Browser not supportedᒥᐊᓕ ᓴᐃᒪᓐ ᐱᓯᒪᕗᖅ ᑲᓇᑕᒥ ᐊᒻᒪᓗ ᓯᓚᕐᔪᐊᒥ ᐃᓕᓴᕆᔭᐅᓯᒪᔪᖅ ᐱᓕᕆᓯᒪᓂᖓ ᐅᑭᐅᖅᑕᖅᑐᒥ ᐊᒻᒪᓗ ᓄᓇᖅᑲᖅᑳᖅᓯᒪᔪᑦ ᐱᔾᔪᑎᖏᓐᓄᑦ ᐊᒻᒪᓗ ᐅᖃᐅᔾᔪᐃᔨᐅᕗᖅ ᐃᓄᐃᑦ ᐃᓱᒪᖅᓱᕈᓐᓇᐅᑎᖏᓐᓄᑦ ᐱᔪᓐᓇᕐᓂᖃᕐᒪᑕ ᐊᒻᒪᓗ ᐱᐅᓯᖃᖅᖢᑎᒃ.
ᐃᓅᓂᑰᕗᖅ ᑲᖏᖅᓱᐊᓗᒃᔪᐊᖅ, ᓄᓇᕕᒃ (ᑯᐸᐃᒃ), ᒥᐊᓕ ᓴᐃᒪᓐ ᐃᖅᑲᓇᐃᔭᓕᓚᐅᖅᓯᒪᕗᖅ ᐅᖃᓪᓚᒡᕕᖕᒥ ᓯᐱᓯ ᐅᑭᐅᖅᑕᖅᑐᖅ ᓈᓚᐅᑖᓂ (ᒫᓐᓇ ᓯᐱᓯᒃᑯᑦ ᐅᑭᐅᖅᑕᖅᑐᒥ) ᑕᐃᔅᓱᒪᓂ 1970-ᓂ. ᑕᐃᑲᓃᑦᑐᓃᕋᒥ, ᐊᒥᓱᓂᒃ ᐃᖅᑲᓇᐃᔮᖃᓚᐅᖅᑐᖅ ᐊᐅᓚᑦᓯᔨᐅᓪᓗᓂ ᑯᐸᐃᒃ ᑕᕐᕋᖓᓂ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ, ᐊᐅᓪᓗᑎᓚᐅᖅᑕᖓ ᐋᔩᖃᑎᒌᒍᑕᐅᑎᓪᓗᒍ ᓯᕗᓪᓕᖅᐹᖅ ᓄᓇᑖᕈᑎᑦ ᐊᖏᕈᑎᖏᑦ ᑲᓇᑕᒥ. ᐊᖓᔪᖅᑳᖑᓚᐅᖅᓯᒪᔪᖅ ᒪᑭᕕᒃ ᑯᐊᐳᕆᓴᓐ, ᐱᓕᕆᐊᕆᓪᓗᒍᓗ ᐊᑐᓕᖅᑎᑕᐅᕙᓪᓕᐊᓂᖓ ᔭᐃᒻᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᓂ ᐊᖏᕈᑎ, ᐊᒻᒪᓗ ᓴᐳᒻᒥᓂᖅ ᐊᒻᒪᓗ ᐊᑐᖅᑕᐅᔪᒪᓕᕐᑎᑦᑎᓂᖅ ᐃᓄᐃᑦ ᐃᓱᒪᖅᓱᕈᓐᓇᐅᑎᖓᓂᒃ ᐱᔪᓐᓇᐅᑎᓂᒃ ᐃᓗᐊᓂ ᐊᖏᕈᑎᑦ.
ᑖᒃᑯᐊᓗ ᐊᓯᖏᑦ ᓄᓇᖅᑲᖅᑳᖅᓯᒪᔪᑦ ᓯᕗᓕᐅᖅᑎᑦ, ᐱᓕᕆᐊᖃᓚᐅᖅᓯᒪᕗ ᐋᔩᖃᑎᒌᒍᑕᐅᓂᖓᓂᒃ ᐱᒋᐊᖅᐸᓪᓕᐊᑎᓪᓗᒍ 1982 ᓂᕈᐊᖅᓯᓂᖅ ᒐᕙᒪᖃᕐᓂᕐᒧᑦ ᑲᓇᑕᐅᑉ ᒪᓕᒐᕐᔪᐊᖓᓂ, ᐅᑯᐊᓗ ᐱᒋᐊᖅᑎᑦᑎᓯᒪᔪᑦ ᓄᓇᖅᑲᖅᑳᖅᓯᒪᔪᑦ ᐊᒻᒪᓗ ᐊᖏᕈᑎᑦᑎᒍᑦ ᐱᔪᓐᓇᐅᑎᓂᒃ ᑲᓇᑕᐅᑉ ᐳᖅᑐᓛᖓᓂ ᐃᖅᑲᖅᑐᐃᕕᒃ ᒪᓕᒐᖏᑦᑎᒍᑦ ᑲᓇᑕᒥ.
ᑭᖑᓂᐊᒍᑦ ᐃᓚᐅᓕᓚᐅᖅᑐᖅ ᐊᐅᓚᑦᓯᔨᑦ ᑲᑎᒪᔨᖏᓂ ᑖᒃᑯᐊ ᐃᓄᐃᑦ ᓯᓚᕐᔪᐊᖅ ᑲᔾᔨᐊᓂ ᑲᑎᒪᔨᑦ (ᒫᓐᓇ ᐃᓄᐃᑦ ᓯᓚᕐᔪᐊᒥ ᑲᔾᔨᐊᓂ ᑲᑐᔾᔨᖃᑎᒌᑦ), ᐅᑯᐊᓗ ᑲᑎᒪᔨᐅᕕᒋᒪᔭᖏᑦ ᒪᕐᕈᐃᖅᖢᓂ ᓂᕈᐊᖅᑕᐅᓪᓗᓂ ᐊᖓᔪᖅᑳᑉ ᐃᓂᖓᓄᑦ. ᐅᓇᑦᑕᐅᖅ ᑲᒥᓯᓇᐅᓚᐅᖅᑐᖅ ᓄᓇᕗᑦ ᐊᑐᓕᖅᑎᑕᐅᓂᖓᓄᑦ ᑲᒥᓯᓇᑦ ᐊᒻᒪᓗ ᐊᑐᐊᒐᕐᒧᑦ ᑐᑭᒧᐊᒃᑎᑦᑎᖃᑕᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑕ ᑲᒥᓯᓇᖓ ᓄᓇᖅᑲᖅᑳᖅᓯᒪᔪᑦ ᐱᔾᔪᑎᒋᓪᓗᒋᑦ.
ᑕᐃᑲᓂ 1994 ᑎᑭᓪᓗᒍ 2003, ᒥᐊᓕ ᓴᐃᒪᓐ ᐃᖅᑲᓇᐃᔮᖃᓚᐅᖅᑐᖅ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᐊᓄᑦ ᓯᓚᕐᔪᐊᖅ ᑲᔾᔨᐊᓂ ᐅᑭᐅᖅᑕᖅᑐᑦ, ᓯᕗᓪᓕᖅᐹᖅ ᐃᓄᒃ ᐃᖅᑲᓇᐃᔮᖃᖅᓯᒪᔪᖅ ᑭᒡᒐᖅᑐᖅᑎᒻᒪᕆᒃ ᓄᓇᐅᑉ ᐊᓯᐊᓄᑦ ᐃᖅᑲᓇᐃᔮᒥᒃ. ᑕᐃᔅᓱᒪᓂᐅᑎᓪᓗᒍ, ᐋᔩᖃᑎᒌᒍᑎᖃᓚᐅᖅᑐᖅ ᓴᕿᑕᐅᖁᓪᓗᒋᑦ ᐅᑭᐅᖅᑕᖅᑐᖅ ᑲᑎᒪᔨᖏᑦ. ᑕᐃᑲᓂ ᐱᔭᕇᕋᒥ, ᑲᑎᒪᔨᐅᕗᖅ ᑲᓇᑕᒥᐅᓄᑦ ᑭᒡᒐᖅᑐᖅᑎᒻᒪᕆᒃ ᑎᖕᒫᒃᒥ ᑕᐃᑲᖓᓂᑦ 1999 ᑎᑭᓪᓗᒍ 2001.
ᐱᒋᐊᕐᓂᖓᓂᑦ 2006, ᒥᐊᓕ ᓴᐃᒪᓐ ᐊᖓᔪᖅᑳᖑᓚᐅᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ. ᑕᐃᑲᓂ 2008, ᑖᒃᑯᐊ ᑲᓇᑕᐅᑉ ᒪᓕᒐᓕᐅᕐᕕᒃᔪᐊᖓᓂ, ᑭᐅᓯᓚᐅᖅᑐᖅ ᑭᒡᒐᖅᑐᖅᖢᒋᑦ ᐃᓄᐃᑦ ᒪᒥᐊᓐᓂᕐᒧᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ. ᐱᒋᐊᖅᑎᑦᑎᓯᒪᕗᖅ ᐅᑭᐅᖅᑕᖅᑐᒥ ᓄᑕᖃᑦ ᐊᒻᒪᓗ ᒪᒃᑯᒃᑐᑦ ᑐᓐᖓᕕᖓ ᐊᒻᒪᓗ, ᑎᑭᓪᓗᒍ 2014, ᐃᒡᓯᕙᐅᑕᐅᓚᐅᖅᑐᖅ ᑲᓇᑕ ᑲᑎᒪᔨᕋᓛᑦ ᐃᓄᖕᓂᒃ ᐃᓕᓴᐃᓂᕐᒧᑦ.
ᑕᐃᑲᓂ 2017, ᒥᓂᔅᑕᐅᕗᖅ ᑭᒡᒐᖅᑐᖅᑎᐅᓪᓗᓂ, ᒥᐊᓕ ᓴᐃᒪᓐ ᐅᓂᒃᑳᕐᒥᒃ ᑐᓂᓯᓚᐅᖅᑐᖅ ᒥᓂᔅᑕᖓᓄᑦ ᐃᓄᓕᕆᔨᑐᖃᒃᑯᑦ ᑕᒪᑐᒥᖓ ᐊᑐᖅᓯᖃᑎᒌᖕᓂᖅ ᐅᑭᐅᖅᑕᖅᑐᒥ ᓯᕗᓕᐅᖅᑎᐅᓂᒃᑯᑦ ᐋᕿᒃᓱᒪᔾᔪᑎᒋᓪᓗᒍ, ᐋᕿᒃᓱᐃᓂᖓ ᐃᓂᒃᓴᖏᓐᓂᒃ ᐱᒻᒪᕆᐅᔪᑦ ᐊᑐᐊᒐᑦ ᐊᒻᒪᓗ ᐱᓕᕆᑎᑦᑎᔾᔪᑕᐅᔪᑦ ᐃᑲᔪᖅᑐᑦ ᐅᑭᐅᖅᑕᖅᑐᒥ ᐊᒻᒪᓗ ᓄᓇᖃᖅᑐᓂᒃ.
ᐊᒥᓱᒃᑲᓃᑦ ᐊᓯᖏᓐᓄᑦ ᐃᓕᓴᕆᔭᐅᓯᒪᔾᔪᑎᖏᑦ, ᒥᐊᓕ ᓴᐃᒪᓐ ᐱᑎᑕᐅᓯᒪᕗᖅ ᑲᓇᑕᒥ ᐃᓕᓴᕆᔭᐅᔾᔪᑎᑖᖅᓯᒪᔪᖅ, ᐊᒻᒪᓗ ᐱᑎᑕᐅᓯᒪᔪᖅ ᑲᓇᑕᒥ ᐃᓕᓴᕆᔭᐅᔾᔪᑎᑖᖅᓯᒪᔪᖅ ᑯᐸᖕᒧᑦ. ᐅᓇ ᐃᓕᓴᕆᔭᐅᓯᒪᔪᖅ ᐊᑕᓂᐋᓗᒃ ᑭᒡᒐᖅᑐᖅᑎ ᑲᓇᑕᒧᑦ, ᒍᓗ ᐃᓕᓴᕆᔭᐅᔾᔪᑎ ᒍᓖᓐᓛᓐᑦ, ᑲᓇᑕᒥ ᓄᓇᖅᑲᖅᑳᖅᓯᒪᔪᑦ ᐱᔭᕇᖅᓯᓯᒪᔪᓄᑦ ᐃᓕᓴᕆᔭᐅᓪᓗᓂ ᑐᓂᔭᐅᓯᒪᔪᖅ, ᒍᓗ ᑲᓇᑕ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᑦ, ᐊᒻᒪᓗ ᓯᒫᓐᔅ ᐃᓕᓴᕆᔭᐅᔾᔪᑖᓂᒃ ᐱᓯᒪᔪᖅ.