ᐊᑎᓕᐅᖅᑕᐅᖅᖄᖅᑎᓪᓗᒍ ᐃᓄᐃᑦ ᓄᓇᖓᑦ ᐅᖃᕐᓂᕋᐅᑎ 2017-ᒥᑦ, ᑲᓇᑕᒥᑦ ᒐᕙᒪᒃᑯᑦ ᐊᒻᒪᓗ ᐃᓄᐃᑦ ᓯᕗᓕᐅᖅᑎᖏᑦ ᐊᕐᕌᒍᑕᒫᒃᑯᑦ ᑲᑎᖃᑦᑕᖅᑐᑦ ᐊᒻᒪᓗ ᐱᓕᕆᖃᑎᒌᒃᖢᑎᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑎᒍᑦ ᓯᕗᒻᒧᒃᑎᓐᓂᐊᕐᓗᒋᑦ ᐊᑕᐅᑦᑎᒃᑯᑦ ᓯᕗᓪᓕᖅᐸᐅᑎᔪᒪᔭᕗᑦ, ᓴᙱᒃᑎᒋᐊᕐᓗᒋᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ, ᐊᒻᒪᓗ ᐱᕈᖅᐸᓪᓕᐊᓂᖃᑦᑎᐊᖅᑎᓪᓗᒍ ᐃᓄᐃᑦ ᓄᓇᖓᑦ.
ᐅᑉᓗᒥ, ᑲᑕᓇᐅᑉ ᐊᖏᔪᖅᖄᕐᔪᐊᖓ, ᔭᔅᑎᓐ ᑐᕉᑑ, ᐊᖏᔪᖄᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ, ᓇᑖᓐ ᐅᐱᐊᑦ, ᒐᕙᒪᑐᖃᒃᑯᑦ ᒥᓂᔅᑕᐅᑎᖏᑦ, ᐊᒻᒪᓗ ᓂᕈᐊᖅᑕᐅᓯᒪᔪᑦ ᐃᓄᐃᑦ ᓯᕗᓕᐅᖅᑎᖏᑦ ᐃᓄᕕᐊᓗᐃᑦ ᑯᐊᐳᕇᓴᒃᑯᓐᓂᑦ, ᓄᓇᕗᑦ ᑐᙵᕕᒃᑯᓐᓂᑦ, ᒪᑭᕝᕕᒃᑯᓐᓂᑦ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᓐᓂᑦ ᑲᑎᓚᐅᖅᑐᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᑲᑎᒪᑎᑦᑎᓂᖏᓐᓂᑦ ᓇᐃᓂ, ᓄᓇᑦᓯᐊᕗᑦ-ᒥᑦ (ᐅᐊᖕᓇᖅᐸᓯᖓᓂᑦ ᓛᐳᕋᑐᐊ).
ᑲᑎᒪᔨᐊᓛᑦ ᐱᒋᐊᖅᑎᑦᑎᓚᐅᖅᑐᑦ ᕿᒥᕐᕈᓂᕐᒧᑦ ᐅᓂᑉᑳᖓᓐᓂᒃ, ᐱᔾᔪᑎᖃᖅᖢᓂ ᓯᕗᓪᓕᖅᐹᑦ ᑕᓪᓕᒪᐃᑦ ᐅᑭᐅᖑᔪᓂᒃ ᐊᑐᓕᖅᑎᑕᐅᓂᖓ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ, ᐃᓚᐅᑉᓗᑎᒃ ᐱᐊᓂᑦᑎᐊᖅᓯᒪᓂᖏᑦ ᐊᒻᒪᓗ ᐊᒃᓱᕈᕐᓇᖅᑐᒃᑰᖅᓯᒪᓂᖏᑦ. ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᐃᑲᔪᖃᑦᑕᖅᑐᑦ ᐱᓕᕆᖃᑎᒌᖕᓂᕐᒥᒃ ᐊᒻᒪᓗ ᐊᓯᐊᙳᖅᓯᓂᕐᒧᑦ ᖃᓄᐃᓕᐅᕈᑎᖃᕐᓂᕐᒥᒃ ᐊᒃᑐᖅᓯᓂᐅᔪᓂᒃ ᐃᓄᖕᓂᑦ, ᐊᒻᒪᓗ ᓯᕗᒻᒧᒃᑎᓪᓗᒋᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ. ᐅᓂᑉᑳᖅ ᐋᖅᕿᒃᓯᖁᔨᔪᖅ ᐊᑐᖅᑕᐅᖔᕈᖕᓇᖅᑐᓂᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᐊᑐᖃᑦᑕᐃᓐᓇᕐᓂᐊᖅᑕᖏᓐᓂᒃ ᐊᒻᒪᓗ ᐱᓕᕆᔩᑦ ᐊᒥᓱᙳᕆᐊᕐᓂᐊᕐᓗᒋᑦ ᐊᒻᒪᓗ ᐊᐅᓚᑦᑎᓂᕐᒧᑦ ᐃᓂᓕᐅᕆᓗᑎᒃ ᐱᓕᕆᐊᕆᓂᐊᕐᓗᒋᑦ ᐱᓕᕆᐊᖏᑦ.
ᑲᑎᒪᑎᓪᓗᒋᑦ, ᑲᑕᓇᐅᑉ ᐊᖏᔪᖅᖄᕐᔪᐊᖓ, ᐊᖏᔪᖅᖄᖅ ᐅᐱᐊᑦ, ᐊᒻᒪᓗ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᓐᓄᑦ ᑲᑎᒪᔩᑦ ᐱᕙᓪᓕᐊᓂᖃᓚᐅᖅᑐᑦ ᖃᑉᓯᑲᓪᓚᖕᓂᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ, ᐃᓚᐅᑉᓗᑎᒃ ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᖃᓄᐃᖏᑦᑎᐊᕐᓂᖅ, ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᖅ, ᐃᓄᒃᑎᑐᑦ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᖅ, ᐱᔪᖕᓇᖅᑎᑦᑎᓂᖃᕐᓂᖅ, ᒥᐊᓂᖅᓯᓂᖅ, ᐊᒻᒪᓗ ᒥᐊᓂᕆᔭᐅᓂᖃᕐᓂᖅ. ᓯᕗᓕᐅᖅᑏᑦ ᐃᓚᓯᓚᐅᕐᒥᔪᑦ ᐊᖏᕐᕋᖃᙱᓐᓂᕐᒥᒃ ᓄᑖᖑᑉᓗᓂ ᓯᕗᓪᓕᖅᐸᐅᑎᔭᐅᔭᕆᐊᓕᒃ.
ᐅᑉᓗᒥ ᐅᖃᓪᓗᕆᒃᓴᐅᑎᓃᑦ ᐱᔾᔪᑎᖃᖅᑐᑦ ᐱᒻᒪᕆᐅᔪᒥᒃ ᓯᕗᒻᒧᒋᐊᕐᓂᕐᒥᒃ ᐃᑲᔪᕐᓗᒋᑦ ᐃᓄᐃᑦ ᐃᖕᒥᖕᓂᒃ-ᖃᐅᔨᔪᖕᓇᕐᓂᖏᓐᓂᒃ ᐊᒻᒪᓗ ᓯᕗᒻᒧᒃᑎᓪᓗᒋᑦ ᐊᑕᐅᑦᑎᒃᑯᑦ ᑐᕌᒐᕆᔭᐅᔪᖅ ᐋᖅᕿᒃᓯᓂᐊᕐᓗᑎᒃ ᐱᕈᖅᐸᓪᓕᐊᓂᖃᑦᑎᐊᕐᓂᖅᓴᐅᔪᒥᒃ ᐃᓄᐃᑦ ᓄᓇᖓᓂᑦ ᑐᑭᖃᖅᑐᒃᑯᑦ ᐱᓕᕆᖃᑎᒌᖕᓂᒃᑯᑦ. ᑲᓇᑕᒥᑦ ᒐᕙᒪᒃᑯᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᐃᓅᔪᓂᒃ ᓯᕗᓕᐅᖅᑐᓂᒃ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᑎᒍᑦ ᓄᑖᙳᖅᑎᕐᓂᐊᕐᓗᒍ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᒌᖕᓂᖏᑦ ᐊᒻᒪᓗ ᓯᕗᒻᒧᒋᐊᕐᓗᑎᒃ ᐋᖅᕿᖃᑎᒌᖕᓂᒃᑯᑦ ᒪᓕᒡᓗᒋᑦ ᓇᓗᓇᐃᖅᓯᓃᑦ ᐱᔪᖕᓇᐅᑎᓂᒃ, ᐃᒃᐱᒍᓱᒡᕕᖃᕐᓂᖅ, ᐊᒻᒪᓗ ᐱᓕᕆᖃᑎᒌᖕᓂᖅ.
ᐅᖃᐅᓯᐅᔪᑦ
“ᑕᒪᑉᑕᓗᒃᑖᖅ ᐃᖏᑦᑕᕌᖓᑉᑕ ᐊᒻᒪᓗ ᐱᓕᕆᖃᑎᒌᒃᖢᑕ, ᐱᐅᓛᓂᒃ ᖃᓄᐃᖓᓂᖃᖅᑎᑦᑎᖃᑦᑕᖅᑐᒍᑦ ᐱᔾᔪᑎᖃᖅᑐᓂᒃ ᐃᓄᖕᓄᑦ. ᐅᑉᓗᒥ, ᑕᐅᑐᒐᖃᖅᑐᒍᑦ ᓯᕗᓪᓕᖅᐸᐅᑎᔭᐅᔪᒪᔪᓂᒃ ᓲᕐᓗ ᐃᒡᓗᕐᔪᐊᓕᐅᒃᑲᓐᓂᕐᓗᑕ ᐊᒻᒪᓗ ᐱᐅᓯᒋᐊᕐᓗᒍ ᐋᓐᓂᐊᖃᖅᑕᐃᓕᒪᓂᕐᒥᒃ ᑲᒪᓂᖅ - ᐱᓗᐊᖅᑐᒥᑦ ᐅᖓᓯᒃᑐᒦᑦᑐᑦ ᓄᓇᓖᑦ. ᐊᑕᐅᑦᑎᒃᑯᑦ, ᐊᑯᓂᐅᔪᒥᑦ ᐃᑲᔪᐃᓂᖃᕐᓂᐊᖅᑐᒍᑦ ᐃᓄᐃᑦ ᐃᓅᓯᖏᓐᓂᑦ, ᐃᑲᔪᕐᓗᑕ ᐋᖅᕿᖃᑎᒌᖕᓂᕐᒥᒃ, ᐊᒻᒪᓗ ᓴᙱᒃᑎᑎᓪᓗᒋᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ ᒫᓐᓇᒧᑦ ᐊᒻᒪᓗ ᑭᖑᕚᖑᓂᐊᖅᑐᓄᑦ.”
“ᓯᕗᓪᓕᖅᐹᖅ ᕿᒥᕐᕈᓂᖅ ᐱᓕᕆᐊᖏᓐᓂᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᓇᓗᓇᐃᖅᓯᔪᖅ ᑕᒪᓐᓇ ᐱᕙᓪᓕᐊᓂᕐᒧᑦ ᐋᖅᕿᐅᒪᓂᐅᖕᒪᑦ ᐊᒻᒪᓗ ᓴᙱᔫᑉᓗᓂ ᐊᑐᖅᑕᐅᓂᖓ ᓯᕗᒻᒧᒃᑎᓐᓂᐊᕐᓗᒋᑦ ᐱᓕᕆᖃᑎᒋᓂᖅᐳᑦ ᒐᕙᒪᑐᖃᒃᑯᓐᓂᑦ. ᐅᑉᓗᒥ ᑲᑎᒪᓂᕆᔭᖏᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᓐᓄᑦ ᓯᕗᓕᐅᖅᑎᐅᔪᑦ ᐱᓗᐊᖅᑐᒥᑦ ᑐᑭᖃᖅᑐᖅ ᐅᕙᑉᑎᖕᓄᑦ ᑲᒪᒋᒐᑉᑎᒍᑦ ᑲᑎᒪᖃᑎᒌᖕᓂᖏᑦ ᑲᑕᓇᐅᑉ ᐊᖏᔪᖅᖄᕐᔪᐊᖓ ᐊᒻᒪᓗ ᒐᕙᒪᑐᖃᒃᑯᑦ ᒥᓂᔅᑕᖏᑦ ᐊᖏᕐᕋᕆᔭᒻᓂᑦ ᓇᐃᓂᒥᑦ. ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᑐᑭᓕᐅᕆᒃᑲᓐᓂᓚᐅᖅᑐᑦ ᐱᓕᕆᖃᑎᒌᖕᓂᕆᔭᖏᓐᓂᑦ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐊᒻᒪᓗ ᓂᕆᐅᒃᑐᒍᑦ ᐱᕙᓪᓕᐊᓂᖃᕐᓂᖅᓴᐅᔪᒥᒃ ᐱᓕᕆᐊᖃᑎᒌᖕᓂᐊᕐᓗᑕ.”
ᓱᓕᔪᑦ ᐱᔪᓂᒃ
- ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᐱᙳᓚᐅᖅᑐᑦ ᐊᑐᖅᑕᐅᔪᑎᒍᑦ ᐊᔾᔨᒌᒃᑐᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐱᒻᒪᕆᐅᖕᒪᑦ ᐋᖅᕿᖃᑎᒌᖕᓂᐊᕐᓗᓂ. ᑲᑎᒪᔨᐊᓛᑦ ᑲᑎᖃᑦᑕᖅᑐᑦ ᐱᖓᓱᐃᖅᑕᖅᖢᑎᒃ ᐅᑭᐅᑉ ᐃᓗᐊᓂᑦ. ᐊᑕᐅᓰᖅᖢᒍ ᐅᑭᐅᕐᒥᑦ, ᐃᒃᓯᕙᐅᑕᐅᖃᑕᐅᖃᑦᑕᖅᑐᑦ ᑲᓇᑕᒧᑦ ᐊᖏᔪᖅᖄᕐᔪᐊᖅ ᐊᒻᒪᓗ ᐊᖏᔪᖅᖄᖅ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ.
- ᑲᑎᒪᔨᐊᓛᓂᑦ ᐃᓚᐅᖕᒥᔪᑦ ᐃᓚᐅᖃᑕᐅᖏᓐᓇᖃᑦᑕᕐᓗᑎᒃ ᐊᖏᔪᖅᖄᖓᔪᑦ ᑲᓇᑕᒥᑦ ᐃᓄᐃᑦ ᐅᑭᐅᖅᑕᖅᑐᓗᒃᑖᕐᒥᑦ ᑲᑎᒪᔨᖏᑦ, ᑲᓇᑕᒥᑦ ᐃᓄᐃᑦ ᒪᒃᑯᒃᑐᐃᑦ ᑲᑎᒪᔨᖏᑦ, ᐊᒻᒪᓗ ᐸᐅᒃᑑᑎᒃᑯᑦ.
- ᐃᓚᐅᖃᑕᐅᖅᖃᐅᔪᑦ ᐅᑉᓗᒥ ᑲᑎᒪᓂᕐᒥᑦ ᐅᑯᐊᖑᔪᑦ:
- ᑲᑕᓇᐅᑉ ᐊᖏᔪᖅᖄᕐᔪᐊᖅ ᔭᔅᑎᓐ ᑐᕉᑑ,
- ᒫᒃ ᒥᓗᕐ, ᒥᓂᔅᑕ ᒐᕙᒪᑐᖃᒃᑯᑦ-ᓄᓇᖃᖅᖄᖅᑐᓂᒃ ᑲᒪᔨᒃᑯᓐᓄᑦ
- ᑖᓐ ᕙᓐᑖᓪ, ᒥᓂᔅᑕ ᐅᑭᐅᖅᑕᖅᑐᒥᑦ ᑲᒪᔨᒃᑯᓐᓄᑦ
- ᐹᑎ ᕼᐊᔾᔪ, ᒥᓂᔅᑕ ᓄᓇᖃᖅᖄᖅᑐᓂᒃ ᐱᔨᑦᑎᕋᐃᔨᒃᑯᓐᓄᑦ
- ᐆᒫᕐ ᐊᓪᒐᐳᕋ, ᒥᓂᔅᑕ ᐃᖏᕐᕋᔭᒃᑐᓕᕆᔨᒃᑯᓐᓄᑦ
- ᐊᒪᑦ ᕼᐃᐅᓴᓐ, ᒥᓂᔅᑕ ᐃᒡᓗᓕᕆᔨᒃᑯᓐᓄᑦ ᐊᒻᒪᓗ ᐊᔾᔨᒌᙱᑦᑑᑎᓄᑦ ᐊᒻᒪᓗ ᐃᓚᐅᖃᑕᐅᑎᑦᑎᓂᕐᒧᑦ
- ᒨᓇ ᕗᐊᕐᑎᐅᕐ, ᐊᖏᔪᖅᖄᖅ ᑮᓇᐅᔭᓕᕆᓂᕐᒧᑦ ᑲᑎᒪᔨᓄᑦ
- ᑕᐃᕕᑎ ᓚᒥᐊᑦᑎ, ᒥᓂᔅᑕ ᐃᖅᖃᖅᑐᐃᔪᓕᕆᔨᒃᑯᓐᓄᑦ ᐊᒻᒪᓗ ᑲᓇᑕᒥᑦ ᒪᓕᒐᓕᕆᔨᕐᔪᐊᕐᒧᑦ
- ᔪᐃᔅ ᒧᓕᐄ, ᒥᓂᔅᑕ ᐃᖃᓗᓕᕆᔨᒃᑯᑦ, ᐃᒪᕐᒥᐅᑕᓕᕆᔨᒃᑯᑦ ᐊᒻᒪᓗ ᑲᓇᑕᒥ ᓯᑯᓯᐅᖅᑏᑦ ᐅᒥᐊᕐᔪᐊᑦ
- ᑯᕆᔅ ᐱᑐᓪ, ᒪᓕᒐᓕᐅᕐᕕᔅᒧᐊᕐᒥᑦ ᑎᑎᕋᖅᑎᒋᔭᐅᔪᖅ ᒥᓂᔅᑕ ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯᓐᓄᑦ
- ᓇᑖᓐ ᐆᐸᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
- ᑐᐄᓐ ᓯᒥᑦ, ᐃᒃᓯᕙᐅᑕᖅ ᐊᒻᒪᓗ ᐊᖏᔪᖅᖄᖅ, ᐃᓄᕕᐊᓗᐃᑦ ᑯᐊᐳᕇᓴᒃᑯᓐᓄᑦ
- ᐊᓗᑭ ᑰᑦᑎᖅ, ᐊᖏᔪᖅᖄᖅ, ᓄᓇᕗᑦ ᑐᙵᕕᒃᑯᓐᓄᑦ
- ᔪᐋᓐᔅ ᓛᒻᐱ, ᐊᖏᔪᖅᖄᖅ, ᓄᓇᑦᓯᐊᕗᑦ
- ᓖᓴ ᖁᐱᕐᕈᐊᓗᒃ, ᐊᖏᔪᖅᖄᖅ, ᐃᓄᐃᑦ ᐅᑭᐅᖅᑕᖅᑐᓗᒃᑖᒥᑦ ᑲᑎᒪᔨᓄᑦ
- ᔨᐅᕆ ᓵᑉ, ᐊᖏᔪᖅᐋᖅ ᑲᓇᑕᒥᑦ ᐊᕐᓇᐃᑦ ᐸᐅᒃᑑᑎᒃᑯᓐᓄᑦ
- ᐳᕆᐊᔭᓐ ᐹᑎ, ᐊᖏᔪᖅᖄᖅ, ᓄᓇᖅᖃᑎᒌᑦ ᐃᓄᐃᑦ ᒪᒃᑯᒃᑐᓄᑦ ᑲᑎᒪᔨᓄᑦ
- ᐃᓄᐃᑦ ᓄᓇᖓᑦ ᐃᓄᐃᑦ ᐊᖏᕐᕋᕆᔭᖓᑦ ᓄᓇᐅᔪᖅ ᑲᓇᑕᒥᑦ. ᐊᕙᓗᔭᐅᓯᒪᔪᖅ ᓄᓇᒥᑦ ᐃᒪᕐᒥᑦ, ᐊᒻᒪᓗ ᓯᑯᒥᑦ ᐃᓄᐃᑦ ᓄᓇᑖᖅᓯᒪᔭᖓ ᐃᓄᕕᐊᓗᖕᓂᑦ ᓄᓇᑦᑎᐊᕐᒥᑦ ᐊᒻᒪᓗ ᔫᑳᓐᒥᑦ, ᓄᓇᕗᑦ, ᓄᓇᕕᒃ ᐅᐊᖕᓇᖓᓂᑦ ᑯᐸᐃᒃ, ᐊᒻᒪᓗ ᓄᓇᑦᓯᐊᕗᑦ ᐅᐊᖕᓇᖓᓂᑦ ᓛᐸᑐᐊᒥᑦ.
- ᐱᕙᓪᓕᐊᖃᑕᐅᓂᖅ ᐊᒻᒪᓗ ᐊᑐᓕᖅᑎᑕᐅᓂᖓ ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᓯᕗᓪᓕᖅᐸᐅᑎᔭᐅᓯᒪᔪᖅ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᒃᑯᓐᓄᑦ ᑕᐃᒪᙵᓂᑦ ᓇᑦᑎᐊᑦ (ᒫᑦᓯ) 2020-ᒥᑦ. ᐃᓄᐃᑦ ᓄᓇᖓᑦ ᐊᑐᐊᒐᖅ, ᐱᒋᐊᖅᑎᑕᐅᔪᖅ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᓯᕗᓕᐅᖅᑎᖏᓐᓄᑦ 2022-ᒥᑦ, ᓇᓗᓇᐃᖅᓯᔪᖅ ᓯᕗᓪᓕᖅᐹᒥᑦ ᑲᓇᑕᒥᑦ ᒐᕙᒪᒃᑯᑦ ᐱᕙᓪᓕᐊᖃᑕᐅᓯᒪᖕᒪᑕ ᐊᕙᓗᓯᒪᔪᒥᒃ, ᒐᕙᒪᒃᑯᑦ ᐃᓗᐃᑦᑑᖓᑉᓗᑎᒃ ᐊᑐᐊᒐᒥᑦ ᑕᐃᒪᓐᓇᐃᑦᑐᒧᑦ.
- ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᑎᑎᕋᖅᓯᒪᔪᑦ ᐊᑐᖅᑕᐅᔪᒥᒃ ᐋᖅᕿᐅᒪᓂᖓᓄᑦ ᐊᒻᒪᓗ ᓄᑖᙳᖅᑕᐅᓂᖏᓐᓄᑦ ᒐᕙᒪᑐᖃᒃᑯᑦ ᐊᑐᐊᒐᓗᒃᑖᖏᓂᑦ, ᑐᕌᖓᔪᑦ, ᐱᔨᑦᑎᕋᐅᑏᑦ, ᐊᒻᒪᓗ ᐱᓕᕆᐊᒃᓴᐃᑦ ᐊᑐᖅᑐᑦ ᐃᓄᐃᑦ ᓄᓇᖓᓄᑦ ᐅᕝᕙᓘᓐᓂᑦ ᐃᑲᔪᐃᔪᑦ ᐃᓄᖕᓂᑦ. ᐊᑐᖅᑕᐅᔪᖅ ᐱᐅᓯᒋᐊᖅᓯᓂᐊᖅᑐᖅ ᑎᑯᒧᐊᒃᓯᒪᓂᖅ ᐃᓄᐃᑦ ᓄᓇᖓᑦ ᐊᒻᒪᓗ ᐃᓚᐅᖃᑕᐅᑎᑕᐅᓂᖏᑦ ᐃᓄᐃᑦ ᑖᑉᑯᓇᓂ ᐱᕙᓪᓕᐊᓂᕐᓂᑦ.
- ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐃᓕᑕᖅᓯᔪᖅ ᐃᓄᐃᑦ ᓄᓇᖓᑦ-ᒥᑦ - ᐊᖏᕐᕋᕆᔭᐅᔪᖅ ᐃᓄᖕᓄᑦ - ᐊᔾᔨᐅᖏᑦᑐᖅ ᓄᓇ, ᐱᖅᖁᓯᕆᔭᐅᔪᒃᑯᑦ, ᐊᒻᒪᓗ ᒐᕙᒪᓕᕆᓂᖃᖅᑐᑦ, ᐊᕙᓗᓯᒪᔪᖅ ᐃᓄᕕᐊᓗᖕᓂᑦ, ᓄᓇᕗᑦ, ᓄᓇᕕᒃ, ᐊᒻᒪᓗ ᓄᓇᑦᓯᐊᕗᒻᒥᑦ.
- ᖃᓄᐃᓕᐅᖅᑎᑦᑎᓂᕐᒧᑦ ᒪᓕᒐᖅ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᐃᓕᑕᕆᔭᐅᓂᖓ ᒐᕙᒪᑐᖃᒃᑯᑦ ᐱᑖᖅᑐᕐᓂᖏᑦ ᐃᓄᖕᓄᑦ ᐊᒻᒪᓗ ᐃᓄᐃᑦ ᓄᓇᖓᓄᑦ ᐱᒻᒪᕆᐅᔪᑦ ᐃᓚᒋᔭᐅᑉᓗᑎᒃ ᐱᔪᖕᓇᐅᑎᖏᓐᓄᑦ ᐃᓄᐃᑦ ᐃᖕᒥᖕᓂᒃ-ᖃᐅᔨᓂᕐᒧᑦ ᐊᒻᒪᓗ ᐃᖕᒥᖕᓂᒃ-ᒐᕙᒪᖃᕐᓂᕐᒧᑦ. ᐊᑐᐊᒐᑦ ᖃᓄᐃᓕᐅᖅᑎᑦᑎᔪᖅ ᒐᕙᒪᑐᖃᒃᑯᑦ ᐱᓕᕆᖃᑎᒌᖏᓐᓂᑦ ᐃᓱᒪᒋᔭᐅᓂᐊᕐᓗᑎᒃ ᐊᔾᔨᐅᖏᑦᑐᑦ ᐱᔪᖕᓇᐅᑏᑦ, ᐱᔪᒪᓂᕆᔭᐅᔪᑦ, ᐊᒻᒪᓗ ᖃᓄᐃᖓᓂᐅᔪᑦ ᐃᓄᖕᓄᑦ ᐊᑐᖃᑦᑕᖅᑕᖏᓐᓂᑦ ᑮᓇᐅᔭᖃᖅᑎᑕᐅᓂᐊᕐᓗᑎᒃ ᐃᓄᐃᑦ ᓄᓇᑖᖅᓯᒪᔪᑦ ᐱᓕᕆᖃᑎᒌᖑᔪᑦ.
- ᑲᑎᒪᔨᐊᓛᒃᑯᑦ ᒫᓐᓇᐅᔪᖅ ᓯᕗᓪᓕᖅᐸᐅᑎᓂᐊᖅᑕᖏᑦ ᐅᑯᐊᖑᔪᑦ:
- ᐃᓄᐃᑦ ᓄᓇᑖᕐᓂᕐᒧᑦ ᐊᑐᓕᖅᑎᑦᑎᓂᖅ
- ᐃᓄᒃᑎᑐᑦ ᐆᒻᒪᖅᑎᒃᑲᓐᓂᕐᓗᒍ, ᑲᒪᒋᓗᒍ, ᒥᐊᓂᕆᓗᒍ, ᐊᒻᒪᓗ ᐃᑲᔪᖅᑐᕐᓗᒍ
- ᐃᓄᐃᑦ ᓄᓇᖓᓄᑦ ᐊᑐᐊᒐᖅ ᐃᓂᖃᕐᓂᖓ
- ᐋᖅᕿᖃᑎᒌᖕᓂᕐᒧᑦ ᐱᓕᕆᐊᖑᔪᑦ ᐊᒻᒪᓗ ᐊᓯᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᖄᖅᑐᑦ ᐊᕐᓇᓄᑦ ᐊᒻᒪᓗ ᓂᕕᐊᖅᓯᐊᓄᑦ;
- ᐃᓕᓐᓂᐊᖅᑎᑦᑎᓂᖅ, ᐃᓕᓐᓂᐊᓕᓵᕐᓂᖅ, ᐊᒻᒪᓗ ᐊᔪᙱᓐᓂᖅᑖᕐᓂᕐᒧᑦ ᐱᕙᓪᓕᐊᓂᖅ
- ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᖃᓄᐃᖏᑦᑎᐊᕐᓂᖅ
- ᐊᕙᑎᕗᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ
- ᐃᒡᓗᓕᕆᓂᖅ
- ᐱᖁᑏᑦ
- ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᖅ ᐊᒻᒪᓗ ᐱᑖᖅᑐᕐᓂᖅ
- ᒪᓕᒐᐃᑦ ᓯᕗᓪᓕᖅᐸᐅᑎᔭᐅᔪᒪᔪᑦ
- ᓄᓇᕐᔪᐊᕐᒥᑦ ᐃᓅᔪᑦ ᓯᕗᓪᓕᖅᐸᐅᑎᔭᐅᔪᒪᔪᑦ
- ᖃᐅᔨᓴᐃᓂᖅ, ᕿᒥᕐᕈᓂᖅ, ᐊᒻᒪᓗ ᐃᓕᑦᑎᓂᖅ
- ᐱᔪᖕᓇᖅᑎᑦᑎᓂᖃᕐᓂᖅ, ᒥᐊᓂᖅᓯᓂᖃᕐᓂᖅ, ᐊᒻᒪᓗ ᒥᐊᓂᕆᔭᐅᓂᖅ; ᐊᒻᒪᓗ
- ᐊᖏᕐᕋᖃᙱᓐᓂᖅ.
ᐃᓚᒋᔭᐅᔪᑦ ᑕᐃᑯᙵᕈᑏᑦ
- ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᐊᓛᒃᑯᑦ ᕿᒥᕐᕈᓂᖓᓐᓄᑦ ᐅᓂᑉᑳᖅ
- ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ ᐱᒋᐊᖅᑎᑦᑎᔪᖅ ᐱᒻᒪᕆᐅᔪᒥᒃ ᐃᓄᐃᑦ ᓄᓇᖓᑦ ᐊᑐᐊᒐᕐᒥᑦ ᐃᑲᔪᖅᑕᐅᑦᑎᐊᕐᓂᖅᓴᐅᔪᖕᓇᖁᑉᓗᒋᑦ ᐃᓄᐃᑦ ᐃᖕᒥᖕᓂᒃ-ᖃᐅᔨᔪᖕᓇᕐᓂᕐᒥᒃ
- ᑲᓇᑕᒥᑦ ᐊᖏᔪᖅᖄᕐᔪᐊᖅ ᐊᒻᒪᓗ ᐊᖏᔪᖅᖄᖅ ᐃᓄᐃᑦ ᑕᐱᕇᑦ ᑲᓇᑕᒃᑯᓐᓄᑦ ᑐᓴᖅᑎᑦᑎᔪᖅ ᐃᓄᐃᑦ-ᑲᓇᑕᐅᑉ ᒐᕙᒪᑐᖃᒃᑯᖏᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᐊᓛᖑᔪᓂᑦ
- ᐃᓄᐃᑦ ᓄᓇᖓᓂ ᓄᓇᙳᐊᖅ
- ᑮᓇᐅᔭᖅᑑᑎ 2023 - ᑲᓇᑕᒥᑦ ᓴᓇᔭᐅᑉᓗᓂ ᐸᕐᓇᐅᑎᐅᔪᖅ: ᓴᙱᔪᒥᒃ ᐃᓄᐃᑦ ᐃᓅᓯᖃᖅᑐᑦ ᕿᑎᐊᓃᖓᑉᓗᑎᒃ ᐊᑭᑐᓗᐊᖏᑦᑐᒥᒃ ᐱᕈᖅᐸᓪᓕᐊᓂᖃᕐᓂᖅ, ᖃᓄᐃᖏᑦᑎᐊᖅᑐᒥᒃ ᓯᕗᓂᒃᓴᖃᕐᓂᖅ