ᐃᖃᓗᐃᑦ, ᓄᓇᕗᑦ - March 8, 2019

ᐱᖃᓐᓇᕆᔭᒃᑲᐃ, ᖃᐅᔨᒪᓂᕐᒧᑦ ᓇᒦᓕᕐᒪᖔᑦᑕ, ᓇᒧᖓᑉᐸᓪᓕᐊᒻᒪᖔᑦᑕᓗ, ᖃᐅᔨᒪᖅᑳᕆᐊᖃᖅᑐᒍᑦ ᓇᑭᙶᖅᓯᒪᒻᒪᖔᑦᑕ.

ᐊᑐᖅᑕᐅᖃᑦᑕᖅᓯᒪᔪᓂᑦ ᖃᐅᔨᒪᑦᓯᐊᕆᐊᖃᖅᑐᒍᑦ.

ᐊᑦᓱᕈᓐᓇᖅᑐᑦ ᓱᓕᔪᑦ ᖃᐅᔨᒋᐊᖃᖅᑕᕗᑦ ᐊᑐᖅᑕᐅᓂᑰᔪᓂᑦ.

ᐊᑯᓂᓗᐊᕌᓗᒃ, ᒐᕙᒪᒃᑯᑦ ᖃᓄᐃᓕᐅᕐᓂᖏᑦ ᐃᓄᓐᓄᑦ ᐊᔾᔨᒌᑎᑦᓯᕙᓐᓇᑎᒃ, ᓈᒻᒪᙱᑦᑑᓪᓗᓂ, ᓇᓕᒧᒌᑦᑐᒥᑦ ᐱᑦᓯᐊᖅᑕᐅᒐᑎᒃ.

ᑲᓇᑕ ᐱᓕᕆᔪᒻᒪᕆᐅᑎᓪᓗᒍ ᐊᑐᓕᖅᑎᑦᓯᓇᓱᓐᓂᕐᒥᑦ ᔫᓇᐃᑕᑦ ᓇᐃᓴᓐ ᓄᓇᕐᔪᐊᓕᒫᒥᑦ ᓱᓕᓂᕋᐃᕈᑎᒥᒃ ᐃᓄᓕᒫᑦ ᐱᔪᓐᓇᐅᑎᖏᓐᓄᑦ, ᐃᓄᓐᓂᒃ ᐃᓄᐃᑦ ᓄᓇᖓᓂ ᐊᒻᒧᖅᑎᕆᓪᓗᑎᒃ, ᐃᓄᐃᑦ ᓇᓗᓇᐃᖅᑕᐅᕙᑦᓱᑎᒃ ᓈᓴᐅᑎᑎᒍᑦ ᐊᑎᕐᒥᒎᖏᑦᑐᖅ.

ᓱᕈᓰᑦ ᖃᓪᓗᓈᓃᑦᑐᑦ ᐅᐱᒋᔭᐅᕙᓪᓕᐊᑎᓪᓗᒋᑦ ᐊᐃᐲᓰᖏᓐᓂᒃ ᐃᓕᓐᓂᐊᕐᓂᖏᓐᓄᑦ, ᐃᓅᔪᑦ ᓱᕈᓰᑦ ᓱᐊᑦᑕᐅᖃᑦᑕᓚᐅᖅᑐᑦ ᐅᖃᐅᓯᕐᒥᓂᒃ ᐅᖃᓕᒪᑎᓪᓗᒋᑦ.

ᒐᕙᒪᒃᑯᑦ ᐊᑦᓱᕈᖅᑎᓪᓗᒋᑦ ᐊᑕᐅᓯᕐᒥᑦ ᐋᓐᓂᐊᖃᖅᑕᐃᓕᒪᑎᑦᓯᓕᕆᓂᕐᒥᑦ, ᐃᓄᐃᑦ ᓄᓇᓕᓐᓄᑦ ᐊᐅᓪᓛᖅᑎᑕᐅᕙᓪᓕᐊᓚᐅᖅᑐᑦ ᐋᓐᓂᐊᕐᓇᖅᑐᑦ ᐊᒻᒪ ᐊᐃᑦᑐᕐᓗᓐᓇᖅᑐᑦ ᓯᐊᒻᒪᑉᐸᓪᓕᐊᔪᒻᒪᕆᐅᓪᓗᑎᒃ.

ᐊᕐᕌᒍᑦ 70 ᐊᓂᒍᖅᓯᒪᓕᖅᑐᓂᑦ, ᐳᕙᓪᓗᓐᓇᖅᑐᖅ ᓯᐊᒻᒪᑉᐸᓪᓕᐊᔪᒻᒪᕆᐅᑎᓪᓗᒍ ᑲᓇᑕᓕᒫᒥᑦ, ᒐᕙᒪᒃᑯᑦ ᐃᓱᒪᓕᐅᕆᓚᐅᖅᑐᑦ ᖃᓪᓗᓈᓂᑦ ᒪᑐᐃᖅᓯᓪᓗᑎ ᓄᑖᓂᒃ ᐋᓐᓂᐊᕕᕋᓛᓂᑦ ᐊᒻᒪ ᐃᓕᓐᓂᐊᖅᑎᑦᓯᑦᓱᑎᒃ ᓘᑦᑖᓂᑦ ᐋᓐᓂᐊᓯᐅᖅᑎᓂᓪᓗ. ᑭᓯᐊᓂ ᐅᑭᐅᖅᑕᖅᑐᒥ, ᒐᕙᒪᒃᑯᑦ ᐱᓕᕆᓂᖓ ᐳᕙᓪᓗᓐᓇᖅᑐᒧᑦ ᐃᑉᐱᒍᓱᑦᑎᐊᕐᓂᕐᒨᓚᐅᙱᑦᑐᖅ ᐅᕝᕙᓘᓐᓃᑦ ᐸᖅᑭᑦᓯᐊᕐᓂᕐᒧᑦ, ᑭᓯᐊᓂ ᐊᕕᑦᑐᐃᓂᕐᒥᑦ ᐃᓚᒌᖑᔪᓂᑦ ᐊᒻᒪ ᐃᓱᒪᒋᔭᖃᓯᐅᑎᒐᑎ ᐃᓄᐃᑦ ᐱᔪᓐᓇᐅᑎᖏᓐᓂᒃ.

ᐊᐅᓚᑦᓯᓂᕐᓗᓐᓂᐅᓚᐅᖅᑐᖅ ᑕᐃᒪᐃᓕᐅᕈᑕᐅᒋᐊᖃᓚᐅᙱᑦᑐᖅ. ᑕᒻᒪᕐᓂᐅᓚᐅᖅᑐᖅ ᐊᒻᒪ ᐋᓐᓂᖅᓯᓚᐅᖅᑐᑦ ᐃᓄᓐᓂᒃ. ᖃᐅᔨᒪᔪᖓ ᐊᒥᓲᓪᓗᓯ ᑕᕝᕙᓃᖃᑕᐅᔪᓯ ᐅᓐᓄᓴᐅᔪᖅ ᐊᑦᑐᖅᑕᐅᓯᒪᔪᓯ ᑖᑦᓱᒧᖓ ᐊᑐᐊᒐᕐᒧᑦ, ᕿᑦᓵᖅᑐᓯ ᓱᓕ ᓇᓪᓕᒋᔭᑦᓯ ᑕᒫᓃᒍᓐᓃᕐᓂᖏᓐᓄᑦ.

ᐅᓪᓗᒥᐅᔪᖅ, ᑕᒫᓃᑦᑐᖓ ᒪᒥᐊᕈᒪᓪᓗᖓ ᒐᕙᒪᑐᖃᒃᑯᑦ ᐊᐅᓚᑦᓯᓂᕆᓚᐅᖅᑕᖏᓐᓂᒃ ᐳᕙᓪᓗᓐᓇᖅᑐᒥᑦ ᐅᑭᐅᖅᑕᖅᑐᒥᑦ 1940-ᖏᓐᓂᒃ 1960-ᖏᓐᓄᑦ.

ᐊᒥᓲᓪᓗᓯ ᖃᐅᔨᒪᑦᓯᐊᖅᑐᓯ ᑖᓐᓇ ᐊᑐᐊᒐᐅᔪᖅ ᖃᓄᐃᓕᖓᓚᐅᕐᒪᖔᖅ.

ᐊᖏᖅᑎᑕᐅᖅᑳᕌᑎᒃ, ᐃᓄᐃᑦ ᖃᐅᔨᓴᖅᑕᐅᖃᑦᑕᓚᐅᖅᑐᑦ. ᑭᓇᑐᐃᓐᓇᖅ ᐳᕙᓪᓗᓱᒋᔭᐅᔪᖅ ᐊᐅᓪᓚᖅᑎᑕᐅᖃᑦᑕᓚᐅᖅᑐᖅ ᓄᓇᓕᐸᐅᔭᕐᓄᑦ ᓲᕐᓗ ᕼᐋᒧᑕᓐᒧᑦ ᐊᒻᒪ ᐃᐊᑦᒪᓐᑕᓐᒧᑦ, ᑕᖅᑭᒐᓴᓐᓄᑦ ᐅᕝᕙᓘᓐᓃᑦ ᐊᕐᕌᒍᒐᓴᓐᓄᑦ ᐱᔪᓐᓃᖅᑎᑕᐅᓂᕐᒧᑦ ᐋᓐᓂᐊᕕᒻᒥ ᐃᓄᒃᑑᖅᑐᖃᕈᓐᓇᖏᑦᑐᓂ.

ᐊᑯᓂᐊᓗᒃ, ᐃᓄᐃᑦ ᐅᑉᐱᕈᓱᓐᓂᖃᓚᐅᖅᑐᑦ ᐅᒥᐊᕐᔪᐊᓕᐊᕈᕕᑦ ᑭᓴᑦᓯᒪᔪᒧᑦ, ᐊᖏᕐᕋᙱᓴᐃᓐᓇᑐᐃᓐᓇᕆᐊᖃᖅᑐᑎᑦ.

ᐃᓄᐃᑦ ᐊᒥᓱᑦ ᐱᕕᖃᖅᑎᑕᐅᓚᐅᙱᑦᑐᑦ ᐱᕙᒌᔭᓂᕐᒥᒃ ᐅᕝᕙᓘᓐᓃᑦ ᑕᕝᕙᐅᕗᑏᖅᓯᓂᕐᒥᒃ ᓇᓪᓕᒋᔭᖏᓐᓂᒃ. ᓱᕈᓰᑦ ᐊᒥᓱᑦ ᐊᖓᔪᖅᑳᖏᓐᓂᒃ ᕿᒪᑦᓯᑎᑕᐅᓚᐅᖅᑐᑦ, ᐃᓐᓇᐃᑦ ᐊᒥᓱᑦ ᐊᐅᓪᓚᖅᑎᑕᐅᓪᓗᑎᒃ ᐊᖏᕐᕋᖏᓐᓂᒃ.

ᑕᐅᓴᓐᑎᒐᓴᓐᓂᒃ ᑭᓛᒥᑕᓂᒃ ᐃᖏᕐᕋᓇᖅᐸᓚᐅᖅᑐᖅ, ᐅᒥᐊᕐᔪᐊᒃᑯᑦ, ᓄᓇᓯᐅᑎᑯᑖᒃᑯᑦ, ᐊᒻᒪ ᖃᖓᑕᓲᒃᑯᑦ – ᐃᖏᕐᕋᓇᖅᐸᓚᐅᖅᑐᖅ ᐅᓪᓗᓄᑦ ᐊᒥᓱᓄᑦ ᐅᕝᕙᓘᓐᓃᑦ ᐱᓇᓱᐊᕈᓯᕐᓄᑦ ᐊᒥᓱᓄᑦ. ᑕᐅᓄᖓᐅᔾᔭᐅᕙᓪᓕᐊᓪᓗᑎᒃ ᐃᓚᖏᑦ ᐃᓅᒍᓐᓃᖃᑦᑕᓚᐅᖅᑐᑦ.

ᐊᓈᓇᒋᔭᐅᔪᑦ ᐊᑖᑕᒋᔭᐅᔪᓪᓗ, ᐊᓂᒋᔭᐅᔪᑦ ᓇᔭᒋᔭᐅᔪᓪᓗ ᕿᒪᑦᑕᐅᔪᑦ ᐅᖃᐅᔾᔭᐅᖃᑦᑕᓚᐅᙱᑦᑐᑦ ᓇᓪᓕᒋᔭᖏᑦ ᓇᒧᑦ ᐊᐅᓪᓚᖅᑎᑕᐅᒻᒪᖔᑦ, ᐅᕝᕙᓘᓐᓃᑦ ᖃᓄᖅ ᐊᑯᓂᐅᑎᒋᔪᒥᑦ ᐊᐅᓪᓚᖅᓯᒪᓂᐊᕐᒪᖔᖅ. ᐃᓅᔪᓐᓃᖅᑐᖃᕋᐃᒻᒪᑦ ᐋᓐᓂᐊᕕᓕᐊᖅᑎᑕᐅᔪᒥᑦ, ᖃᓪᓗᓈᓂ ᓄᓇᒨᖅᑕᐅᖃᑦᑕᓚᐅᖅᑐᑦ. ᐃᓛᓐᓂᓚᐅᓱᖓ ᐃᓗᕕᐅᔪᑦ ᓇᓗᓇᐃᒃᑯᑕᖃᖅᑎᑕᐅᖃᑦᑕᔪᔪᑦ, ᐃᓛᓐᓂᓚᐅᓱᖓᑦᑕᐅᖅ ᐃᓚᒋᔭᐅᔪᑦ ᑐᓴᖅᑎᑕᐅᕙᔪᔪᑦ.

ᐃᓄᐃᑦ ᐊᖏᕐᕋᖅᑎᑕᐅᑎᓪᓗᒋᑦ, ᐅᑭᐅᒃᑯᑦ ᓄᓇᓕᖏᓐᓅᖅᑕᐅᒐᔪᖃᑦᑕᔪᔪᑦ – ᐅᖅᑰᔪᓂᒃ ᐅᑭᐅᖅᓯᐅᑎᓂᒃ ᐊᓐᓄᕌᖃᕋᑎᒃ ᐃᓚᒋᔭᖏᓪᓗ ᑐᓴᐅᒪᑎᑕᐅᙱᑦᓯᐊᖅᓱᑎ ᑎᑭᓐᓂᐊᕐᓂᖏᓐᓂᒃ.

ᑕᐃᒃᑯᐊ ᓱᕈᓰᑦ ᐅᑎᓚᐅᖅᑐᑦ, ᐃᓚᒋᔭᒥᓅᖃᑦᑕᓚᐅᖅᑐᑦ ᐳᐃᒍᖅᓯᒪᔭᒥᓂᒃ, ᐃᓄᑦᑎᑑᕈᓐᓇᐃᓪᓕᓪᓗᑎᒃ, ᓄᓇᖓᓗ ᐃᖅᑲᐅᒪᙱᑦᓯᐊᖅᓱᓂᐅᒃ.

ᑖᒃᑯᓇᓂ ᐊᕐᕌᒍᓂᑦ ᐃᓄᑑᓐᓇᓚᐅᖅᑐᖅ, ᓇᓗᓕᖅᓯᒪᓐᓇᓚᐅᖅᑐᖅ, ᐊᒻᒪ ᐋᓐᓂᕐᓇᓚᐅᖅᑐᖅ.

ᑭᓯᐊᓂ ᒐᕙᒪᒃᑯᑦ ᐊᐅᓚᑦᓯᓂᕆᔭᖓ ᐳᕙᓪᓗᓐᓇᖅᑐᒥᑦ ᐊᑕᐅᓯᐅᓪᓗᓂ ᐊᑐᐊᒐᕐᓘᑎᐅᓚᐅᙱᑦᑐᖅ − ᐃᓚᒋᑐᐃᓐᓇᓚᐅᖅᑕᖓ ᐊᖏᓂᖅᓴᒧᑦ ᓱᕋᐃᓂᕐᒧᑦ ᐊᐅᓚᑦᓯᓂᕐᓗᓐᓂᕐᒥᑦ.

ᐊᑐᖅᑕᐅᔪᑐᖃᐅᓚᐅᖅᑐᓂᒃ ᐋᕐᓗᑦᑐᖅ ᐊᐃᐱᓕᐅᓚᐅᖅᑑᑉ ᐅᖃᓗᕋᐅᔭᐅᑎᓕᐊᕆᓚᐅᖅᓯᒪᔭᖓ ᓇᓗᓇᐃᖅᓯᓚᐅᖅᓯᒪᔪᖅ, ᐅᖃᖅᓱᓂ “ᐊᐱᕆᓚᐅᙱᑦᑐᖓ ᐃᓕᓐᓂᐊᕈᒪᓪᓗᖓ ᑕᑯᓚᐅᖅᓯᒪᙱᑕᕐᓂᒃ ᐃᓕᖅᑯᓯᕐᒥᑦ ᑐᓴᓚᐅᖅᓯᒪᙱᑕᕐᓂᓪᓗ ᐅᖃᐅᓯᕐᒥᑦ.”

ᐃᓅᔪᑦ ᓱᕈᓰᑦ ᐊᐅᓪᓚᖅᑎᑕᐅᕙᓚᐅᖅᑐᑦ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐊᒻᒪ ᒐᕙᒪᑐᖃᒃᑯᑦ ᓇᔪᕐᕕᖏᓐᓄᑦ ᐊᑦᓱᕈᖅᑎᑕᐅᓪᓗᑎᒃ ᐃᓕᓐᓂᐊᕐᓂᕐᒧᑦ ᐅᖃᐅᓯᕐᒥᑦ ᑐᓴᓚᐅᖅᓯᒪᙱᑕᒥᓂᒃ. ᑲᒪᒋᔭᐅᑦᓯᐊᓚᐅᙱᑦᑐᑦ ᐊᒻᒪ ᐋᓐᓂᖅᓱᖅᑕᐅᕙᑦᓱᑎᒃ.

ᑭᓯᐊᓂ ᑕᐃᒫᒃ ᐊᐃᐱᓕᐅᑉ ᐅᖃᓗᕋᐅᔭᐅᑎᖓᓃᑦᑐᖅ, “ᖃᓄᐃᓕᖓᓕᕐᓂᕋ ᐃᒻᒥᓂ ᐊᐅᓚᓂᖃᓚᐅᖅᑐᖅ, ᓇᑭᙶᕋᔭᕐᒪᖔᕐᒪ ᑭᓲᓕᕋᔭᕐᒪᖔᕐᒪᓗ.” ᑭᓯᐊᓂ ᖃᓄᐃᓕᖓᓕᕐᓂᕋ ᐃᓱᒪᖅᓱᓚᐅᙱᑦᑐᖅ − ᒐᕙᒪᑐᖃᒃᑰᓚᐅᖅᑐᑦ.

ᒐᕙᒪᑐᖃᒃᑯᑦ ᐃᓱᒪᓕᐅᕆᓚᐅᖅᑐᑦ ᐃᓚᒌᖑᔪᑦ – ᐃᓚᒋᔭᓯ – ᐊᐅᓪᓚᖅᑎᑕᐅᒐᔭᖅᑐᑦ ᓄᓇᓕᕋᓛᖏᓐᓂᒃ. ᒐᕙᒪᑐᖃᒃᑯᑦ ᐃᓱᒪᓕᐅᕆᓚᐅᖅᑐᑦ ᐃᓄᐃᑦ ᓄᑦᑎᖅᑎᑕᐅᒐᔭᖅᑐᑦ ᐃᑲᔪᕐᓂᖃᖁᓪᓗᒋᑦ ᑲᓇᑕᐅᑉ ᓄᓇᖃᕐᓂᕋᐃᓂᖓᓂ ᖁᑦᓯᑦᑐᒥ.

ᖃᐅᔨᒪᔪᖓ ᐃᓄᐃᑦ ᐅᓪᓗᒥᐅᔪᖅ ᑕᕝᕙᓃᖃᑕᐅᔪᑦ – ᐃᓄᐃᑦ ᓄᓇᓕᒫᖓᓂᓗ – ᐊᑦᓱᕈᕐᓂᖃᖅᓯᒪᔪᑦ ᑖᒃᑯᓄᖓ ᐊᑐᐊᒐᕐᓄᑦ, ᐊᕐᕌᒍᒐᓴᓐᓄᑦ ᓄᓇᓕᓯ ᐊᒻᒪ ᐱᔪᓐᓇᐅᑎᓯ ᐃᑉᐱᒋᔭᐅᑦᓯᐊᙱᑎᓪᓗᒋᑦ.

ᑖᒃᑯᐊ ᐱᔾᔪᑎᒋᓪᓗᒋᑦ – ᓅᑕᐅᓚᐅᖅᓯᒪᔪᑦ, ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, ᐳᕙᓪᓗᓐᓇᖅᑐᒧᑦ ᐊᑐᐊᒐᐅᔪᖅ – ᑖᒃᑯᐊ ᐊᑕᐅᑦᓯᒃᑰᓚᐅᖅᑐᑦ, ᑖᒃᑯᓄᖓᑦᓴᐃᓐᓇᖅ ᐃᓄᓐᓄᑦ, ᐊᕐᕌᒍᓄᑦ ᐊᒥᓲᓗᐊᙱᒻᒪᕆᑦᑐᓄᑦ. ᑕᐃᒪᐃᓚᐅᖅᑐᑦ ᑕᐃᑲᓂᑦᓴᐃᓐᓇᖅ ᐊᕐᕌᒍᓂᑦ ᒐᕙᒪᒃᑯᑦ ᐃᓄᓐᓂᒃ ᓇᓗᓇᐃᒃᑯᑕᖅᑖᖅᑎᑦᓯᑎᓪᓗᒋᑦ ᓂᕕᖓᑕᕐᓂᒃ, ᐊᒻᒪᓗ ᐃᓚᒌᖑᔪᑦ ᕿᒻᒦᔭᖅᑕᐅᑎᓪᓗᒋᑦ ᐊᐅᓚᑦᓯᔨᓄᑦ.

ᑕᒪᓐᓇ ᑕᓗᕈᒃᑯᓇᖅᑐᖅ ᐊᑐᖅᓯᒪᔭᑦᑎᓐᓂᒃ.

ᖃᓄᐃᓕᖓᓕᕈᑕᐅᓯᒪᔪᑦ ᑖᒃᑯᐊ ᐱᔾᔪᑎᒋᓪᓗᒋᑦ ᖃᐅᔨᒪᑦᓯᐊᖅᑕᑎᑦ:

ᐃᓕᖅᑯᓯᕆᔭᐅᔪᖅ ᐊᒻᒪ ᐅᖃᐅᓯᖅ ᓱᕋᑦᑎᖅᑕᐅᓚᐅᖅᑑᒃ.

ᐃᓚᒌᖑᔪᑦ ᐃᓗᐃᑦᑑᓚᐅᖅᓯᒪᔪᓐᓃᖅᓱᑎᒃ.

ᐃᓅᓯᕆᔭᐅᔪᑦ ᓯᖁᒥᑕᐅᓚᐅᖅᑐᑦ ᐋᖅᑭᒐᑦᓴᐅᒍᓐᓃᖅᓱᑎᒃ.

ᑖᒃᑯᐊ ᑕᒻᒪᕐᓂᐅᔪᑦ ᐊᓯᐅᑐᐃᓐᓇᔾᔮᙱᑦᑐᑦ – ᑲᓇᑕ ᐱᓯᒪᑦᓰᓐᓇᕐᓂᐊᖅᑐᖅ ᐅᒡᒍᐊᖅᓯᒪᓂᕐᒥᑦ ᐊᒻᒪ ᑕᓗᕈᒃᑯᑎᓯᒪᓂᕐᒥᑦ.

ᐅᓪᓗᒥᐅᔪᖅ, ᑕᕝᕙᓃᑦᑐᖓ ᒪᒥᐊᕈᒪᓪᓗᖓ. ᒪᒥᐊᕈᒪᓪᓗᖓ ᒐᕙᒪᑐᖃᒃᑯᑦ ᐊᐅᓚᑦᓯᓂᕆᓚᐅᖅᑕᖓᓂ ᐳᕙᓪᓗᓐᓇᖅᑐᖅᑕᖃᕐᔪᐊᖅᑎᓪᓗᒍ 1940-ᖏᓐᓂᒃ 1960-ᖏᓐᓄᑦ.

ᑖᓐᓇ ᐊᑐᐊᒐᐅᔪᖅ ᐱᔮᕆᔭᐅᓚᐅᖅᑐᖅ – ᐊᑐᖅᑕᐅᒍᒪᓚᐅᖅᑐᖅ.

ᑲᔪᓯᑎᑕᐅᓚᐅᖅᑐᖅ ᑲᓇᑕᐅᑉ ᒐᕙᒪᖓ ᖃᐅᔨᒪᒐᓗᐊᖅᑎᓪᓗᒋᑦ ᐊᑦᓱᕉᑕᐅᓂᐊᕐᓂᖓᓂᒃ ᐃᓄᓐᓄᑦ ᐃᓚᒌᖑᔪᓄᑦ.

ᑲᔪᓯᑎᑕᐅᓚᐅᖅᑐᖅ ᓄᓇᓕᐅᑉ ᐱᐅᓂᖅᐹᒃᑯᑦ ᐊᑐᕆᐊᓕᖏᓐᓂᒃ ᐃᓱᒪᒋᔭᖃᖅᑳᕋᑎᒃ.

ᑕᐃᒃᑯᓄᖓ ᐃᓄᓐᓄᑦ ᖃᓪᓗᓈᓕᐊᖅᑎᑕᐅᓚᐅᖅᑐᓄᑦ − ᒪᒥᐊᑉᐳᒍᑦ. ᒪᒥᐊᑉᐳᒍᑦ ᐃᓚᒋᔭᑦᓯᓐᓂᒃ ᕿᒪᐃᒋᐊᖃᓚᐅᕋᑦᓯ, ᑕᑯᑦᓴᐅᑎᑦᓯᓚᐅᙱᓐᓇᑦᑕ ᐃᑉᐱᒍᓱᑦᓯᐊᕐᓂᕐᒥᑦ ᐃᓕᓐᓂᒃ ᐊᒻᒪ ᐸᖅᑭᑦᓯᐊᓂᕐᒥᑦ ᑲᒪᒋᔭᐅᑦᓯᐊᕆᐊᖃᕋᓗᐊᖅᑎᓪᓗᑎᑦ. ᒪᒥᐊᑉᐳᒍᑦ ᐋᓐᓂᖅᓯᒪᓂᕆᔭᓐᓄᑦ.

ᑕᐃᒃᑯᓄᖓ ᐃᓄᓐᓄᑦ ᐃᓚᒋᔭᖏᓐᓄᑦ ᐊᐅᓪᓚᖅᑎᑕᐅᓚᐅᖅᑐᓄᑦ – ᒪᒥᐊᑉᐳᒍᑦ. ᒪᒥᐊᑉᐳᒍᑦ ᓱᕋᐃᓚᐅᕋᑦᑕ ᐱᒻᒪᕆᐅᓂᖅᐹᖑᔪᒥᑦ – ᐊᖏᕐᕋᐅᑉ ᓇᓪᓕᓐᓂᖓᓂ.

ᑕᐃᒃᑯᓄᖓ ᐃᓄᓐᓄᑦ ᖃᐅᔨᒪᙱᑦᑐᓄᑦ ᓱᓕ ᕿᑐᕐᖓᓯᑦ, ᐊᓈᓇᓯ, ᐊᑖᑕᓯ ᖃᓄᐃᓚᐅᕐᒪᖔᑦᑕ − ᒪᒥᐊᑉᐳᒍᑦ.

ᑕᐃᒃᑯᓄᖓ ᓄᓇᓕᐅᔪᓄᑦ ᐊᑦᓱᕉᑎᖃᖅᑐᓄᑦ ᑖᑦᓱᒧᖓ ᐊᑐᐊᒐᕐᒧᑦ ᐊᓯᖏᓐᓄᓪᓗ – ᒪᒥᐊᑉᐳᒍᑦ. ᒪᒥᐊᑉᐳᒍᑦ ᑕᒻᒪᕐᓂᕆᓚᐅᖅᑕᕗᑦ ᐱᔾᔪᑎᒋᓪᓗᒋᑦ ᐃᓄᐃᑦ ᐃᓄᒋᐊᖑᔪᑦ ᑕᑎᖃᕈᓐᓇᙱᑦᑐᑦ ᐋᓐᓂᐊᖃᖅᑕᐃᓕᒪᓕᕆᓂᕐᒥᑦ, ᑕᐃᒪᐃᓐᓂᖏᓐᓄᑦ ᐃᑲᔪᖅᑕᐅᔭᕆᐊᖃᖅᑎᓪᓗᒋᑦ ᐃᑲᔪᖅᑕᐅᔪᓐᓇᐃᓪᓕᓲᑦ.

ᒪᒥᐊᑉᐳᒍᑦ ᐊᐅᓚᑦᓯᓂᕐᓗᓐᓂᕐᒥᑦ ᐃᓱᒪᖃᓚᐅᖅᓯᒪᓂᖏᓐᓂᒃ ᒐᕙᒪᑐᖃᒃᑯᑦ ᐱᓕᕆᐊᕆᔭᖏᓐᓄᑦ. ᒐᕙᒪᒃᑯᑦ ᒪᒥᐊᖅᓯᒪᓕᖅᑐᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᒻᒪ ᐃᓄᓐᓄᑦ ᓅᑕᐅᓚᐅᖅᓯᒪᔪᓄᑦ. ᑭᓯᐊᓂ ᐊᑦᓱᕈᕐᓇᕐᔪᐊᕐᓂᐅᔪᖅ, ᓯᕗᓪᓕᕆᔭᐅᔪᓂᒃ ᑭᖑᕚᕆᔭᐅᔪᓄᑦ, ᑕᐃᒪᐃᓕᖓᐃᓐᓇᖅᑐᖅ ᐃᑎᔫᓪᓗᓂᓗ.

ᒫᓐᓇᐅᓕᖅᑐᖅ ᖃᐅᔨᒪᓕᖅᑐᒍᑦ ᖃᓄᐃᓕᐅᕐᓂᕆᓚᐅᖅᑕᕗᑦ ᑕᒻᒪᖅᓯᒪᓚᐅᖅᑐᖅ. ᒫᓐᓇᐅᓕᖅᑐᖅ ᖃᐅᔨᒪᓕᖅᑐᒍᑦ ᖃᓄᐃᓕᐅᕆᐊᖃᓕᖅᑐᒍᑦ ᐋᖅᑭᒋᐊᖁᓪᓗᒍ.

ᐊᕐᕌᒍᒐᓵᓗᓐᓄᑦ ᐅᑕᖅᑭᑎᑦᓯᒋᐊᖃᓚᐅᙱᒃᑲᓗᐊᖅᑐᒍᑦ ᑕᐃᒫᒃ ᐃᓕᑦᓯᓐᓂᒃ ᑐᓴᖅᑎᑦᓯᓂᕐᒥᑦ. ᒪᒥᐊᑉᐳᒍᑦ ᑕᒪᓐᓇ ᐊᑦᓱᕈᓐᓇᖅᑐᖅ ᐊᑯᓂᓗᐊᕌᓗᒃ ᐱᓯᒪᓕᕋᑦᓯᐅᒃ. ᒪᒥᐊᑉᐳᒍᑦ ᐅᑕᖅᑭᓚᐅᕐᓂᑦᑎᓐᓄᑦ, ᐊᒥᓱᐊᓗᐃᑦ ᑖᑦᓱᒥᖓ ᒪᒥᐊᓐᓂᐅᔪᒥᑦ ᑐᓴᓚᐅᖅᓯᒪᔾᔮᙱᑦᑐᑦ.

ᐅᓪᓗᒥᐅᔪᖅ, ᑎᒍᒥᐊᓕᖅᑕᕗᑦ ᐋᓐᓂᕈᑕᐅᓚᐅᖅᑐᑦ ᐊᑐᐊᒐᕐᓄᑦ ᐊᒻᒪ ᖃᓄᐃᓕᐅᕈᑕᐅᓚᐅᖅᑐᓂᑦ ᒐᕙᒪᑐᖃᒃᑯᓐᓄᑦ. ᐃᓄᐃᑦ ᐊᑭᕋᖅᑐᖅᑕᐅᓂᖏᑦ ᓇᕐᕈᒋᔭᐅᓂᖏᓪᓗ, ᑕᐃᒪᐃᓚᐅᖅᐳᖅ, ᑕᐃᒪᐃᖏᓐᓇᕐᓂᐊᖅᓱᓂᓗ, ᓈᒻᒪᒋᔭᐅᙱᑦᓯᐊᖅᑐᖅ.

ᒪᒥᐊᓐᓂᑐᐊᖅ ᓈᒻᒪᙱᓚᖅ. ᓱᓕᓂᕋᐃᒋᐊᖃᖅᑐᒍᑦ ᐋᖅᑭᒋᐊᖅᓯᓗᑕ.

ᓄᓇᓕᕐᔪᐊᖑᓪᓗᑕ ᐊᓯᔾᔩᒍᓐᓇᙱᑦᑐᒍᑦ ᐊᓂᒍᖅᓯᒪᔭᕇᖅᑐᓂᑦ, ᑭᓯᐊᓂ ᓂᕈᐊᕈᓐᓇᖅᑐᒍᑦ ᑭᖑᓪᓕᕐᒥᑦ ᖃᓄᐃᓕᐅᕐᓂᐊᓕᕐᒪᖔᑦᑕ.

ᐅᓪᓗᒥᐅᔪᖅ, ᓴᖅᑭᑎᑦᓯᒍᒪᔪᒍᑦ ᓯᕗᓂᑦᓴᑦᑎᐊᕙᒻᒥᒃ. ᓯᕗᓂᑦᓴᒥᑦ ᐃᑉᐱᒍᓱᑦᓯᐊᕐᓂᒃᑯᑦ ᐊᒻᒪ ᑲᑐᔾᔨᖃᑎᒌᓂᒃᑯᑦ.

ᑲᓇᑕᒧᑦ ᐊᖓᔪᖅᑳᕐᔪᐊᕆᔭᐅᓪᓗᖓ, ᐊᖏᖅᓯᒪᓪᓚᕆᑦᑐᖓ ᐃᓅᖃᑎᒌᑦᓯᐊᓕᖁᓪᓗᒋᑦ ᑲᓇᑕᐅᑉ ᒐᕙᒪᖓ ᐃᓄᐃᓪᓗ. ᐱᓕᕆᖃᑎᒌᑦᓯᐊᕐᓂᕐᒥᑦ ᐋᖅᑭᒋᐊᖅᓯᓂᕐᒥᑦ ᐊᖓᔪᖅᑲᐅᑎᖃᕐᓂᕐᓗᓐᓂᐅᓚᐅᖅᑐᒧᑦ ᐊᒻᒪ ᐊᐅᓚᑦᓯᓂᕐᓗᓐᓂᐅᓚᐅᖅᑐᒧᑦ ᐃᓕᑦᓯ ᓄᓇᓕᖏᓐᓂᒃ. ᑲᔪᓯᓂᖃᑦᓯᐊᕐᓂᕐᒥᑦ ᐊᖅᑯᑎᑦᓴᑎᓐᓂᒃ ᓴᐃᒻᒪᖃᑎᒌᓐᓂᕐᒧᑦ.

ᐊᖅᑯᑎᑦᓴᑯᑖᖑᓚᖓᔪᖅ, ᑭᓯᐊᓂ ᐊᓪᓗᕆᐊᖃᑎᒌᓗᑕ.

ᐋᖅᑭᒋᐊᖅᓯᖏᒃᑯᑦᑕ ᑭᖑᓂᑦᑎᓐᓂᒃ ᑕᒻᒪᕐᓂᐅᔪᓂᒃ, ᓯᕗᒧᐊᕈᓐᓇᔾᔮᙱᑦᑐᒍᑦ.

ᐅᓪᓗᒥᐅᔪᖅ, ᒐᕙᒪᑐᖃᒃᑯᑦ ᓴᖅᑮᕐᖓᐅᑎᔪᑦ ᑖᑦᓱᒥᖓ ᓇᓂᓚᕗᑦ ᐱᓕᕆᐊᖑᔪᒥᑦ, ᑲᑐᔾᔨᖃᑎᒌᓐᓂᒃᑯᑦ ᐃᓄᓐᓂᒃ, ᐊᒻᒪ ᑮᓇᐅᔭᕐᓂᒃ ᐊᑐᐃᓐᓇᐅᑎᑦᓯᓂᕐᒧᑦ ᐃᑲᔪᖅᓱᓂᕐᒧᑦ ᐱᓕᕆᐊᕆᔭᐅᓛᖅᑐᓄᑦ.

ᐃᓄᒃᑎᑐᑦ, ᓇᓂᓚᕗᑦ ᑐᑭᖃᖅᑐᖅ “let’s find them”, ᑖᓐᓇ ᐱᓕᕆᐊᖑᔪᖅ ᑖᑦᓱᒧᖓ ᑐᕌᖓᔪᖅ – ᓇᓂᓯᓂᕐᒥᑦ ᐊᒻᒪ ᐅᐱᒍᓱᓐᓂᕐᒥᑦ ᐃᓄᓐᓂᒃ ᐊᓯᐅᔨᔭᐅᓚᐅᖅᑐᓂᒃ ᐳᕙᓪᓗᓐᓇᖅᑐᖅᑕᖃᕐᔪᐊᖅᑎᓪᓗᒍ, ᐊᒻᒪ ᒪᒥᓴᕐᓂᕐᒥᑦ ᐊᓂᒍᐃᑎᑦᓯᓂᕐᒥᓪᓗ ᑭᒃᑯᓕᒫᓄᑦ ᕿᒪᑦᑕᐅᓯᒪᔪᓄᑦ.

ᐃᓱᒪᙳᐊᕈᓐᓇᖏᑦᑐᖓᓘᓐᓃᑦ ᖃᓄᐃᒃᑲᔭᕐᒪᖔᖅ ᓇᓪᓕᒋᔭᓐᓂᒃ ᐊᓯᐅᔨᓯᒪᓗᓂ, ᖃᐅᔨᓚᐅᖅᓯᒪᖏᓪᓗᓂᓗ ᓱᓚᐅᖅᓯᒪᒻᒪᖔᖅ.

ᑕᕝᕘᓇ ᐱᓕᕆᐊᖑᔪᒃᑯᑦ, ᐃᓄᐃᑦ ᐊᑐᐃᓐᓇᖃᕐᕕᐅᒐᔭᖅᑐᑦ ᑐᑭᓯᒋᐊᕈᑎᓂᑦ ᐃᓚᒋᔭᖏᑦ ᖃᓄᐃᓐᓂᕐᒪᖔᑦᑕ, ᑮᓇᐅᔭᕐᓂᓪᓗ ᐊᑐᐃᓐᓇᐅᑎᑦᓯᔪᒍᑦ ᑎᓴᒪᓄᑦ ᐊᕕᑦᑐᖅᓯᒪᔪᓄᑦ ᓄᓇᑖᖅᓯᒪᔪᓄᑦ ᑲᑐᔾᔨᖃᑎᒌᖑᔪᓄᑦ ᐃᑲᔪᖅᓱᓂᕐᒧᑦ ᖃᖓᑦᑕᐅᑎᑦᓴᓄᑦ ᐃᓚᒌᖑᔪᓄᑦ ᐃᓚᖏᓐᓄᑦ ᓇᓂᓯᓯᒪᔪᓂᒃ ᓇᓪᓕᒋᔭᖏᑕ ᐃᓗᕕᖏᓐᓂᒃ.

ᑮᓇᐅᔭᕐᓂᒃ ᐊᑐᐃᓐᓇᐅᑎᑦᓯᒻᒥᔪᒍᑦ ᓇᓗᓇᐃᖅᓯᓂᕐᒧᑦ ᐃᓗᕕᓂᑦ ᐊᒻᒪ ᓴᖅᑮᓂᕐᒧᑦ ᓇᓗᓇᐃᒃᑯᑕᕐᓂᒃ. ᑭᓱᑐᐃᓐᓇᕐᒧᑦ ᐊᖓᔪᖅᑳᕆᔭᐅᔫᑉ ᓂᐱᖓ ᐅᑎᖅᑎᑕᐅᒍᓐᓇᙱᓚᖅ ᐅᕝᕙᓘᓐᓃᑦ ᐱᖃᓐᓇᕆᔭᐅᔫᑉ ᓇᓪᓕᓐᓂᖓ, ᑭᓯᐊᓂ ᖃᐅᔨᒪᑦᓯᐊᕐᓂᕐᒥᑦ ᓇᒥ ᓄᓇᒨᖅᑕᐅᓯᒪᒻᒪᖔᑦ ᐱᒋᐊᕈᑎᑦᓴᐅᕗᖅ ᐅᐱᒍᓱᓐᓂᕐᒥᑦ ᐃᖅᑲᐅᒪᔭᐅᓂᖏᓐᓂᒃ.

ᑕᐃᒪᐃᖏᓐᓇᐅᔭᕐᓂᖏᓐᓄᑦ, ᐃᓄᐃᑦ ᐱᑦᓯᐊᖅᑕᐅᖃᑦᑕᓚᐅᙱᓐᓂᖏᑦ ᐳᐃᒍᖅᑕᐅᓯᒪᔪᑦ ᐅᕝᕙᓘᓐᓃᑦ ᓴᓂᕐᕙᑦᑕᐅᓯᒪᑐᐃᓐᓇᖅᑐᑦ. ᑕᐃᒪᐃᑎᑦᓯᒃᑲᓐᓂᔾᔮᙱᑦᑐᒍᑦ. ᑕᐃᒪᐃᒻᒪᑦ ᐃᑲᔪᖅᓱᖅᑐᒍᑦ ᓄᓇᓕᓐᓂᒃ ᓯᕗᓕᖅᑎᖃᕐᓗᑎᒃ ᖃᓄᐃᓕᐅᕐᓂᐅᔪᓂᑦ ᐊᒻᒪ ᐃᖅᑲᐅᒪᑦᓯᓂᕐᒧᑦ, ᐊᒻᒪ ᐃᓄᓕᒫᓂᒃ ᐃᓕᓐᓂᐊᖅᑎᑦᓯᓂᕐᒥᑦ.

ᓯᕗᒧᐊᖅᐸᓪᓕᐊᖏᓐᓇᕐᓂᕐᒧᑦ ᓴᐃᒻᒪᖃᑎᒌᓐᓂᕐᒧᑦ, ᓄᓇᓕᕐᔪᐊᖑᓪᓗᑕ ᑕᒪᒃᑭᕐᓗᑕ ᐱᓯᒪᑦᓯᒋᐊᖃᖅᑐᒍᑦ ᐊᑐᖅᓯᒪᔭᑐᖃᑦᑎᓐᓂᒃ.

ᑭᖑᓂᑦᑎᓐᓂᒃ ᐃᓕᓐᓂᐊᖅᓯᒪᒐᑦᑕ, ᓯᕗᒧᑦ ᑕᐅᑐᒋᐊᖃᕐᒥᔪᒍᑦ ᓯᕗᓂᑦᓴᑦᑎᐊᕆᓂᖅᓴᐅᓂᕐᒧᑦ – ᓯᕗᓂᑦᓴᖃᕐᓗᑕ ᐳᕙᓪᓗᓐᓇᖅᑐᖃᖏᓪᓗᓂ.

ᐳᕙᓪᓗᓐᓇᖅᑐᖅ ᓄᖅᑲᖅᑎᑕᐅᒍᓐᓇᖅᑐᖅ ᐊᒻᒪ ᐱᔪᓐᓃᖅᑎᑕᐅᒍᓐᓇᖅᑐᖅ. ᐃᓅᒍᓐᓃᕈᑕᐅᒋᐊᖃᙱᑦᑐᖅ. ᑭᓯᐊᓂ ᐳᕙᓪᓗᓐᓇᖅᑐᒧᑦ ᐃᓅᒍᓐᓃᖃᑦᑕᖅᑐᑦ ᓱᓕ ᓱᕈᓰᑦ, ᐃᓐᓇᐃᑦ, ᐊᒻᒪ ᓯᕗᓕᖅᑎᐅᔪᑦ. ᐃᓄᐃᑦ ᐳᕙᓪᓗᓐᓇᖅᑐᖃᕐᓂᖏᑦ ᐃᓄᐃᑦ ᓄᓇᖓᓂ 300-ᖏᖅᓱᕐᓗᒍ ᐊᒥᓲᓂᖅᓴᐅᔪᑦ ᑲᓇᑕᒥ ᓄᓇᖃᖅᑳᖅᓯᒪᙱᑦᑐᑦ ᐃᓄᒋᐊᕐᓂᐅᔪᓂᑦ. ᑕᐃᒪᐃᒋᐊᖃᙱᑦᑑᒐᓗᐊᖅ.

ᐊᕐᕌᓂ, ᑲᓇᑕᐅᑉ ᒐᕙᒪᖓ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᖅᓯᒪᓚᐅᖅᑑᒃ ᐳᕙᓪᓗᓐᓇᖅᑐᖃᕈᓐᓃᖅᑎᑦᓯᓂᕐᒥᑦ ᐃᓄᐃᑦ ᓄᓇᖓᓂ ᑎᑭᓪᓗᒍ 2030, ᐊᒻᒪ ᐊᐃᑦᑐᕐᓗᓐᓇᖅᑐᖅ ᐳᕙᓪᓗᓐᓇᖅᑐᖃᕈᓐᓃᕐᓗᓂ 50 ᐳᓴᓐᑎᒥᒃ ᐊᕐᕌᒍᓂᑦ ᐱᖓᓲᔪᖅᑐᓂᑦ ᐊᑐᓛᖅᑐᓂᑦ.

ᑭᓯᐊᓂ ᐱᑕᖃᕈᓐᓃᖅᑎᑦᓯᓇᓱᐊᕐᓂᕐᒥᑦ ᑖᑦᓱᒥᖓ ᐋᓐᓂᐊᒥᑦ ᐱᔭᕆᐊᑭᙱᒻᒪᑦ ᓲᕐᓗ ᐋᓐᓂᐊᓕᕇᒃᑯᓯᖅᑕᐅᓂᒃᑯᑦ ᐅᕝᕙᓘᓐᓃᑦ ᖃᐅᔨᓴᖅᑕᐅᓂᒃᑯᑦ − ᑭᓯᐊᓂ ᑖᒃᑯᐊ ᐃᓚᒋᔭᐅᔪᒻᒪᕆᐅᔫᒃ.

ᓄᖅᑲᖅᑎᑦᓯᓂᕐᒥᑦ ᑖᑦᓱᒥᖓ ᐊᑦᓱᕈᕐᓇᖅᑐᒥᑦ, ᖃᐅᔨᒪᑦᓯᐊᕆᐊᖃᖅᑐᒍᑦ ᐃᓄᐃᑦ ᐃᓅᕙᒻᒪᑕ, ᖃᐅᑕᒫᑦ, ᐊᑦᑐᖅᑕᐅᓯᒪᓪᓗᑎ ᐊᐅᓚᑦᓯᓂᕐᓗᓐᓂᐅᓚᐅᖅᑐᒧᑦ. ᐃᖅᑲᐅᒪᒍᕕᑦ ᖃᓪᓗᓈᓄᑦ ᐊᐅᓪᓚᖅᑎᑕᐅᓚᐅᖅᓯᒪᓐᓂᕈᕕᑦ, ᐅᐱᓐᓇᕋᓂᐅᒐᓗᐊᖅ ᐅᔾᔨᖅᓱᖅᑐᑎᑦ ᒐᕙᒪᒃᑯᑦ ᐱᓕᕆᔾᔪᓯᖏᓐᓂᒃ ᐅᓪᓗᒥᐅᔪᖅ.

ᑕᐃᒪᐃᒋᐊᖃᙱᑦᑐᒍᑦ ᐊᑐᒃᑲᓐᓂᓂᕐᒥᑦ ᑭᖑᓂᑦᑎᓐᓂᒃ ᑕᒻᒪᕈᑕᐅᓚᐅᖅᑐᓂᒃ. ᑕᐃᒪᐃᒋᐊᖃᙱᑦᑐᒍᑦ ᐃᓱᒪᓕᐅᕆᓗᑕ ᐋᖅᑭᒋᐊᕈᑎᑦᓴᓂᑦ.

ᑕᐃᒪᐃᒻᒪᑦ ᓄᑖᒥᑦ ᐱᓕᕆᔾᔪᓯᖃᕋᓱᐊᖅᑐᒍᑦ, ᐃᓕᑦᓯᓐᓂᒃ ᓯᕗᓕᖅᑎᖃᕐᓗᑕ.

ᒐᕙᒪᕗᑦ ᑮᓇᐅᔭᖃᖅᑎᑦᓯᔪᑦ ᐃᓕᑦᓯ ᐸᕐᓇᐅᑎᖓᓂ, ᐃᓄᓐᓂᒃ ᓯᕗᓕᖅᑎᖃᕐᓗᑎᒃ ᐸᕐᓇᐅᑎᒥ, $27 ᒥᓕᐊᓐ ᐅᖓᑖᓄᑦ ᐊᕐᕌᒍᓄᑦ ᑕᓪᓕᒪᓄᑦ ᐳᕙᓪᓗᓐᓇᖅᑐᖃᕈᓐᓃᖅᑎᑦᓯᓂᕐᒧᑦ ᐃᓄᐃᑦ ᓄᓇᖓᓂ. ᑖᒃᑯᓄᖓ ᑮᓇᐅᔭᕐᓄᑦ, ᐃᑲᔪᖅᓱᕐᒥᔭᕗᑦ ᓄᓇᕗᑦ, ᓄᓇᑦᓯᐊᕗᑦ, ᓄᓇᕕᒃ, ᐊᒻᒪ ᐃᓄᕕᐊᓗᐃᑦ ᓄᓇᖓ ᐋᖅᑭᑦᓱᐃᓂᕐᒥᑦ ᓇᒻᒥᓂᖅ ᐱᓕᕆᐊᖃᓂᕐᒧᑦ ᐸᕐᓇᐅᑎᖏᓐᓂᒃ.

ᑕᐃᒫᑦᓴᐃᓐᓇᖅ ᓄᑖᒥᑦ ᐱᓕᕆᔾᔪᓯᖃᓕᖅᑎᓪᓗᑕ ᑲᑐᔾᔨᖃᑎᒌᓂᕐᒧᑦ, ᑐᙵᕕᖃᕐᒥᔪᖅ ᑕᐅᑐᓂᕐᒥᑦ ᐳᕙᓪᓗᓐᓇᖅᑐᖅ ᑭᓲᓪᓚᕆᓐᓂᖓᓂ: ᐋᓐᓂᐊᖑᔪᖅ ᐄᔭᒐᑐᐊᓄᑦ ᐱᔪᓐᓃᖅᑎᑕᐅᔪᓐᓇᙱᑦᑐᖅ.

ᑲᒪᒋᔭᖃᕆᐊᖃᖅᑐᒍᑦ ᐊᔪᖅᓴᕐᓂᕐᒥᑦ, ᓂᕿᑦᓴᖃᐃᓐᓇᕆᐊᖃᕐᓂᕐᒥᑦ, ᐊᒻᒪ ᓈᒻᒪᑦᑐᓂᒃ ᐃᓪᓗᖃᕐᓂᕐᒥᑦ. ᐱᓕᕆᐊᖃᖅᑎᓪᓗᑕ ᑐᕌᓪᓚᕆᑦᑐᒥᑦ ᐳᕙᓪᓗᓐᓇᖅᑐᒧᑦ, ᑮᓇᐅᔭᖃᖅᑎᑦᓯᒻᒥᔪᒍᑦ ᐱᔭᕆᐊᑭᓐᓂᖅᐹᓄᑦ, ᐃᓚᖃᖅᓱᓂᒃ $640 ᒥᓕᐊᓐᓂᒃ ᐃᓪᓗᓕᕆᓂᕐᒧᑦ ᐃᓄᐃᑦ ᓄᓇᖓᓂ.

ᑖᓐᓇ ᐃᓪᓗᓕᕆᓂᕐᒧᑦ ᐸᕐᓇᐅᑎ ᐋᖅᑭᑦᓱᖅᑕᐅᓚᐅᖅᑐᖅ ᐃᓄᓐᓄᑦ ᑲᑐᔾᔨᖃᑎᖃᖅᓱᑎᒃ ᒐᕙᒪᑐᖃᒃᑯᓐᓂᒃ, ᐊᒻᒪ ᑲᔪᓯᑎᑕᐅᓛᖅᑐᖅ ᐃᓄᓐᓄᑦ. ᐊᖏᖅᓯᒪᔪᒍᑦ ᓇᓂᓯᓂᕐᒥᑦ ᓄᓇᓕᓐᓂᒃ ᓇᒻᒥᓂᕆᔭᐅᔪᓂᒃ, ᓄᓇᓕᓐᓂᒃ ᐊᐅᓚᑕᐅᔪᓂᒃ ᐋᖅᑭᒋᐊᕈᑎᑦᓴᓂᒃ, ᑕᕝᕘᓈᖓᕋᓗᐊᖅᑲᑦ ᑮᓇᐅᔭᒃᑯᑦ, ᑕᐃᑰᓇ ᓇᓂᓚᕗᑦ ᐱᓕᕆᐊᖑᔪᒃᑯᑦ, ᐅᕝᕙᓘᓐᓃᑦ ᓇᐅᒃᑯᑐᐃᓐᓇᖅ ᐱᓕᕆᐊᕆᔭᑦᑎᓐᓂᒃ ᐃᓄᐃᓪᓗ ᒐᕙᒪᑐᖃᒃᑯᓪᓗ ᑲᑐᔾᔨᖃᑎᒌᓐᓂᖏᓐᓄᑦ ᑲᑎᒪᔨᕋᓛᒃᑯᑦ.

ᐅᐱᓐᓇᕋᓂᐅᒐᓗᐊᖅ, ᑭᓇᑐᐃᓐᓇᕐᒧᑦ ᐅᖃᕆᐊᖃᙱᑦᑐᖓ ᐱᕙᓪᓕᐊᓂᖃᕋᓗᐊᖅᑎᓪᓗᑕ, ᐱᔭᑦᓴᓕᒻᒪᕆᐅᓘᒐᑦᑕ ᓱᓕ.

ᓇᓗᓇᙱᑦᓯᐊᒻᒪᕆᑦᑐᖅ ᓄᓇᓕᐅᔪᑦ ᐊᑦᓱᕈᓐᓇᓪᓚᕆᑦᑐᓂᑦ ᓴᖅᑭᕝᕕᐅᓯᒪᖃᑦᑕᖅᑐᑦ.

ᑭᓯᐊᓂ ᓇᓗᓇᙱᒻᒪᕆᑦᑐᖅ ᐃᓄᐃᑦ ᐊᓂᒍᐃᑎᑦᓯᒃᑲᐅᓂᖏᓐᓂᒃ.

ᓯᕗᒧᐊᖅᐸᓪᓕᐊᓂᐊᕐᓗᑕ ᐅᖃᑦᓯᐊᕆᐊᖃᖅᑐᒍᑦ ᑕᒻᒪᓚᐅᓐᓂᑦᑎᓐᓂᒃ. ᐱᕙᒌᔭᖅᓯᒪᒋᐊᖃᖅᑐᒍᑦ ᐋᖅᑭᒋᐊᖅᓯᓂᕐᒧᑦ. ᑖᓐᓇ ᐱᔾᔪᑎᒋᓪᓗᒍ ᐅᓪᓗᒥᐅᔪᖅ ᑕᕝᕙᓃᔾᔪᑎᒋᕙᕋ.

ᐅᓐᓄᓴᐅᔪᖅ ᒪᒥᐊᕐᓂᐅᔪᖅ ᓱᓕᓂᕋᐃᕈᑎᐅᕗᖅ ᐃᓕᓐᓄᑦ.

ᓱᓕᓂᕋᐃᕈᑎᐅᕗᖅ ᐳᐃᒍᓚᐅᖅᓯᒪᙱᓐᓂᕐᒧᑦ ᐃᓄᐃᑦ ᐋᓐᓂᖅᑕᐅᓚᐅᖅᓯᒪᓐᓂᖏᓐᓄᑦ, ᐃᓚᒋᔭᑦᓯᓐᓄᓪᓗ.

ᓱᓕᓂᕋᐃᕈᑎᐅᕗᖅ, ᑲᓇᑕᒥᐅᓕᒫᑦ ᑭᒡᒐᖅᑐᕐᓗᒋᑦ, ᓯᕗᓂᑦᓴᑦᑎᐊᕙᓕᐅᕐᓂᕐᒧᑦ. ᓴᓇᖃᑎᒋᓗᑎᒍ.

ᖁᔭᓐᓇᒦᒃ.

Merci. Thank you.