Ooma tuhkinay kenawayihtakooshiwin pi tosal Toroon not grawn piyee Itaykawweekihk L’ikol Ayimihikoowin Shaywaypichikun, ihtakwun itay 1-866-925-4419, mekiw ayimihikoowin kakayeshkimiwaywin pamihiwaywina ishi Ishkounikanak pi see famee akwa weestamawinawn tawnsheeshi chi-kawschitinamaen kootak miyeu la bonn sawntee weechihiwaywina ouschi Li gouvarnimaw di Kenadaw. Li Promyee Nawsyoon, aen Niskimoo, pi aen Michif kaw-natounamwak shaymawnk mashkawatishiwin weechihiwaywin chikee kawschitinayw Pakooshayimoowina poor Miywayawin Weechihiwaywin mouschi Shaywaypichikan itay 1-855-242-3310, keema daw li computer mouhchipawhpeekishkwaywin itay www.espoirpourlemieuxetre.ca.
Awa Kischee li Ministr, Justin Trudeau, anoush pakitinam kaw-pimitishahikawtayk weestamakaywin ouschi Mishiway itay En zhournee d’ La Vayritee pi Weechiwawhkoostouwin:
“Ishpee Mishiway itay En zhournee d’ La Vayritee pi Weechiwawhkoostouwin, meena kishkayistakwan ishi Aen Narawnzh la Shmeezh D’zhournee, kinakishkikawtaynaw ooma kinwaysh pi weeshakayistawkwuniwawn mawkouhtawin ouschi itaykawweekihk l’ikol en system ishi Li Promyee Nawsyoon, aen Niskimoo, pi aen Michif daw li tayraen. Kikishkishinaw lee zawnfawn namou kaw-keeweechik. Keeshchitaymawnanik Ishkounikanak, kaw-kee-kwatakistow ayimunoowin kichimahiwaywin. Kinitouhtaynaw sa kishkishouwina pi see nistwayr, pi ki-ahkamayihtaynaw kaw-awn pawr en shmaen ishi weechiwawhkoostouwin.
“Awnter 1867 pi 1996, la federal itaykawweekihk l’ikol en system kee-awnfors pawsci 150,000 Li Promyee Nawsyoon, aen Niskimoo, pi aen Michif lee zawnfawn ouschi see famee pi see alawntour, pi pashkaynayw ouschi kee-ishipimawchihounawniwun, la lawngaezh, pi nishtawaymikawshoowina. Mischayt kinwaysh kakwawtakishtawak pi wunihtawin aykwawnihin ouschi l’ikol. Weechiwawhkoostouwin si namou pikou mouschi wawpastamoowin pi nishitouhtamoowin pacheehkaywin si pawsee. Aykwawnima meena nishitouhtamoowin aykwawnihi pacheehkaywina kayawput keeshaykeewaystahikawshounaw anoush.
“Ooki Li Gouvarnimaw di Kenadaw si kishchayimouwak chi-pimouhtayw avek Indigene li alanwtour ishi see miywayawin ouwayaezh, kischeetayimouwin kaw-neekawnayihtamahk chi-weechihayahkik pisishkayistamahk itahtow yahkouhtaywin awnavawn. Niahkamay atoushkawtaynawn chi-weechihayahkik avek see koucheewin chi-nishtawinawayw li zawnfawn namou kaw-keeweechik ouschi itaykawweekihk l’ikol, chi-mishkawachik pi chi-kishkishihk itouwahk patapastamoowina nahiniwaywina, pi l'onoer aykwawniki kaw-kee-nipoowak. Ooma pahki ouschi ahkamay ashoutamakaywin chi-awpachistahk ooma La Vayritee pi Weechiwawhkoostouwin Neepawistamakaywin ishi Taypwachikaywin poor Kwayashkwatishiwin. Weeput ooma aen nawn, niki meena weestamawkaynawn aen tawd d'arzhawn chi-noutinamahk itaykawweekihk l’ikol awnwayischikaywin pi mawachistayahk kishkishiwin ouschi kaykwuy kaw-ishpayik awnter ooma tayrib en system chi-kayschinahow namou keestwawn aykwawnima chi-ishpayik.
“Anoush akwa neekawnihk, niki awnkourazhee aen zhawn'd Kenadaw chi-mamitonayistahk ouschi ahkamay mawkouhtawin ouschi itaykawweekihk l’ikol, takoowin ishi Indigene-neekawneewin Mishiway itay En zhournee d’ La Vayritee pi Weechiwawhkoostouwin kaw-etahkamikuhk daw see alawntour, kishkayista ouschi lee nistway ouschi Ishkounikanak, pi poustiska orawnzh poor l'onoe itahto li zawnfawn kaw-kee-kwatakistow keema kee-nipow. Madoon mamitonayistahk tawnsheeshi itahtow kiyanawn chikee weechihiwayweeyahk poor nawut pleu miyeur la kawnpawny – pi nawut pleu miyeur li tayr – shawpou la vayritee pi weechiwawhkoostouwin.”