ᐅᓇ 24-ᐃᑲᕐᕋᓄᑦ ᐊᑦᑕᕐᓇᖅᑐᒦᑕᐃᓕᑎᑦᑎᓂᖅ ᐊᒻᒪᓗ ᑲᓐᖑᓇᖅᑐᓕᕆᔾᔪᑕᐅᓲᖅ ᑲᓇᑕ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐅᓗᕆᐊᓇᖅᑐᒦᑎᓪᓗᒋᑦ ᐅᖃᓗᒍᓐᓇᖅᑐᑦ, ᐊᑐᐃᓐᓇᐅᔪᖅ 1-866-925-4419, ᐃᑲᔫᑎ ᐅᓗᕆᐊᓇᖅᑐᒦᑎᓪᓗᒋᑦ ᐊᒃᓱᕈᓐᓇᖅᑐᒦᓗᐊᓕᕐᑎᓪᓗᒋᑦ ᑭᒃᑯᓄᑦ ᐅᖃᓪᓚᒍᓐᓇᕐᓂᖏᓐᓂᒃ ᐱᔨᑦᑎᕋᐅᑎ ᐃᓕᓐᓂᐊᕆᐊᖅᑎᑕᐅᓂᑯᓄᑦ ᐊᒻᒪᓗ ᐃᓚᖏᓐᓄᑦ ᐊᒻᒪᓗ ᓇᓗᓇᐃᔭᑦᑎᐊᓲᑦ ᖃᓄᖅ ᐊᑐᕈᓐᓇᕐᓂᖏᓐᓂᒃ ᐊᓯᖏᓐᓂᒃ ᐋᓐᓂᐊᕆᔭᖏᓐᓄᑦ ᐃᑲᔫᑎᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ. ᐊᓪᓚᐃᑦ, ᐃᓄᐃᑦ, ᐊᒻᒪᓗ ᐊᓪᓚᐃᖓᔪᑦ ᕿᓂᖅᑎᓪᓗᒋᑦ ᒫᓐᓇ ᐃᓱᒪᓗᐊᓕᖅᑎᓪᓗᒋᑦ ᐃᑲᔫᑎᒃᓴᖅ ᐅᖃᕐᕕᒋᔪᓐᓇᕐᒥᔭᑎᑦ ᓂᕆᐅᖕᓂᖅ ᒪᒥᓴᐃᕕᖓ ᐃᑲᔪᓲᑦ ᐅᖃᓘᑎᖓ ᐊᑭᑲᓐᖏᑦᑐᖅ 1-855-242-3310, ᐅᕝᕙᓘᓐᓃᑦ ᐃᑭᐊᕿᕕᒃᑯᑦ ᐅᖃᓪᓚᒡᕕᒋᔪᓐᓇᕐᒥᔭᑎᑦ ᐅᕘᓇ www.espoirpourlemieuxetre.ca.
ᐅᓇ ᑲᓇᑕᒥ ᓯᕗᓕᐅᖅᑎᕐᔪᐊᖓ, ᔭᔅᑎᓐ ᑐᕉᑐ, ᐅᓪᓗᒥ ᐅᖃᓪᓚᖃᐅᔪᖅ ᐱᔾᔪᑎᒋᓪᓗᒍ ᑲᓇᑕᐅᑉ ᓱᓕᔪᓂᒃ ᓈᒻᒪᒃᑐᓕᕆᓂᕐᒧᑦ ᐊᒻᒪᓗ ᓴᐃᒪᖃᑎᒌᖕᓂᕐᒧᑦ ᐃᒪᓐᓇ:
“ᑕᕝᕙᓂ ᑲᓇᑕᐅᑉ ᐅᓪᓗᖓ ᓱᓕᔪᓂᒃ ᓈᒻᒪᒃᑐᓕᓂᕐᒧᑦ ᐊᒻᒪᓗ ᓴᐃᒪᖃᑎᒌᖕᓂᕐᒧᑦ, ᖃᐅᔨᒪᔾᔪᑕᐅᖕᒥᔪᖅ ᐊᐅᐸᔮᖅᑐᓂᒃ ᐅᕕᓂᕈᖅᓯᒪᓂᖅ ᐅᓪᓗᖓ, ᓵᑦᑎᓯᒪᕗᒍᑦ ᐊᑯᓂ ᐊᒻᒪᓗ ᐋᓐᓂᐊᓇᖅᑐᖅ ᐊᒃᑐᐃᓂᖓ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᑦ ᐃᓕᓐᓂᐊᕐᕕᖏᓐᓂᑦ ᐊᓪᓚᓄᑦ, ᐃᓄᖕᓄᑦ, ᐊᒻᒪᓗ ᐊᓪᓚᐃᖓᔪᓄᑦ ᑲᓇᑕᒥ. ᐃᖃᐅᒪᔪᒍᑦ ᓄᑕᖃᓂᒃ ᐊᖏᕐᕋᓚᐅᖅᓯᒪᓐᖏᑦᑐᓂᒃ. ᐅᒃᐱᕆᔭᕗᑦ ᐃᒃᐱᒋᔭᕗᑦ ᐃᓕᓐᓂᐊᕆᐊᖅᑎᑕᐅᓂᑯᑦ, ᐅᑯᐊ ᐋᓐᓂᖅᑕᐅᓯᒪᔪᑦ ᐅᖃᓪᓚᐅᓯᖃᖅᑎᓪᓗᒋᑦ ᐋᓐᓂᓇᖅᑐᒻᒪᕆᐋᓗᖕᓂᒃ ᓱᒃᑯᓴᖅᑕᐅᓯᒪᓂᕐᒥᖕᓂᒃ. ᓈᓚᒃᐳᒍᑦ ᓂᕆᐅᒋᔭᖏᓐᓂᒃ ᐊᒻᒪᓗ ᐅᓂᒃᑳᖏᓐᓂᒃ, ᐊᒻᒪᓗ ᐊᖏᖅᓯᒃᑲᓐᓂᖅᐳᒍᑦ ᐊᑐᖅᓯᔪᐃᓐᓇᐅᓂᐊᕋᑦᑕ ᐊᖁᑎᒋᓂᐊᖅᑕᖏᓐᓂᒃ ᓴᐃᒻᒪᖃᑎᒌᒃᐸᓪᓕᐊᓂᕐᒧᑦ.
“ᐊᕙᑖᓂᑦ 1867 ᐊᒻᒪᓗ 1996, ᒐᕙᒪᑐᖃᒃᑯᑦ ᐃᓕᓐᓂᐊᕆᐊᖅᑎᑎᕙᓚᐅᖅᑐᑦ ᐊᒃᓱᕈᐊᖃᖅᖢᑎᒃ ᐱᓪᓗᑎᒃ 150,000 ᐊᓪᓚᐃᑦ, ᐃᓄᐃᑦ, ᐊᒻᒪᓗ ᐊᓪᓚᐃᖓᔪᑦ ᓄᑕᖃᓂᒃ ᐃᓚᖏᓐᓂᑦ ᐊᒻᒪᓗ ᓄᓇᖏᓐᓂᑦ, ᐊᒻᒪᓗ ᐊᐅᓪᓚᖅᑎᓪᓗᒋᑦ ᐊᕕᒃᑎᓪᖢᒋᑦ ᐱᐅᓯᑐᖃᖏᓐᓂᑦ, ᐅᖃᐅᓯᖏᓐᓂᒃ,ᐊᒻᒪᓗ ᑭᓇᐅᓂᖏᓐᓂᒃ. ᐊᒥᓱᐋᓗᖕᓂᒃ ᐊᕐᕌᒍᓂᒃ ᑕᐃᒪᐃᑕᐅᓚᐅᖅᑐᑦ ᐅᓗᕆᐊᓇᖅᑐᒦᑎᑕᐅᓪᓗᑎᒃ ᐊᒻᒪᓗ ᑐᖁᖃᑦᑕᖅᖢᑎᒃ ᐊᒡᒐᖏᓐᓂ ᑖᒃᑯᐊ ᐃᓕᓐᓂᐊᕐᕖᑦ ᐃᒡᓗᖁᑎᒋᔭᐅᔪᓪᓗ. ᓴᐃᒪᖃᑎᒌᖕᓂᖅ ᐱᓯᒪᓂᖃᑐᐃᓐᓇᓐᖏᑦᑐᖅ ᑭᖑᓂᑦᑎᓐᓂᒃ ᑕᑯᓐᓇᕐᓂᕐᒥᒃ ᐊᒻᒪᓗ ᑐᑭᓯᓪᓗᑕ ᑕᒻᒪᓚᐅᕋᑦᑕ ᑭᖑᓂᑦᑎᓐᓂ. ᐅᓇᑦᑕᐅᖅ ᐱᔾᔪᑎᖃᖅᑐᖅ ᑐᑭᓯᓗᑕ ᑖᒃᑯᓂᖓ ᑕᒻᒪᓚᐅᖅᑕᑦᑎᓐᓂᒃ ᐅᑯᐊ ᐅᕙᑦᑎᓐᓂᒃ ᐋᕿᒃᓱᐃᑦᑎᐊᕈᑕᐅᔪᑦ ᐅᓪᓗᒥ.
“ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᒪᑦᑎᐊᖅᐳᑦ ᐱᓱᖃᑎᒋᓗᒋᑦ ᓄᓇᖅᑲᖅᑳᖅᓯᒪᔪᑦ ᓄᓇᖏᑦ ᒪᒥᓴᖅᐸᓪᓕᐊᑎᓪᓗᒋᑦ ᐊᑐᕐᓂᐊᖅᑕᖏᑦᑎᒍᑦ, ᐅᑯᐊ ᖁᑦᑎᓛᒥᒃ ᓯᕗᓪᓕᐅᑎᒋᐊᓕᑦ ᐃᑲᔪᕐᓗᒋᑦ ᑕᒪᐃᓐᓂ ᖃᓄᐃᑉᐸᓕᐊᓂᓕᒫᖏᑦᑎᒍᑦ. ᑲᔪᓯᓂᐊᕋᑦᑕ ᓴᓇᔭᕗᑦ ᐃᑲᔪᕈᑎᒋᓇᓱᐊᖅᑕᕗᑦ ᓇᓗᓇᐃᖅᓯᓗᑕ ᓄᑕᖃᓂᒃ ᐅᑯᐊᓗ ᐊᖏᕐᕋᓐᖏᑕᐃᓐᓇᕐᓂᑯᑦ ᐃᓕᓐᓂᐊᕆᐊᖅᑎᑕᐅᒐᒥᒃ, ᓇᓂᓗᒋᑦ ᐊᒻᒪᓗ ᐃᖃᐅᒪᑎᑦᑎᕕᒃᓴᑦ ᐊᑎᖃᓐᖏᑦᑐᓄᑦ ᐃᓗᕕᕐᓄᑦ, ᐊᒻᒪᓗ ᐃᒃᐱᒋᑦᑎᐊᕐᓗᒋᑦ ᑕᐃᒃᑯᐊ ᐃᓅᔪᓐᓃᓚᐅᖅᑐᑦ. ᐅᓇ ᐃᓚᒋᔭᖓ ᓄᖃᔮᓐᖏᑦᑐᒥᒃ ᐊᖏᖅᓯᒪᓂᖅᐳᑦ ᐊᑐᓕᖅᑎᑕᐅᓗᑎᒃ ᑭᒡᓕᓯᓐᓂᐊᖅᑎᒃᑯᑦ ᑲᒥᓴᓐ ᐱᓕᕆᐊᒃᓴᐅᖁᔭᖏᑦ. ᑕᒪᑐᒪᓂ ᐊᕐᕌᒍᒥ, ᑐᓴᕐᑎᑦᑎᓚᐅᖅᑐᒍᑦ ᑮᓇᐅᔭᒃᓴᓂᒃ ᐊᑐᖅᑕᐅᓂᐊᖅᑐᑦ ᐅᓇᑕᕈᑎᒋᓗᒋᑦ ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᓂᒃ ᑕᐃᒪᐃᖏᓐᓂᕋᐃᔪᑦ ᐊᒻᒪᓗ ᐳᐃᒍᖅᑕᐅᑦᑕᐃᓕᔾᔪᑎᒃᓴᖏᑦ ᖃᓄᐃᓚᐅᖅᑐᑦ ᐊᑖᒍᑦ ᑕᒪᓐᓇ ᓇᒻᒪᓐᖏᑦᑐᒻᒪᕆᐋᓗᒃ ᐱᓕᕆᔾᔪᑕᐅᓚᐅᖅᑐᖅ ᑕᐃᒪᓗ ᐃᒻᒪᑲᓪᓚᒃ ᐊᑐᖅᑕᐅᓚᐅᖅᑐᑦ ᐊᑐᖅᑕᐅᒃᑲᓐᓂᖁᓇᒋᑦ.
“ᐅᓪᓗᒥ ᐊᒻᒪᓗ ᐊᒡᒋᖅᑐᓂ ᐅᓪᓗᓂ, ᑲᔪᖏᖅᓴᐃᕗᖓ ᑲᓇᑕᒥᐅᓂᒃ ᑕᑯᖁᓪᓗᒋᑦ ᐊᑐᖅᑕᐅᓂᑯ ᐊᒃᑐᐃᓂᖓ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐃᓕᓐᐊᓂᕐᕕᖏᓐᓂᑦ, ᐃᓚᐅᓗᑎᒃ ᓄᓇᖅᑲᖅᑳᖅᓯᒪᔪᓂᑦ-ᐃᖏᕐᕋᑎᑕᐅᔪᑦ ᑲᓇᑕᐅᑉ ᐅᓪᓗᖓ ᓱᓕᔪᓂᒃ ᓈᒻᒪᒃᑐᓕᓂᕐᒧᑦ ᐊᒻᒪᓗ ᓴᐃᒪᖃᑎᒌᖕᓂᕐᒧᑦ ᖃᓄᐃᓕᐅᕈᑕᐅᔪᑦ ᓄᓇᖏᓐᓂ, ᐃᓕᑦᑎᓗᑎᑦ ᑕᒪᒃᑯᓂᖓ ᐅᓂᒃᑳᖏᓐᓂᒃ ᐃᓕᓐᓂᐊᕆᐊᖅᑎᑕᐅᓂᑯᑦ, ᐊᒻᒪᓗ ᐊᑐᕐᓗᑎᒃ ᐊᐅᐸᔮᖓᔪᒥᒃ ᐃᒃᐱᒍᓱᑦᑎᐊᕐᓂᖅ ᐱᓪᓗᒍ ᑕᒪᐃᓐᓂᒃ ᓄᑕᖃᓂᒃ ᐅᑯᐊᓗ ᐊᒃᓱᕈᖅᑎᑕᐅᓯᒪᔪᑦ ᐅᕝᕙᓘᓐᓃᑦ ᐃᓅᔪᓐᓃᖅᓯᒪᔪᑦ. ᑕᑯᓚᐅᖅᑕ ᖃᓄᖅ ᐊᑐᓂ ᐊᒻᒪᓗ ᐅᕙᒍᑦ ᐊᑐᓂ ᐃᑲᔪᑦᑎᕈᓐᓇᕐᓂᖅᑕᐅᕕᑕ ᓄᓇᖃᑦᑎᐊᕐᓂᕐᒥᒃ ᑲᓇᑕᒥ - ᐊᒻᒪᓗ ᐱᐅᓂᖅᓴᐅᔪᒥᒃ ᓄᓇᕐᔪᐊᕐᒦᖁᓪᓗᒋᑦ - ᑕᒪᐃᓐᓇ ᓱᓕᓂᒃᑯᑦ ᐊᒻᒪᓗ ᓴᐃᒪᖃᑎᒌᖕᓂᒃᑯᑦ.”