Ge-izhi-giimooji-giigidoyan, gabe-giizhik gabe-dibik omaa 1-866-925-4419, wenji-wiindamaading gegoo gaa-gii-shaabwiiwaad oniigii'igowaa' mii omaa ge-onji-mikaman ji-wiiji'iooyan aw Zhaaganaashii Ogimaa. Anishinaabeg, Eshkiimeg, Wiisakodewininiwag ge-izhi-giigidowaad 1-855-242-3310, wenji-maanendamowaad ampegish mino-ayaawing, maagizhaa da-aazhawaatebii'igewag ji-gaagiigidowaad www.hopeforwellness.ca.
Gichi-zhaaganaashii Ogimaa, Justin Trudeau, nooogom gii-dibaajimo Ge-izhi-mino-doodawindwaa Anishinaabeg:
“Mino-doodaadiwin bagaki-ozaawi-zhiibiigishkawayaanan izhi-giizhigak, Ningii-tazhindaamingaa-maanishkaagowaad ogo Anishinaabe, Eshkiimeg, Wiisaakodewininiwag omaa Zhaaganaashiiwakiing. Minjimendaagoziwag Abinoojiinyag Gaa-gii-kiiwesigwaa endaawaad. Ningichi-apiitenimaanaanig, gaa-gii-maazhidoodawindwaa. Nimbizidawaanaanig enaajimowaad, weweni ji-izhiwindwaa.
“Owe apii 1867 gaye 1996, gaa-makaanding abinoojiinyag onji-endaawaad 150,000 Anishinaabeg, Eshkiimeg, gaye Wiisaakodewininiwag giigichigowenaawag odinwewiniwaa gaye Anishinaabe izhitwaawin, gaye indaadiziwin. Niibiwa omaa gii-onji-wanishinoog Anishinaabe gikinoo'amaadiiwigamigong. Gaawiin aanji-ganawaabajigaadesinoon mino-doodaadiwin ji-nisidotamang mewinzha maazhichigewinan. Miiwan onowe weweni ji-nisidotaming maazhichigewinan owe noongom ezhinaagwak noogom.
“Zhaaganaashii Ogimaa oga-wiiji-bimosemaan ezhi-andone'igenid noojimowin, mii owe niigaanendamaang izhichigewin. Weweni ninga-wiidookaawaanaanik gaa-gii-wani'awasowaad, da-kinawaajichigaadewan jiibegamigong gaa-gii-aandakiiwaad abinoojiinyag. Mii owe apane ge-ani-dazhiikigaadeg ji-wiiji'indwaa Anishinaabeg Gaa-gii-makamindwaa Odizhitwaawiniwaa. Noomaya owe gii-tibaajimowag wii-miigiwe zhooniyaan awiya dash gii-ikidowag gaawiin gii-izhisesinoon mii owe wenji-mindimendaming gaa-gii-inkamigak gaawiin idash miinawaa dayinkamigasinoon.
“Noongom miinawaa ge-ani-giizhigakin, ji-minjimendaming gaa-izhi-maanikamigak gikinoo'amaadiiwigamigong, ji-oko-wiiji'idiyang ando-noojimo'ineyang gaye giikaanisinaanig ji-wiijitwaawaad, ji-gikendamowaad ezhi-ando-noojimong, gigishkan begaki-ozaawegakin shiibiigishkaawayaanan ji-minjimendamindwaa gaa-gii-aandakiiwaad. Daga minjimendandaa endaso-bezhigooyang ge-izhi-wiiji'iweyangoban – ge-onji-minaagwak gidakiiminaan – mino-doodaadwin.”