Taimannganit atiliuqtaungmat Inuit Nunanganut Uqarngirauti 2017-mit, Kanatami Gavamakkut ammalu Inuit sivuliqtingit katimaqattaqtut arraagutamaat ammalu piliriqatigiiktut Inuit-Gavamatuqakkut Piliriqatigiingninginut Katimajialaatigut sivummuktinniarlugit tamainnut sivulliqpautijaujumajut, sanngiktigiarlugit Inuit-Gavamatuqakkut piliriqatigiingnirijangat, ammalu saqqittilutik piruqpallianiqarngniqsaujungnaqtumik Inuit Nunanganit.

Uplumi, Angijuqqaarjuaq, Justin Trudeau, Angijuqqaaq Inuit Tapiriit Kanatamikkunnut, Natan Obed, Gavamatuqakkunnit ministaujut, ammalu niruaqtausimajut Inuit sivuliqtingit Inuvialuit Aviktuqsimajumit Kuapuriisakkunninngaaqtut, Nunavut Tunngavikkunnit, Makivvikkunnit, ammalu Nunatsiavut Gavamakkunnit katilauqtut katimanirijanginnit Inuit-Gavamatuqakkut Piliriqatigiingninginut Katimajialaakkut Aatuvaa, Aantiuriumit.

Katimatillugit, sivuliqtiujut uqausiqalauqtut tamainnut taugugarijaujumik atauttikkut atuliqtinniarlugit pilirianguniaqtut Inuit Nunanganut Atuagamik, pigiaqtitaupluni Inuit-Gavamatuqakkut Piliriqatigiingninginut Katimajialaakkunnut sivuliqtiujunut 2022-mit. Sivuliqtiit piliriaqarlutik sivummuktinniarlugu atuagaq, asiannguqtirinajaqtuq qanuiliuqulugit gavamatuqakkunnit aviktuqsimajut ammalu pijjujjijiujut qanuittuuniarngningata ammalu pilirianguningit atuagait, turaangajut, ammalu pijittirautiit atuqtut Inungnut ammalu Inuit Nunanganut.

Sivuliqtiit angilauqtut piliriariniarlugit saqqittinirngmut piliriqatigiingnirngnik Inungnut kamagijauniaqtumik silattuqsarvigjuarngmit Inuit Nunanganut.

Kanatamut Angijuqqaarjuaq, Angijuqqaaq Obed, ammalu Inuit-Gavamatuqakkut Piliriqatigiingninginut Katimajialaakkunnut sivuliqtiit uqausiqalauqtut maannasaangulauqtumit gavamatuqakkut kiinaujaqtuutingannit, ilauplutik pitaaqsimaniit $370 milijannit Inuit Nunaganut aturngniaqtumik iglulirinirngmut ammalu nunalingmut atuqtunik Inuit nunalinginnit. Sivuliqtiit uqalaurngmijut pitaaqtaujut $45 milian maruuk ukiunut aturngniaqtumit ikajuqtauninginnut Makivvik and Kanata piliriqatigiingninginnut gavamatuqakkut piliriariniarlugit pittaungittut ammalu aktuqsiniqainnaqtut tuqutiqtaulauqtillugit Inuit qingmingit ammalu asiujiniujunut Inuit piqqusinganit, piliriangujungnaqtuujut Inuit-Gavamatuqakkut Piliriqatigiingninginut Katimajialaakkut Aaqqiqatigiingnirngmut Piliriangit sivulliqpautijaujunut. Sivulliqtiit qaujitittilauqtut Kanatami Gavamakkut tusaqtijjutigisaalauqtanganut ingmikkut qaujisainirngmut timiujumut kamagijauluni Kamisinamut Uplumiujuq Angiqatigiigutimut Atuliqtittinirngmit ammalu pijjutiqaqtunut Inungnit.

Inuit-Gavamatuqakkut Piliriqatigiingninginut Katimajialaakkunnut sivuliqtiit uqausiqalauqtut tikiutijaujunut ukiuq aniguqtumit, ilaupluni tikiutiniujut akuniuniqsamut piliriaqarngniq pivallianingata amisunut sivulliqpautijaujumajunut ammalu piusigiaqsiniit katimajiallaakkut aulattiningannut ammalu aulattinirngmut aaqqiumajunut, piqujauningittitut qimirrunirngmut unipkaaliangulauqtumit arraani.

Uqaqtaujut

“Inuit-Gavamatuqakkut Piliriqatigiingninginut Katimajialaakkut pinnguqtitaulauqtut atuqtaupluni ajjigiiktukkut piliriqatigiingniarlutik Inuit ammalu Gavamatuqakkut pimmariugijaujuq aaqqiqatigiingnirngmut. Pitaqaqtittiniaqtugut tatigijaunirngmik, takuksaunikkut, ammalu pijaksautiqarngnikkut pimmariutitaunginnarluni qanuiliurngnirijaluktaaptingnit. Piliriqatiginiaqtavut Inuit sivuliqtiujut Inuit-Gavamatuqakkut Piliriqatigiingninginut Katimajialaakkutigut sananiarluta ammalu sivummuktillugu nutaannguqsimajuq Inuit-Gavamakkut piliriqatigiingninginnit.”

Upinnaqtuq Justin Trudeau, Angijuqqaarjuaq Kanatamut

“Katiqattaqtugut tagvani aalliraujarngmit pingasuirlugu ukiup iluanit piliriariniarlugit pivallianinga Inungnut sivulliqpautijaujumajut aanniaqaqtailimanirngmut kamajaqarngnirngmit nunataaqsimanirngmut atuliqtittinirngmut, Inuit qaujimajut pijaujarialingnit nunalinginnit. Inuit ikajuqtuijut aaqqiksinirngnut, ammalu piliriqatiginiaqtavut tamatumunga piliriaqarngnirngmik. Pijaksaqtaqattiaqtuq suli ammalu piliriqatigiinginnarngniaqtugut – tagvani aalliraujarngmit ammalu silataanit – inuusiq piuniqsauliqtinniarlugu ammalu ajjigiiktittiniqarngniqsaulirngniarlugu Inungnut Inuit Nunanganiittunut.”

Upinnaqtuq Gary Anandasangaree, Minista Gavamatuqakkut-Nunaqaqqaaqtunut Kamajikkunnut

“Ukkuinganikkut ammalu suliniqarngnikkut uqalluriksautiningit Inuit sivuliqtiit, Kanatamut Angijuqqaarjuaq, ammalu Ministait pimmariujuq asiannguqsiniarluni Inuit-Gavamatuqakkut Piliriqatigiingninginnut Katimajialaakkunnut tamatuminngat piliriaqarngniarlutik saqqititaulaurlutik. Piliriangujutigut marruuk ukiut aniguqtunit tusaqtittilauqtugut Inuit Nunanganut Atuagarngmit: sivulliqpaaq gavamatuqakkut atuagangat tikuliarluni gavamakkut piniaqtanganut ajjigiingaliqtittinirngmut Inungnut qanuingalirngniqarluni. Uplumi, sanngijuujumit suvummuksimajugut piliriaqarngniptingnut atuliqtitauninganut atuagaq. Piliriangujuq atauttikkut piruqpallianiqarungnarngnirngmut, ammalu piruqpallianiqarungnarnginginnut Kanatamiutaluktaat.”

Natan Obed, Angijuqqaaq Inuit Tapiriit Kanatami

Pinnikuit Takulugit

• Inuit-Gavamatuqakkut Piliriqatigiingninginut Katimajialaakkut pinnguqtitaulauqtut atuqtaupluni ajjigiiktukkut piliriqatigiingniarlutik Inuit ammalu Gavamatuqakkut pimmariugijaujuq aaqqiqatigiingnirngmut. Katimajialaakkut pingasuirlutik ukiup iluanit katiqattaqtut. Atausiirlutik ukiup iluanit, iksivatarijauqatauqattaqtuq Kanatamit Angijuqqaarjuaq ammalu Angijuqqaaq Inuit Tapiriit Kanatamikkunnut.
• Inuit-Gavamatuqakkut Piliriqatigiingninginut Katimajialaakkut ilautittiqattarngmijut ilauqataunginnaqtunik angijuqqaangujunit Kanatamit Inuit Ukiuqtaqtuluktaamit Katimajinit, Kanatamit Inuit Makkuktut Katimajinit, ammalu Pauktuutikkunnit.
• Ilauqataujut uplumi katimajunit ilaujut:
  • Angijuqqarjuaq Justin Trudeau 
  • Gary Anandasangaree, Minista Gavamatuqakkut-Nunaqaqqaaqtunut Kamajikkunnut
  • Mélanie Joly, Minista Nunait Asinginnilirijikkunnut
  • François-Philippe Champagne, Minista Nutaangujulirinirngnut, Qaujinasuktulirinirngmut ammalu Pilirivvingnut
  • Jenna Sudds, Minista Qatanngutigiinut, Surusirngnut ammalu Inuuqatigiit Pivalliajulirijikkunnut
  • Dan Vandal, Minista Ukiuqtaqtumit Kamajikkunnut, Minista Pijaksautiqaqtuq Prairies Piruqpallianirngmut Pivalliajulirijikkunnit Pijjujjijikkunnut
  • Patty Hajdu, Minista Nunaqaqqaaqtunik Pijittiraijikkunnut ammalu Minista Pijaksautiqaqtuq Gavamatuqakkut Piruqpallianirngmut Pivalliajulirijikkunnit Pijjujjijikkunnut Uangnanganut Aantiuriu
  • Diane Lebouthillier, Minista Kanatamit Iqalulirijikkunut ammalu Kanatamit Sigjanik Mianiqsijikkunnut
  • Sean Fraser, Minista Iglulirijikkunnut, Piqutinut ammalu Nunalingnut
  • Bill Blair, Minista Kanatamit Unataqtuksakkunnut
  • Natan Obed, Angijuqqaaq Inuit Tapiriit Kanatami 
  • Duane Smith, Iksivautaq ammalu Angijuqqaaq Inuvialuit Kuapuriisakkunnut
  • Aluki Kotierk, Angijuqqaaq Nunavut Tunngavikkunnut
  • Johannes Lampe, Angijuqqaaq, Nunatsiavut
  • Pita Aatami, Angijuqqaaq, Makivvik
  • Nancy Etok, Angijuqqaaq, Pauktuutikkunnut
• Tuksirautaujuq Kamisinamut Uplumiujuq Angiqatigiigutimut Atuliqtittinirngmit pijjujjijiujutuurajaqtuq Maligaliurvigjuarngmit.  Kamisinaup pilirianga pivalliaqatauniarluni Uplumiujuq Angiqatigiigutimut Piliriqatigijaujunit Ingmikkuunganiarlutik, ukpirngnaqtuulutik, ajunngittuulutik, ammalu ajunngittukkut kamagijaqarngniarluni Uplumiujuq Angiqatigiigutimut atuliqtittinirngmit, ammalu Gavamatuqakkut Gavamanginnik pijaksautiqaqtittiluni Maligaliurvigjuarngmit Uplumiujuq Angiqatigiigutimut pijaksautiujunut, pijarialingnut, ammalu piliriqatigiingniujunut.
• Kamisina nalunnginniqariaqaqtuq Nunaqaqqaaqtut Uplumiujumit Angiqatigiigutimut Piliriqatigijaujunut, ammalu qaujigiaqattarluni Nunaqaqqaaqtut Uplumiujumit Angiqatigiigutimut Piliriqatigijaujunit, pimmariuniaqtuq ilagijauluni maligamut ammalu tikkuaqsinirngnut.
• Inuit Nunangat Inungnut angirrarijaujuq Kanatamit.  Avalusimajuq nunamit, imarngmit, ammalu sikumit Inuit nunataaqsimajanginnit iniujunit Inuvialuit Nunatuqangannit Nunattiarngmit ammalu Yukonmit, Nunavummit, Nunavikmit Uangnaqpasinganit Kupaik, ammalu Nunatsiavutmit Uangnanganit Labrador.
• Pivalliaqatauniq ammalu atuliqtittiniq Inuit Nunanganut Atuagarngmit sivulliqpautijausimajuq Inuit-Gavamatuqakkut Piliriqatigiingninginut Katimajialaakkunnut taimannganit Nattiat 2020-mit.  Inuit Nunanganut Atuagaq, pigiaqtitaulauqtuq Inuit-Gavamatuqakkut Piliriqatigiingninginut Katimajialaakkunnit sivuliqtinut 2022-ᒥᑦ, nalunaiqsijuq sivulliqpaamit Kanatami Gavamakkut pivalliaqatausimaninginnit qaliriingajumik, iluittuujumik gavamakkunnut atuagamik taimannaittuujumit.
• Inuit Nunanganut Atuagaq ilitaqsijuq Inuit Nunangat ajjiungittuupluni nunauninganut, piqqusiqarngninginnut, ammalu gavamaqarngninganut.  Titiraqsimajuq atuqtaujumik qanuittuuniarngninganut ammalu nutaannguqtaulutik gavamatuqakkunnit atuagaluktaat, turaangajut, pijittirautiit, ammalu piliriaksait atuqtunik Inuit Nunanganut uvvaluunniit ikajuutaujut Inungnut. Atuqtaujut piusigiaqsiniaqtuq tikuliaqsimaningit Inuit Nunangat ammalu ilauqatautillugit Inuit pivallianiujunut.
• Maliktittijuq Inuit Nunanganit Atuagamut ilitaqsiniq gavamatuqakkut pitaaqsimajanginnit Inungnut ammalu Inuit Nunanganut pimmariungmata ilagijauplutik pijungnautinginnut Inuit ingminik-qaujijungnarngnirngmut ammalu ingminik-gavamaqarngnirngmut. Atuagaq qanuiliuqtittijuq gavamatuqakkut aulattijinginnut isumagijauniarlutik ajjiungittuujut pijungnautingit, pijumaningit, ammalu qanuinganingit Inuit atuqtanginnit kiinaujaqaqtitauniarlutik Inuit nunataaqsimaninginnut aulattijiujut.
• Inuit-Gavamatuqakkut Piliriqatigiingninginut Katimajialaakkut maannaujuq sivulliqpautijumajanginnit ilaujut:
  • Inuit nunataaqsimaninginnut atuliqtittiniq;
  • Inuktitut uqausiq uummaqtitaukkannirluni, pilirianguluni,mianirijauluni, ammalu saqqijaaqtitauluni;
  • Inuit Nunanganit atuagarngmut iniqarluni ;
  • Aaqqiqatigiingnirngmut piliriaqarluni ammalu uvunga asiusimajut ammalu inuaqtausimajut arngnait ammalu niviaqsiat;
  • Ilinniarngniq, ukiuqalisaaqtut ilinniaqtitauningit, ammalu ajunnginniqtaarngnirngmut pivallianiq;
  • Aanniaqaqtailimaniq ammalu qanuingittiarngniq;
  • Avati ammalu silaup assijjiqpallianinga;
  • Igluliriniq;
  • Piqutiit;
  • Piruqpallianirngmut pivallianiq ammalu pitaaqturngniq;
  • Maligait sivulliqpautijarialiit;
  • Nunarjuarngmit Nanituinnaq Inuit sivulliqpautijarialiit;
  • Qaujisainiq, qimirruniq, ammalu ilittiniq;
  • Aulattinirngmut sannginiqarniq, sapumminiq, ammalu mianiqsiniq; ammalu
  • Angirraqannginniq.

Ilagijaujut Taikunngarungnautiit

• Rapport d’évaluation du Comité de partenariat entre les Inuits et la Couronne
• Le Comité de partenariat entre les Inuits et la Couronne approuve une politique sans précédent sur l’Inuit Nunangat afin de mieux favoriser l’autodétermination des Inuits
• Le premier ministre du Canada et le président de l’Inuit Tapiriit Kanatami annoncent la création du Comité de partenariat entre les Inuits et la Couronne
• Nous faisons progresser la réconciliation grâce à la création d’un poste de commissaire chargé de la mise en œuvre des traités modernes
• Note d’information sur le Budget 2024 : Un avenir équitable pour les Autochtones
• Carte de l’Inuit Nunangat (en anglais seulement)