓂᕐᓴᐅᓂᐊᕐᑐᒍᑦ, ᐱᖃᓯᐅᑎᓗᒋᑦ ᐅᓄᕐᓂᓴᓂᒃ $640 ᒥᓕᐊᓂᒃ ᓴᖅᑭᑎᑦᓯᔪᒍᑦ ᐃᓄᐃᑦ ᓄᓇᖓᓄᑦ ᐃᓪᓗᓕᕆᓂᕐᒧᐊᖓᔪᓂᒃ.

ᐃᓪᓗᓕᕆᓂᖅ ᐋᖅᑭᓱᕐᑕᐅᓯᒪᔪᖅ ᐃᓄᓐᓄᑦ ᐱᓇᓱᖃᑎᖃᕐᓱᑎᒃ ᑲᓇᑕᐅᑉ ᒐᕙᒪᖏᓐᓂᒃ, ᐊᒻᒪ ᑲᔪᓯᑎᑕᐅᓪᓗᑎᒃ ᐃᓄᓐᓄᑦ. ᐱᓂᐊᕐᓂᖃᕐᐳᒍᑦ ᑮᓇᐅᖃᕐᑎᑦᓯᒋᐊᖅ ᐃᓄᐃᑦ ᓇᒻᒥᓂᕆᔭᖏᓐᓂᒃ, ᐊᐅᓚᑕᖏᓐᓂᓗ ᐋᖅᑭᒋᐊᕈᑎᑦᓴᓂᒃ, ᑲᔪᓯᑦᓯᐊᕈᐅᒐᔭᕐᑐᓂᕐ, ᑖᓐᓇ ᓇᓂᓚᕗᑦ ᐱᒋᐊᕈᑕᐅᔪᖅ, ᐅᕝᕙᓘᓐᓃᑦ ᐱᓇᓱᐊᕐᐸᑕᑦᑎᒍᑦ ᐊᖅᑯᑎᒋᑦᓱᒋᑦ ᐃᓄᐃᑦ ᑲᑎᒪᔨᖏᑦ ᓄᓇᒥᓂ.

ᓲᖅᑕᒐ, ᐅᖃᐅᔾᔪᐃᒋᐊᖃᖏᑐᖓᓘᓐᓂᑦ ᑭᓇᑐᐃᓐᓇᒥ ᒫᓂ ᑲᔪᓯᕙᓪᓕᐊᓕᕋᑦᑕ, ᓱᓕ ᐱᔭᑦᓴᓕᒻᒪᕆᐊᓘᒐᓗᐊᕐᑐᒍ5 ᓯᕗᓂᑦᓴᑎᓐᓂ.

ᓇᓗᓇᖏᓯᐊᕐᑐᖅ ᓄᓇᓖᑦ ᐊᕐᓱᕈᕈᑎᖃᖅᐸᑐᑦ ᓱᓕ ᐅᓪᓗᒥ. ᑭᓯᐊᓂ ᓇᓗᓇᖏᓚᖅ ᐃᓄᐃᑦ ᒪᑭᑕᓯᑎᐊᓘᓂᖏᑦ.

ᑲᔪᓯᒋᐊᓕᕐᓂᖅ ᓯᕗᒧᑦ ᑕᑯᒋᐊᕈᑕᐅᒋᐊᖃᖅᐳᖅ ᓯᕗᓪᓕᒥ ᑕᒻᒪᓂᕕᓂᑦᑎᓂᒃ. ᐸᕐᓇᓇᐃᕐᓯᒪᓂᐊᓕᕐᓗᑕ ᐱᓇᓱᐊᕈᑎᒋᓕᕆᐊᖅ ᑕᒻᒪᓯᒪᔭᕗᑦ ᐋᖅᑭᓱᕆᐊᓕᕐᓗᒋᑦ. ᑕᐃᒪᐃᒻᒪᑦ ᑕᒫᓃᑉᐳᖓ.

ᐅᓛᖅ ᒪᒥᐊᓐᓂᕋ ᐱᓂᐊᕐᓂᕆᓯᒪᕙᕋ ᐃᓕᑦᓯᓄᑦ.

ᐊᖏᕐᓯᒪᓂᖃᖅᐳᒍᑦ  ᐳᐃᒍᕆᐊᖃᖏᓂᕐᒥᒃ ᐋᓐᓂᕈᑕᐅᕐᔪᐊᓯᒪᔪᓂᒃ ᐃᓄᓐᓄᑦ, ᐊᒻᒪ ᐃᓚᒌᓄᑦ.

ᐊᖏᕐᐳᖓ, ᑭᒡᒐᕐᑐᕐᓱᒋᑦ ᑲᓇᑕᒥᐅᑦ, ᓯᕗᓂᑦᓴᓕᐅᕆᐊᖅ ᐱᐅᓂᕐᓴᒥᒃ. ᐊᒻᒪ ᑲᑐᔾᔨᖃᑎᒌᑦᓯᐊᓂᒃᑯᑦ.

ᓇᑯᕐᒦᒃ