Iyo 24 endasotibahiganeg ayangwamíwin ashidj kichi sóngenindam Kánádáng Abiwadj Kikinámádinán Anawenindam Madwesidjigan 1-866-925-4419, mígiwen anawenindámowin tánginigen inanokíwinan ondji Ká-Sanagizidjig ashidj ódodemowán ashidj wíndamágemagad ánín kidji ayán kodagan pimádjiwowin wenzikág Kichi Ogima Kánádáng. Anishinábeg, Kíwedinóg, ashidj Abitáwizíg míkamowadj teshagodj kitawenindamowin wídokázowin odágonónán Apenimo Wídokázo Madwesidjigan 1-855-242-3310, konima gaye nandagikenindjigan www.espoirpourlemieuxetre.ca.
Ogimanodagin Justin Trudeau, nogom ogi pigidinan odikidowin mizinigini kak yedi odja tebwendjigeh mamowi ijitcigewini kijiginik odja.
“Apích kádagong Tebwe ashidj Pónenindamowin Kíjigad kaye kikenindágog Pokideyeminánde Pibagiwayán Kíjig, nínawind mígádinánánáng káshíbiseg ashidj wísagenindamowin ká-ayámowadj kikinámádináning ijichigewin ondji Anishinábeg, Kíwedinóg, ashidj Abitáwizíg ondaje tanakíwin Kánádáng. Nimámidonenimánánig ábinodjínshag ega wíkád kágíwewadj. Nikijewádjichíganiweg káshábwíkandágeg kákodagitódjig madji inádjimowin awákoziwin. Nínawind kipizindawánánig wínawa kátanakamigod ashidj wínawa ádisokán, ashidj tebweyenindágog koke kidji nenínawinang mikan ondji pónenindamowin.
“Násawehi 1867 ashidj 1996, ogima kikinámadinán inákonigewin shagodjiyáwán akonáwán onzam 150,000 Anishinábeg, Kíwedinóg ashidj Abitawizi abinodjínshag ondjibáwadj wín odódemowan ashidj tanakíwinawan, ashidj nenínawinyag wínawa pimádjiwowin, inwewinan, ashidj tebendiziwin. Níbinageg ayánawa kinwesh awakíwin ashidj wanitowin pimádiziwin ondji tawe madji kikinámádinán Pónenindamowin ka’n godj eta ishkweyang inábiyán ashidj kidji nisidotamin nanábaniziwin pinawígo. Mí iye nakag nisidotawin iye awasonon nanábaniziwin keyabadj kikinawábandánánán nóngom.
“Kichi Ogima Kánádáng keget nandawenindán kidji pimosedj opimehí Anishinábe tanakíwinan kidji mino pimádiziwadj, kidji nígánimigag kidji wídokawadj iyen tibisatwán wewenind. Niga ondinán inanokíwin kidji wídokazowadj kidji mikawáwadj ashidj kikenindamwadj abinodjínshan ega kakíwewadj ondji madji kikinámádinánkág, kidji mikamowadj ashidj mámidonenimawadj peshodj ega mazinibihegádeg ningwakázowadj ashidj kidji kijewadjichiganiwadj igeg kanibodjig. Mí awaso pangí kágige mádjíbamowadj Tebwe ashidj Pónendamowin Nandwengegewin Pódadjigan kidji mino inanokíwin ondji Anishinábeg. Wíbadj awaso pibónong, nínawind kítibádjimomin wídokazowin kidji mígádimang madji kikinámádinán ánwetamowin ashidj ganawendamowadj ánín ka ijiseg awaso kogwánisagodj inanokínigewin kidji onjida ánikeyádjimowin ka’n wíkád tagoshinomigak.
“Nóngom ashidj kíjigon tagoshinomagag, nigagánzomak pemádizidjig Kánádáng kidji mamidonenindamowadj ishkwehi ijiwebad igeg madji kikinámádinán kidji wíkwadjiyadj Anishinábe kakina Kijigad ondji Tebwewin ashidj Pónenindamowin enakamigag wínawa tanakíwinwan, kikinámágozi nakag ádisókán Kashábwidodjig, ashidj pískan pokideyimin enándeg ondji kijewádjichiganiwe kakina abinódjínj kakodagitodj konima gaye wanitodj pimádiziwin. Mamidonenindamda ánín pejig ashidj kakina kínawind mígiweng kidji mino tanakíwang—mino enigwakamigag—mámawi tebwewin ashidj pónenindamowin.”