Main Container

logo

ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᑦ ᐱᒋᐊᖅᑎᑦᑎᔪᑦ ᐱᒻᒪᕆᐅᔪᒥᒃ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᐃᑲᔪᖅᑕᐅᓂᖅᓴᐅᓂᐊᕐᓗᑎᒃ ᐃᓄᐃᑦ ᐃᖕᒥᖕᓂᒃ-ᖃᐅᔨᓂᕐᒧᑦ

Main Content

ᓯᕗᒻᒧᖕᓂᐊᕐᓗᒍ ᐋᖅᕿᖃᑎᒌᖕᓂᖅ, ᓴᙱᒃᑎᑎᓪᓗᒍ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖓᑦ, ᐊᒻᒪᓗ ᓴᖅᕿᑦᑎᓗᓂ ᐱᕈᖅᐸᓪᓕᐊᓂᖃᕈᖕᓇᕐᓂᖅᓴᐅᔪᒥᒃ ᐃᓄᐃᑦ ᓄᓇᖓᓂᑦ ᑐᑭᖃᖅᑐᒃᑯᑦ ᐱᓕᕆᖃᑎᒌᖕᓂᒃᑯᑦ, ᑲᓇᑕᒥᑦ ᒐᕙᒪᒃᑯᑦ ᐊᒻᒪᓗ ᐃᓄᐃᑦ ᓯᕗᓕᐅᖅᑎᐅᔪᑦ ᐱᓕᕆᖃᑎᒌᒃᓯᒪᔪᑦ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᑎᒍᑦ ᑕᐃᒪᙵᓂᑦ ᐊᑎᓕᐅᖅᑕᐅᖕᒪᑦ ᐃᓄᐃᑦ ᓄᓇᖓᓄᑦ ᐅᖃᕐᓂᕋᐅᑎ 2017-ᒥᑦ.

ᐅᑉᓗᒥ, ᐊᖏᔪᖅᑳᕐᔪᐊᖅ, ᔭᔅᑎᓐ ᑐᕉᑑ, ᐊᒻᒪᓗ ᐊᖏᔪᖅᖄᖅ ᓇᑖᓐ ᐅᐱᐊᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ, ᐃᓚᖃᖅᖢᑎᒃ ᒐᕙᒪᑐᖃᒃᑯᑦ ᒥᓂᔅᑕᐅᑎᖏᓐᓂᑦ ᐊᒻᒪᓗ ᓂᕈᐊᖅᑕᐅᓯᒪᔪᑦ ᓯᕗᓕᐅᖅᑎᓂᑦ ᐃᓄᕕᐊᓗᖕᓂᑦ ᑯᐊᐳᕇᓴᒃᑯᓐᓄᑦ, ᓄᓇᕗᑦ ᑐᙵᕕᒃᑯᓐᓄᑦ, ᒪᑭᕕᒃ ᑯᐊᐳᕇᓴᒃᑯᓐᓄᑦ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᑦ, ᐱᒋᐊᖅᑎᑦᑎᓚᐅᖅᑐᑦ ᓄᑖᒥᒃ, ᐱᒻᒪᕆᐅᔪᒥᒃ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᑲᑎᒪᑎᓪᓗᒋᑦ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᑦ. ᑖᒻᓇ ᓇᓗᓇᐃᖅᓯᔪᖅ ᓯᕗᓪᓕᖅᐹᖑᔪᒥᑦ ᑲᓇᑕᒥᑦ ᒐᕙᒪᒃᑯᑦ ᐱᕙᓪᓕᐊᖃᑎᖃᕐᒪᑕ ᖃᓕᕇᖓᔪᒥᒃ, ᑕᒪᐃᓐᓄᓗᒃᑖᖅ-ᒐᕙᒪᒃᑯᓐᓄᑦ ᐊᑐᐊᒐᕐᒥᑦ ᑕᐃᒪᓐᓇᐃᑦᑑᔪᒥᒃ.

ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐃᓕᑕᖅᓯᔪᖅ ᐃᓄᐃᑦ ᓄᓇᖓᑦ-ᒥᑦ - ᐊᖏᕐᕋᕆᔭᐅᔪᖅ ᐃᓄᖕᓄᑦ - ᐊᔾᔨᐅᖏᑦᑐᖅ ᓄᓇ, ᐱᖅᖁᓯᕆᔭᐅᔪᒃᑯᑦ, ᐊᒻᒪᓗ ᒐᕙᒪᓕᕆᓂᖃᖅᑐᑦ, ᐊᕙᓗᓯᒪᔪᖅ ᐃᓄᕕᐊᓗᖕᓂᑦ, ᓄᓇᕗᑦ, ᓄᓇᕕᒃ, ᐊᒻᒪᓗ ᓄᓇᑦᓯᐊᕗᒻᒥᑦ. ᐊᑐᐊᒐᖅ ᐃᓚᐅᑎᑦᑎᔪᖅ ᓄᓇᓕᕐᔪᐊᓂᑦ ᐃᓄᐃᑦ ᐊᖏᕐᕋᖃᕐᕕᒋᔭᖏᓐᓂᑦ. ᒪᓕᒃᑕᐅᔪᒃᓴᖅ ᐃᑲᔪᕐᓂᐊᖅᑐᖅ ᖃᓄᐃᖓᓂᐊᕐᓂᖓᓄᑦ, ᐱᕙᓪᓕᐊᔭᐅᓂᖓᓄᑦ, ᐊᒻᒪᓗ ᐱᓕᕆᐊᖑᓂᖏᑦ ᑕᒪᓗᒃᑖᕐᒥᒃ ᓄᑖᖑᔪᑦ ᐊᒻᒪᓗ ᓄᑖᙳᖅᑎᖅᓯᒪᔪᑦ ᒐᕙᒪᑐᖃᒃᑯᑦ ᐊᑐᐊᒐᖏᓐᓂᑦ, ᑐᕌᖓᔪᓂᑦ, ᐱᔨᑦᑎᕋᐅᑎᓂᒃ, ᐊᒻᒪᓗ ᐱᔭᒃᓴᐅᑕᐅᔪᓂᒃ ᐊᑐᖅᑐᑦ ᐃᓄᐃᑦ ᓄᓇᖓᓄᑦ ᐅᕝᕙᓘᓐᓃᑦ ᐃᑲᔪᐃᓂᖃᖅᑐᑦ ᐃᓄᖕᓂᑦ.

ᑐᕌᒐᖃᖅᖢᑎᒃ ᐃᑲᔪᖅᑐᐃᓂᕐᒥᒃ ᐊᔪᙱᓐᓂᐊᕐᓂᖓᓄᑦ ᐊᒻᒪᓗ ᐃᑲᔪᕐᓗᒋᑦ ᓄᓇᐅᑉ ᐊᒻᒪᓗ ᐃᓅᑉ ᖃᓄᐃᖏᑦᑎᐊᕐᓂᖓ ᐃᓄᐃᑦ ᓄᓇᖓᓂᑦ, ᑲᓇᑕᒥᑦ ᒐᕙᒪᒃᑯᑦ ᑕᓪᓕᒪᐃᑦ ᐅᑭᐅᓄᑦ $25 ᒥᓕᔭᓐᓂᒃ ᐃᑲᔪᕐᓂᐊᖅᑐᑦ ᐊᑐᓕᖅᑎᑕᐅᓂᖓᓄᑦ ᐃᓄᐃᑦ ᓄᓇᖓᓄᑦ ᐊᑐᐊᒐᖅ. ᐃᓚᐅᔪᖅ $20 ᒥᓕᔭᓐ ᐱᓕᕆᐊᕐᒧᑦ ᐱᒋᐊᓪᓚᒃᑎᓐᓂᐊᕐᓗᒍ ᐊᑐᐅᒐᕐᒥᒃ ᐊᑐᓕᖅᑎᑦᑎᓂᖅ ᐃᓄᐃᑦ ᓯᕗᓪᓕᖅᐸᐅᑎᔪᒪᔭᖏᓐᓄᑦ. ᑲᓇᑕᒥᑦ ᒐᕙᒪᒃᑯᑦ ᐊᒻᒪᓗ ᐃᓄᐃᑦ ᐱᓕᕆᖃᑎᒌᖏᓐᓇᕐᓂᐊᖅᑐᑦ ᐊᑐᓕᖅᑎᓐᓂᐊᕐᓗᒍ ᐊᑐᐊᒐᖅ ᖃᓄᖅᑑᕆᓂᒃᑯᑦ, ᑎᑯᓕᐊᖅᑕᐅᓯᒪᔪᒃᑯᑦ, ᐊᒻᒪᓗ ᑕᒪᐃᓐᓄᓗᒃᑖᖅ-ᒐᕙᒪᒃᑯᓐᓄᖓᔪᒃᑯᑦ ᐊᑐᕐᓗᑎᒃ.

ᑲᑎᒪᑎᓪᓗᒋᑦ, ᐊᖏᔪᖅᖄᕐᔪᐊᖅ, ᐊᖏᔪᖅᖄᖅ ᐅᐱᐊᑦ, ᐊᒻᒪᓗ ᑲᑎᒪᔨᐊᓛᓄᑦ ᐃᓚᒋᔭᐅᔪᑦ ᐅᖃᐅᓯᖃᓚᐅᕐᒥᔪᑦ ᑮᓇᐅᔭᖅᑑᑎᓕᐊᖑᓂᐊᖅᑐᒥᒃ 2022-ᒧᑦ ᐱᑖᖑᔪᑦ ᐊᒻᒪᓗ ᑲᑎᓐᓂᖃᖅᑐᓂᒃ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᓐᓄᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ, ᐱᓗᐊᖅᑐᒥᑦ ᓄᑖᑦ ᐱᑖᖑᓂᐊᖅᑐᓄᑦ $845 ᒥᓕᔭᓐ ᐅᑭᐅᑦ 7-ᓄᑦ ᐃᒡᓗᓕᕆᓂᕐᒧᑦ ᐃᑲᔫᑎ ᐃᓄᐃᑦ ᓄᓇᖓᓂᑦ. ᐃᓄᐃᑦ ᓯᕗᓕᐅᖅᑏᑦ ᐊᒻᒪᓗ ᒥᓂᔅᑕᐃᑦ ᐱᒋᐊᖅᑎᑦᑎᓚᐅᕐᒥᔪᑦ ᖃᑉᓯᐊᕐᔪᖕᓂᑦ ᓄᑖᓂᒃ ᓯᕗᓪᓕᖅᐸᐅᑎᔭᐅᓂᐊᖅᑐᓂᒃ, ᐃᓚᐅᑉᓗᑎᒃ ᓄᓇᕐᔪᐊᕐᒥᑦ ᐃᓄᖕᓄᑦ ᓯᕗᓪᓕᖅᐸᐅᑎᔭᐅᔪᒪᔪᑦ, ᖃᐅᔨᓴᐃᓂᖅ, ᕿᒥᕐᕈᓂᖅ, ᐊᒻᒪᓗ ᐃᓕᑦᑎᕙᓪᓕᐊᓂᖅ ᐊᒻᒪᓗ ᐱᔪᖕᓇᖅᑎᑦᑎᓂᖃᕐᓂᖅ, ᒥᐊᓂᖅᓯᓂᖃᕐᓂᖅ, ᐊᒻᒪᓗ ᒥᐊᓂᕆᔭᐅᓂᖅ.

ᐅᑉᓗᒥᐅᔪᖅ ᐱᒋᐊᖅᑎᑦᑎᓂᐅᑉ ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐱᒻᒪᕆᐅᔪᖅ ᐃᑲᔪᖅᑐᐃᓂᖅ ᐃᓄᐃᑦ ᐃᖕᒥᖕᓂᒃ-ᖃᐅᔨᓂᕐᒧᑦ ᐊᒻᒪᓗ ᑐᑭᖃᖅᑐᒃᑯᑦ, ᐃᓄᖕᓄᑦ-ᑲᒪᔭᐅᔪᒃᑯᑦ ᐋᖅᕿᒃᓯᖃᑦᑕᕐᓗᑎᒃ ᐊᔾᔨᐅᖏᑦᑐᑦ ᐱᔾᔪᑕᐅᔪᑦ ᐊᑐᖅᑕᐅᖃᑦᑕᖅᑐᑦ ᐃᓄᖕᓄᑦ. ᑲᓇᑕᒥᑦ ᒐᕙᒪᒃᑯᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐃᓅᔪᓂᒃ ᓯᕗᓕᐅᖅᑐᓂᒃ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᑎᒍᑦ ᓄᑖᙳᖅᑎᕐᓂᐊᕐᓗᒍ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᒌᖕᓂᖏᑦ ᐊᒻᒪᓗ ᓯᕗᒻᒧᒋᐊᕐᓗᑎᒃ ᐋᖅᕿᖃᑎᒌᖕᓂᒃᑯᑦ ᒪᓕᒡᓗᒋᑦ ᓇᓗᓇᐃᖅᓯᓃᑦ ᐱᔪᖕᓇᐅᑎᓂᒃ, ᐃᒃᐱᒍᓱᒡᕕᖃᕐᓂᖅ, ᐊᒻᒪᓗ ᐱᓕᕆᖃᑎᒌᖕᓂᖅ.

ᐅᖃᐅᓯᐅᔪᑦ

“ᐃᓄᐃᑦ ᐊᔾᔨᐅᖏᑦᑐᒥᒃ ᐱᔪᖕᓇᐅᑎᖃᖅᑐᑦ, ᐱᔪᒪᓂᖃᖅᑐᑦ, ᐊᒻᒪᓗ ᐊᑐᖅᓯᒪᓂᑯᖃᖅᑐᑦ. ᐅᑉᓗᒥᐅᔪᖅ ᐱᒋᐊᖅᑎᑦᑎᓂᐅᑉ ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐱᔪᖅ ᐊᒥᓱᓂᒃ ᐅᑭᐅᓂᒃ ᐱᓕᕆᖃᑎᒌᖕᓂᒃᑯᑦ ᐊᒻᒪᓗ ᐃᑲᔪᕐᓂᐊᖅᑐᖅ ᐃᓄᐃᑦ ᓯᕗᓪᓕᖅᐸᐅᑎᔪᒪᔭᖏᓐᓂᑦ ᐊᒻᒪᓗ ᓇᖕᒥᖕᓂᖅ-ᖃᐅᔨᓂᕐᒧᑦ ᐃᓚᒋᔭᐅᓗᑎᒃ ᒐᕙᒪᒃᑯᑦ ᑐᕌᖓᔪᖏᓐᓄᑦ, ᐊᑐᐊᒐᖏᓐᓄᑦ, ᐊᒻᒪᓗ ᐱᓕᕆᐊᒃᓴᖏᓐᓄᑦ ᓯᕗᒻᒧᒃᐸᓪᓕᐊᑎᓪᓗᒋᑦ. ᑖᒻᓇ ᐱᒻᒪᕆᐅᑉᓗᓂ ᐱᒋᐊᕐᓂᐅᔪᖅ ᐊᑯᓂᐅᔪᒥᑦ ᐋᖅᕿᖃᑎᒌᒃᐸᓪᓕᐊᓂᖃᖅᑎᓪᓗᒋᑦ ᐊᒻᒪᓗ ᑲᔪᓯᓂᐊᖅᑐᖅ ᐱᓕᕆᖃᑎᒌᖕᓂᖅ ᐊᑯᓂᐅᔪᒥᒃ ᐊᒻᒪᓗ ᑐᑭᖃᖅᑐᒃᑯᒃ ᐋᖅᕿᒃᓯᓂᕐᒧᑦ ᐱᔾᔪᑕᐅᔪᓂᒃ ᐊᑐᖅᑕᐅᖃᑦᑕᖅᑐᑦ ᓄᓇᓕᖕᓄᑦ ᐃᓄᐃᑦ ᓄᓇᖓᓂᑦ.”

ᑕᓕᖅᐱᒃᖠᖅ ᐅᐱᓐᓇᖅᑐᖅ ᔭᔅᑎᓐ ᑐᕉᑑ, ᐊᖏᔪᖅᖄᕐᔪᐊᖅ ᑲᓇᑕᒥᑦ

“ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐱᓕᕆᐊᕆᔭᐅᓯᒪᔪᖅ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᖏᓐᓄᑦ ᐊᒻᒪᓗ ᖁᕕᐊᓱᒃᑐᒍᑦ ᐱᙳᖅᐸᓪᓕᐊᓕᕐᒪᑦ. ᑖᒻᓇ ᐊᑐᐊᒐᖅ ᐃᓕᓯᔪᖅ ᐋᖅᕿᐅᒪᔪᒥᒃ ᐊᓯᐊᙳᖅᓯᓂᕐᒥᒃ ᐱᔭᕆᐊᖃᖅᑐᖅ ᒐᕙᒪᑐᖃᒃᑯᑦ ᐊᑑᑎᖃᖅᑐᒃᑯᑦ ᐅᐸᓗᐊᓂᐊᕐᓗᑎᒃ ᐱᔭᐅᔭᕆᐊᖃᖅᑐᓂᒃ ᐃᓄᖕᓄᑦ. ᐱᒻᒪᕆᐅᔪᒥᒃ ᐱᒋᐊᖅᑎᑦᑎᔪᖅ ᐃᓄᐃᑦ ᐃᖕᒥᖕᓂᒃ-ᖃᐅᔨᓂᕐᒧᑦ.”

ᐊᖏᔪᖅᖄᖅ ᓇᑖᓐ ᐅᐱᐊᑦ, ᐃᓄᐃᑦ ᑕᐱᕇᑦ ᑲᓇᑕᒥ

ᓱᓕᔪᑦ ᐱᔪᓂᒃ

  • ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᑎᑎᕋᖅᓯᒪᔪᑦ ᐊᑐᖅᑕᐅᔪᒥᒃ ᐋᖅᕿᐅᒪᓂᖓᓄᑦ ᐊᒻᒪᓗ ᓄᑖᙳᖅᑕᐅᓂᖏᓐᓄᑦ ᒐᕙᒪᑐᖃᒃᑯᑦ ᐊᑐᐊᒐᓗᒃᑖᖏᓂᑦ, ᑐᕌᖓᔪᑦ, ᐱᔨᑦᑎᕋᐅᑏᑦ, ᐊᒻᒪᓗ ᐱᓕᕆᐊᒃᓴᐃᑦ ᐊᑐᖅᑐᑦ ᐃᓄᐃᑦ ᓄᓇᖓᓄᑦ ᐅᕝᕙᓘᓐᓂᑦ ᐃᑲᔪᐃᔪᑦ ᐃᓄᖕᓂᑦ. ᐊᑐᖅᑕᐅᔪᖅ ᐱᐅᓯᒋᐊᖅᓯᓂᐊᖅᑐᖅ ᑎᑯᒧᐊᒃᓯᒪᓂᖅ ᐃᓄᐃᑦ ᓄᓇᖓᑦ ᐊᒻᒪᓗ ᐃᓚᐅᖃᑕᐅᑎᑕᐅᓂᖏᑦ ᐃᓄᐃᑦ ᑖᑉᑯᓇᓂ ᐱᕙᓪᓕᐊᓂᕐᓂᑦ.
  • ᖃᓄᐃᓕᐅᖅᑎᑦᑎᓂᕐᒧᑦ ᒪᓕᒐᖅ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᐃᓕᑕᕆᔭᐅᓂᖓ ᒐᕙᒪᑐᖃᒃᑯᑦ ᐱᑖᖅᑐᕐᓂᖏᑦ ᐃᓄᖕᓄᑦ ᐊᒻᒪᓗ ᐃᓄᐃᑦ ᓄᓇᖓᓄᑦ ᐱᒻᒪᕆᐅᔪᑦ ᐃᓚᒋᔭᐅᑉᓗᑎᒃ ᐱᔪᖕᓇᐅᑎᖏᓐᓄᑦ ᐃᓄᐃᑦ ᐃᖕᒥᖕᓂᒃ-ᖃᐅᔨᓂᕐᒧᑦ ᐊᒻᒪᓗ ᐃᖕᒥᖕᓂᒃ-ᒐᕙᒪᖃᕐᓂᕐᒧᑦ. ᐊᑐᐊᒐᑦ ᖃᓄᐃᓕᐅᖅᑎᑦᑎᔪᖅ ᒐᕙᒪᑐᖃᒃᑯᑦ ᐱᓕᕆᖃᑎᒌᖏᓐᓂᑦ ᐃᓱᒪᒋᔭᐅᓂᐊᕐᓗᑎᒃ ᐊᔾᔨᐅᖏᑦᑐᑦ ᐱᔪᖕᓇᐅᑏᑦ, ᐱᔪᒪᓂᕆᔭᐅᔪᑦ, ᐊᒻᒪᓗ ᖃᓄᐃᖓᓂᐅᔪᑦ ᐃᓄᖕᓄᑦ ᐊᑐᖃᑦᑕᖅᑕᖏᓐᓂᑦ ᑮᓇᐅᔭᖃᖅᑎᑕᐅᓂᐊᕐᓗᑎᒃ ᐃᓄᐃᑦ ᓄᓇᑖᖅᓯᒪᔪᑦ ᐱᓕᕆᖃᑎᒌᖑᔪᑦ.
  • ᐱᕙᓪᓕᐊᖃᑕᐅᓂᖅ ᐊᒻᒪᓗ ᐊᑐᓕᖅᑎᑕᐅᓂᖓ ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᓯᕗᓪᓕᖅᐸᐅᑎᔭᐅᓯᒪᔪᖅ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᓐᓄᑦ ᑕᐃᒪᙵᓂᑦ ᓇᑦᑎᐊᑦ (ᒫᑦᓯ) 2020-ᒥᑦ.
  • ᑲᑎᒪᔨᐊᓛᒃᑯᑦ ᒫᓐᓇᐅᔪᖅ ᓯᕗᓪᓕᖅᐸᐅᑎᓂᐊᖅᑕᖏᑦ ᐅᑯᐊᖑᔪᑦ:
    • ᐃᓄᐃᑦ ᓄᓇᑖᕐᓂᕐᒧᑦ ᐊᑐᓕᖅᑎᑦᑎᓂᖅ
    • ᐃᓄᒃᑎᑐᑦ ᐆᒻᒪᖅᑎᒃᑲᓐᓂᕐᓗᒍ, ᑲᒪᒋᓗᒍ, ᒥᐊᓂᕆᓗᒍ, ᐊᒻᒪᓗ ᐃᑲᔪᖅᑐᕐᓗᒍ
    • ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐃᓂᖃᕐᓂᖓ
    • ᐋᖅᕿᖃᑎᒌᖕᓂᕐᒨᖓᔪᑦ ᐊᒻᒪᓗ ᐱᓕᕆᐊᖑᔪᑦ ᐃᓱᓕᓐᓂᐊᕐᓗᒋᑦ ᐱᔾᔪᑕᐅᔪᑦ ᐊᓯᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᖄᖅᑐᑦ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ
    • ᐃᓕᓐᓂᐊᖅᑎᑦᑎᓂᖅ, ᐃᓕᓐᓂᐊᓕᓵᕐᓂᖅ, ᐊᒻᒪᓗ ᐊᔪᙱᓐᓂᖅᑖᕐᓂᕐᒧᑦ ᐱᕙᓪᓕᐊᓂᖅ
    • ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᖃᓄᐃᖏᑦᑎᐊᕐᓂᖅ
    • ᐊᕙᑎᕗᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ
    • ᐃᒡᓗᓕᕆᓂᖅ
    • ᐱᖁᑏᑦ
    • ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᖅ ᐊᒻᒪᓗ ᐱᑖᖅᑐᕐᓂᖅ
    • ᒪᓕᒐᐃᑦ ᓯᕗᓪᓕᖅᐸᐅᑎᔭᐅᔪᒪᔪᑦ
    • ᓄᓇᕐᔪᐊᕐᒥᑦ ᐃᓅᔪᑦ ᓯᕗᓪᓕᖅᐸᐅᑎᔭᐅᔪᒪᔪᑦ
    • ᖃᐅᔨᓴᐃᓂᖅ, ᕿᒥᕐᕈᓂᖅ, ᐊᒻᒪᓗ ᐃᓕᑦᑎᓂᖅ
    • ᐱᔪᖕᓇᖅᑎᑦᑎᓂᖃᕐᓂᖅ, ᒥᐊᓂᖅᓯᓂᖃᕐᓂᖅ, ᐊᒻᒪᓗ ᒥᐊᓂᕆᔭᐅᓂᖅ
  • ᐅᑉᓗᒥᐅᔪᖅ ᑐᓴᖅᑎᑦᑎᔾᔪᑕᐅᔪᖅ ᐱᓕᕆᐊᖃᖅᑐᖅ ᐱᓂᐊᕐᓂᕆᔭᐅᔪᑦ ᑎᑎᕋᖅᓯᒪᔪᑦ ᒥᓂᔅᑕ ᒐᕙᒪᑐᖃᒃᑯᑦ-ᓄᓇᖃᖅᖄᖅᑐᓕᕆᔨᒃᑯᓐᓄᑦ ᒫᒃ ᒥᓗ-ᑉ ᐱᔭᒃᓴᐅᑎᒧᑦ ᑎᑎᖅᖃᖓ ᐋᒡᔪᓕᕐᕕᒃ (ᑎᓯᐱᕆ) 2021-ᒥᑦ ᐱᓕᕆᖃᑎᒋᓂᐊᕐᓗᒋᑦ ᐃᓄᐃᑦ ᑭᖑᓪᓕᖅᐹᒃᑰᖓᓕᕐᓗᒍ ᐱᕙᓪᓕᐊᖃᑕᐅᓂᖓᓐᓂᑦ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᒃ ᐊᒻᒪᓗ ᐱᒋᐊᓪᓚᒃᑎᓪᓗᒍ ᐊᑐᓕᖅᑎᑕᐅᓂᖓ.
  • ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᑦ ᑲᑎᒪᔨᐊᓛᙳᖅᑎᑕᐅᓚᐅᖅᑐᑦ ᒪᓕᒃᖢᒍ ᐊᔾᔨᒌᒃᑯᑦ ᐱᓕᕆᖃᑎᒌᖕᓂᐊᕐᓗᑎᒃ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐱᒻᒪᕆᐅᖕᒪᑦ ᐋᖅᕿᖃᑎᒌᒍᑎᓕᕆᓂᕐᒧᑦ. ᑲᑎᒪᔨᐊᓛᑦ ᑲᑎᖃᑦᑕᖅᑐᑦ ᐱᖓᓱᐃᖅᑕᖅᖢᑎᒃ ᐅᑭᐅᑉ ᐃᓗᐊᓂᑦ. ᐊᑕᐅᓰᖅᖢᒍ ᐅᑭᐅᕐᒥᑦ, ᐃᒃᓯᕙᐅᑕᐅᖃᑕᐅᖃᑦᑕᖅᑐᑦ ᑲᓇᑕᒧᑦ ᐊᖏᔪᖅᖄᕐᔪᐊᖅ ᐊᒻᒪᓗ ᐊᖏᔪᖅᖄᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ.
  • ᑲᑎᒪᔨᐊᓛᓂᑦ ᐃᓚᐅᖕᒥᔪᑦ ᐃᓚᐅᖃᑕᐅᖏᓐᓇᖃᑦᑕᕐᓗᑎᒃ ᐊᖏᔪᖅᖄᖓᔪᑦ ᑲᓇᑕᒥᑦ ᐃᓄᐃᑦ ᐅᑭᐅᖅᑕᖅᑐᓗᒃᑖᕐᒥᑦ ᑲᑎᒪᔨᖏᑦ, ᑲᓇᑕᒥᑦ ᐃᓄᐃᑦ ᒪᒃᑯᒃᑐᐃᑦ ᑲᑎᒪᔨᖏᑦ, ᐊᒻᒪᓗ ᐸᐅᒃᑑᑎᒃᑯᑦ.
  • ᐃᓄᐃᑦ ᓄᓇᖓᑦ ᐃᓄᐃᑦ ᐊᖏᕐᕋᕆᔭᖓᑦ ᓄᓇᐅᔪᖅ ᑲᓇᑕᒥᑦ. ᐊᕙᓗᔭᐅᓯᒪᔪᖅ ᓄᓇᒥᑦ ᐃᒪᕐᒥᑦ, ᐊᒻᒪᓗ ᓯᑯᒥᑦ ᐃᓄᐃᑦ ᓄᓇᑖᖅᓯᒪᔭᖓ ᐃᓄᕕᐊᓗᖕᓂᑦ ᓄᓇᑦᑎᐊᕐᒥᑦ ᐊᒻᒪᓗ ᔫᑳᓐᒥᑦ, ᓄᓇᕗᑦ, ᓄᓇᕕᒃ ᐅᐊᖕᓇᖓᓂᑦ ᑯᐸᐃᒃ, ᐊᒻᒪᓗ ᓄᓇᑦᓯᐊᕗᑦ ᐅᐊᖕᓇᖓᓂᑦ ᓛᐸᑐᐊᒥᑦ.

ᐃᓚᒋᔭᐅᔪᑦ ᑕᐃᑯᙵᕈᑏᑦ