T’ą losı bets’edı horelɂı̨h de 24-hour dzı̨ne k’etł’a ba hoɂą chu boghedı hel Nąne hoɂa t’ą Dene xaré Kuę naraı̨dé bets’edı ha ɂeją ts’ęn yatı ha nanı̨le, 1-866-925-4419 ts’ęn, t’ą dene bets’ı̨ɂąne chu hudel bets’edı ha chu belot’ı̨ne ts’edı ha chu t’ąt’u bets’edı walı sı ha hųlı̨ ɂeją Canada nąne hoɂá k’oldé denededłı̨ne, Hotena, Begharek’ą dene kudąne bets’edı ha nųt’ą sı. Denededłı̨ne, Hotena chu Begharek’ą dene kudąne bets’edı walı hodorelɂı̨h de ba hoɂą sı Sughua ts’ena nı̨dé honı̨dhęn de ɂeją Sughua Ɂehena bets’ęn yatı ha hoɂą ɂeją ts’ęn nanı̨le 1-855-242-3310, huto ɂeją bets’ęn dųtł’ıs nı̨dhęn de hoɂą neba www.hopeforwellness.ca.

T'ą K’oldher Prime Minister, Justin Trudeau, dųhųn dzı̨ne k’e ɂedırı yatı nı̨ɂą nı̨ ɂedırı Nąne hoɂa Dzı̨ne nı̨t’ą Sughua hoɂą chu Sehenųt’a xa:

“Ku ɂedırı dzı̨ne k’é Nąne hoɂą Dzı̨ne nı̨t’ą Sughua chu Sehenųt’a xa, ku ɂeyı dzı̨ne Jıtthoghé lahot’ı̨ desısɂı̨h ɂahot’ı̨ dzı̨ne tth’ı́ hulyé, yunı̨ t’a Denededłı̨ne, Hotena, chu Begharek’ą dene bel due nodher nı̨sı ɂedırı dene xare kuę naraı̨dé t’a banahonı̨ hoɂą ɂeją naraıdé sı bel. T’anodher bedanaılnı̨ hoɂą t’ą bekuę nı̨del hılé sı. Ku t’ą dene hadaghı̨na bek’anota hoɂą, t’ą due haralya sı. T’aradı hodorıltth’ągh bel t’anodher nı̨sı ghą, chu beba ɂedırı daıltsı cho t’ąt’u bel sehenųt’a ha.

“Yunı̨ 1867 hots’ı̨ 1996 hots’ęn, t’ą k’oldé ɂedırı dene xaré kuę nı̨dathela nı̨ sekuı bekuę ch’ası narałtsı̨ k’asjęnę 150,000 hanełt’e Denededłı̨ne, Hotena chu Begharek’ą dene hots’ı̨, chu bekue ch’ası bech’alanı̨ye chu beyatıé ch’ası chu ɂedų ts’ęn danı̨dhęn nı̨. Ɂeyı hots’ı̨ łą nęnę due hudeł nı̨ t’aralya nı̨ t’a. Ku Sehenųt’a hadé yune honet’ı̨ hı ɂa selye haılé chu ɂeyı beneredı hı ɂa selyé haılé. Kulı t’anodher nı̨sı degharé net’ı̨ chu dųhų ts’ęn ɂeyı t’a nodher nı̨sı ɂa hoɂąsı.

“T’ą nąne hoɂa K’oldé Canada hots’ı̨ dene hel yunadhé hedel hodorelɂı̨h t’ąt’u sughuá nųt’a hots’ęn, ɂeyı ɂası ttheré nı̨lyé hodorelɂı̨h ɂeyı k’e ts’edel huk’e. Hotıe dene hel ɂası hok’enaıdé ha. Ku nuhnı̨ dene ts’eraıdı ha t’a dene ɂedırı t’a dolé nı̨sı horólɂa ɂeją dene xare dųe łeghadathedé nı̨sı hots’ı̨, t’ok’e nodher benahonı̨ ha nųt’a hel. Ku ɂedırı ɂası hıltsı ha k’ı́ ɂedırı yatı nedhe holı̨ nı̨ t’a ha T’a ɂası ɂełtth’ı́ chu t’ąt’u Sehenųt’a ha dene Ɂeła Deltth’ı ɂedırı yatı gharé ɂası hołé hoɂą k’e. K’anı̨ hudher, nuhnı̨ dene hel yaıt hılts’ı̨ nı̨ dene xa tsamba nı̨t’a ha nąnı̨ dene t’a dene xare kuę daızı dayałtı hotıe yenerenı̨ ha chu t’ą bel nodher nı̨sı benahonı̨ ha t’a due nodher nı̨sı hobası ɂeyı t’a t’a nodher nı̨sı k’e nothıdel ch’a.

“Dųhų dzı̨ne hots’ı̨ yunadhé hoɂá, Dene ɂeją Canada naradé sı, yunı̨ t’anodher nı̨sı bedanaı̨lnı̨ hoɂą ɂedırı dene xare kuę t’anodher nı̨sı t’a, ɂedırı Dzı̨ne benahónı̨ ha nųt’a bel ɂası k’enaıdé hoɂą Sughuá hoɂą chu Sehenųt’a xa t’ok’e ɂası nodhı́ hel, hotıe benerúdı ɂeją t’ą behonı̨ye sı, chu jıechogh lahot’ı̨ yu t’aghųt’ı̨ t’ą sekuı dadatheɂą chu łeghadathedé ha. Ɂeyı ɂa ɂeła bedanaı̨lnı̨ hoɂą bet’a yunadhé hųzų nı̨t’a ha horelyų dene beba ɂeją naraıdé sı ba – nı̨h k’e tth’ı hú - ɂası ɂełtth’ı́ chu sehenųt’a hobası.”