ᐱᒻᒪᕆᐅᓂᖅᐹᖑᖕᒪᑦ ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᖃᖃᑦᑕᕐᓂᖏᑦ ᓄᓇᖃᖅᑳᖅᓯᒪᔪᓂᑦ ᐃᓄᖕᓂᑦ. 2017-ᒥᓂᑦ, ᐊᑑᑎᖃᑦᑎᐊᑐᒃᑯᑦ ᐱᓕᕆᖃᑎᒌᖕᓂᖏᑦ ᐃᓄᐃᑦ ᓯᕗᓕᖅᑏᑦ ᐃᑲᔪᕐᓂᖃᖅᓯᒪᕗᖅ ᓯᕗᒧᐊᑦᑎᑕᐅᓗᑎᑦ ᓴᐃᒻᒪᖃᑎᒌᖕᓂᖅ, ᓴᙵᑦᑎᑕᐅᓯᒪᓪᓗᓂᓗ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ, ᐊᒻᒪᓗ ᐋᖅᑮᓪᓗᑎᑦ ᐊᔪᖅᓴᙱᓐᓂᖅᓴᐅᓕᕐᓂᖏᑦ ᐃᓄᐃᑦ ᓄᓇᖓᖕᓂ.
ᑲᓇᑕᒥ ᓯᕗᓕᖅᑎᕐᔪᐊᖓᑦ ᔭᔅᑎᓐ ᑐᕉᑐ, ᐊᖓᔪᖅᑳᖅ ᓇᑖᓐ ᐆᐱᑦ ᐃᓄᐃᑦ ᑕᐱᕇᑦ ᑲᓇᑕᒥ, ᒥᓂᔅᑕᐅᔪᑦ ᐊᐅᓚᑦᑎᔩᑦ, ᐊᒻᒪᓗ ᓂᕈᐊᖅᑕᐅᓯᒪᔪᑦ ᐃᓄᐃᑦ ᓯᕗᓕᖅᑎᖏᑦ ᐃᓄᕕᐊᓗᐃᑦ ᑯᐊᐳᕇᓴᙵᓂᒃ, ᓄᓇᕗᑦ ᑐᙵᕕᒃ ᑎᒥᖓᓂᒃ, ᒪᑭᕕᒃ ᑯᐊᐳᕇᓴᙵᓂᑦ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᖏᖕᓂᑦ ᖃᕆᓴᐅᔭᒃᑯᑦ ᑲᑎᒪᖅᑲᐅᖕᒪᑕ ᐅᓪᓗᒥ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᑦᑐᑦ ᑲᑎᒪᔨᖏᑦ ᑲᑎᒪᓂᖃᖅᑎᓪᓗᒋᑦ. ᑕᓪᓕᒪᕆᓕᖅᑕᖓᖕᓂᒃ ᐊᕐᕌᒍᒥ, ᑲᑎᒪᔩᑦ ᑲᑎᒪᖅᑲᐅᕗᑦ ᕿᒥᕐᕈᓇᖦᖢᑎᑦ ᐱᕙᓪᓕᐊᓂᖏᖕᓂᒃ ᐊᒻᒪᓗ ᓯᕗᒧᐊᖅᑎᑦᑎᒍᒪᓪᓗᑎᑦ ᐃᖅᑲᓇᐃᔮᕆᔭᐅᔪᓂᑦ ᓯᕗᓪᓕᐅᑎᑕᐅᔪᓂᑦ .
ᓄᓇᕐᔪᐊᕐᒥ ᓄᕙᒡᔪᐊᕐᓇᖅ-19 ᐊᐅᑦᑑᑖᓘᖃᑦᑕᑎᓪᓗᒍ ᐅᓪᓗᒥᐅᔪᖅ ᐊᒃᓱᕈᕐᓇᖅᑐᓂᑦ ᐱᓗᐊᓕᖅᑎᑦᑎᓯᒪᖕᒪᑦ ᓄᓇᓕᐅᔪᓂᑦ ᐃᓄᐃᑦ ᓄᓇᖓᖕᓂ. ᐅᓪᓗᒥᐅᔪᖅ ᑲᑎᒪᓂᖃᖅᑎᓪᓗᒋᑦ ᐅᖃᐅᓯᖃᓗᐊᖅᑲᐅᔪᒍᑦ ᖃᓄᖅ ᐃᖅᑲᓇᐃᔭᖃᑎᒌᖏᖕᓇᕈᓐᓇᕐᒪᖔᑦᑕ ᑲᒪᒋᔭᐅᖁᓪᓗᒋᑦ ᐃᓅᓯᕐᒧᑦ−ᑮᓇᐅᔭᓕᐅᕐᓂᕐᒧᑦ ᓇᓕᒧᒌᙱᓗᐊᖅᑐᐊᓘᑎᑕᐅᖃᑦᑕᕐᓂᖓ ᐃᓄᐃᑦ ᓄᓇᖓᑕ ᓄᓇᓕᖏᖕᓂ ᐊᔾᔨᐅᙱᑦᑐᒥᒃ ᐅᓗᕆᐊᓇᖅᑐᒨᖅᑎᑦᑎᓂᖅᓴᐅᓕᕈᓐᓇᖅᖢᓂ ᐊᑦᑐᐃᓂᖃᕐᓂᖓᑦ ᓄᕙᒡᔪᐊᕐᓇᖅ-19.
ᑲᑎᒪᓂᖃᖅᑎᓪᓗᑕ, ᑲᓇᑕᑉ ᓯᕗᓕᖅᑎᕐᔪᐊᖓᑦ, ᐊᖓᔪᖅᑳᖅ ᐆᐱᑦ, ᐊᒻᒪᓗ ᑲᑎᒪᔨᐅᖃᑕᐅᔪᑦ ᐃᓱᒪᒃᓴᖅᓯᐅᕐᓂᖃᖅᑲᐅᔪᑦ ᐱᕚᓪᓕᖅᓯᒪᓂᕆᓕᖅᑕᖏᖕᓂᒃ ᐊᕐᕌᒎᓚᐅᖅᑐᒥᒃ, ᐱᖃᓯᐅᑎᓪᓗᒍᓗ ᐋᖅᑭᒃᑕᐅᓯᒪᓂᖓ ᐃᓛᒃᑰᖓᔪᖅ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᖓ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᑕ ᑲᑎᒪᔨᖏᑦᑕ ᐊᐅᓚᔾᔪᓯᖓᒍᑦ. ᑖᓐᓇ ᐊᒻᒪᓗ ᐊᓯᖏᑦ ᐱᕙᓪᓕᐊᖃᑎᒌᒃᓯᒪᓂᕆᔭᖏᑦ, ᓲᕐᓗᒃ ᐋᖅᑭᒃᓱᐃᖃᑎᒌᖏᖕᓇᕐᓂᖏᑦ ᐃᓄᐃᑦ ᓄᓇᖓᑕ ᐊᑐᐊᒐᖓᓂᒃ, ᐱᕙᓪᓕᐊᑎᑦᑎᒍᑕᐅᓯᒪᕗᖅ ᓴᐃᒻᒪᖃᑎᒌᒐᓱᐊᕈᑕᐅᓪᓗᓂ, ᐃᓄᐃᑦ ᓇᖕᒥᓂᖅᓱᖃᑦᑕᕐᓂᖏᑦ, ᐊᒻᒪᓗ ᐃᑲᔪᖅᑐᐃᓪᓐᓗᓂ ᐊᑑᑎᖃᑦᑎᐊᖅᑐᒥᒃ, ᓄᓇᓕᖕᓄᑦ ᑲᒪᒋᔭᐅᓯᒪᔪᓂᑦ ᐋᖅᑭᒍᑎᓕᐊᕆᔭᐅᓯᒪᔪᓂᑦ ᓴᖅᑮᓯᒪᓪᓗᓂᓗ ᐊᔾᔨᐅᙱᑦᑐᓂᑦ ᐱᔾᔪᑎᓂᒃ ᐃᓄᖕᓄᑦ ᓵᙵᔭᐅᓲᓄᑦ.
ᑲᑎᒪᔨᐅᔪᓪᓗ ᐅᖃᐅᓯᖃᖅᑲᐅᒋᕗᑦ ᐃᖅᑲᓇᐃᔮᕆᔭᐅᖏᓐᓇᖅᑐᓂᒃ ᐊᒥᓱᓂᑦ ᐱᔾᔪᑎᓂᒃ, ᐱᖃᓯᐅᑎᓗᒋᑦ ᓂᕿᒃᓴᖃᑦᑎᐊᕐᓂᕐᒧᑦ, ᑲᑎᒪᓂᕐᒧᑦ ᒪᑭᒪᔾᔪᑎᓄᑦ ᐱᔭᕆᐊᓕᖏᑦ ᐃᓄᐃᑦ ᓄᓇᖓᖕᓂ, ᐊᑐᓕᖅᑎᑦᑎᓗᑎᒃ ᐱᖁᔭᕐᒥᒃ ᐃᒃᐱᒍᓱᑦᑎᐊᕐᓗᑎᒃ ᐃᓪᓚᓂᒃ, ᐃᓄᖕᓂᒃ ᐃᖅᑭᓖᑦ ᓱᕈᓯᖏᓪᓗ, ᒪᒃᑯᒃᑐᑦ, ᐃᓚᒌᑦ, ᐋᖅᑭᒃᓱᐃᕙᓪᓕᐊᓂᖅ ᐊᔾᔨᒌᙱᓐᓂᖏᑦ ᑐᙵᕕᓖᑦ ᓄᓇᖃᖅᑳᖅᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒪᓕᒐᓕᐊᖑᔪᒪᔪᑦ, ᑲᒪᒋᔭᖃᕐᓂᕐᒥᑦ ᐋᓐᓂᖅᑎᕆᓂᕐᒥᑦ ᐃᓄᓐᓂᑦ ᐊᕐᓇᓂᑦ, ᓂᕕᐊᖅᓵᓂᓪᓗ, ᐊᒻᒪᓗ ᐊᕐᓇᐅᖃᑎᒥᓂᒃ ᐊᖑᑕᐅᖃᑎᒥᓂᒃ ᐊᖑᑎᓂᓪᓗ ᐊᕐᓇᓂᓪᓗ ᐊᐃᑉᐸᖃᖃᑦᑕᓲᑦ ᐊᕐᓇᕈᖔᖅᓯᒪᔪᑦ ᐊᖑᑎᕈᖔᖅᓯᒪᔪᓪᓗ ᐊᕐᓇᖅᑎᑐᑦ ᐊᓐᓄᕌᖅᓯᒪᓲᑦ ᐃᓄᐃᑦ ᒪᕐᕉᖕᓂᒡᓗ ᐊᓂᕐᓂᖃᕐᓂᕋᖅᑐᑦ ᐃᓄᐃᑦ, ᐊᒻᒪᓗ ᐃᑲᔪᖅᑐᖅᑕᐅᓪᓗᓂ ᐃᓄᒃᑐᑦ ᐊᑐᖅᑕᐅᒋᐊᕐᔫᒥᓕᖅᑎᑕᐅᓂᖓ, ᐊᓯᐅᔭᐅᑦᑕᐃᓕᒪᓂᖓ, ᓴᐳᔾᔭᐅᓯᒪᓂᖓᓗ ᐊᒻᒪᓗ ᐅᖃᐅᓯᖅ ᐊᑐᖅᑕᐅᔫᒥᖁᓪᓗᒍ ᐱᕙᓪᓕᐊᒍᑎᒋᔭᐅᒐᓱᐊᕐᓂᖏᑦ ᐅᖃᐅᑕᐅᖅᑲᐅᒋᓪᓗᑎᑦ.
ᐊᒻᒪᓗᒃᑲᓐᓂᖅ, ᑲᑎᒪᔩᑦ ᐋᖅᑮᖅᑲᐅᒋᕗᑦ 2021 ᐃᖅᑲᓇᐃᔮᖃᕐᓂᐊᕐᓂᕐᒧᑦ ᐸᕐᓇᐅᑎᖓᓂᒃ ᓴᐃᒻᒪᖃᑎᒌᒍᑎᒋᔭᐅᓇᓱᐊᕈᑎᓄᑦ, ᓇᓗᓇᐃᔭᐃᓪᓗᑎᓪᓗ ᖃᓄᖅ ᐱᕕᖃᓕᖅᑎᑦᑎᔪᓐᓇᓂᖅᓴᐅᒐᔭᕐᒪᖔᑕ ᐃᓄᖕᓄᑦ ᐋᓐᓂᐊᕐᓈᓗᖕᒧᑦ ᐊᓂᒎᑎᖃᕋᓱᐊᖅᑎᓪᓗᑕ, ᐊᒻᒪᓗ ᐊᕝᕕᐊᕈᑕᐅᔪᓂᑦ ᑲᒪᓇᓱᐊᖅᖢᑕ ᐊᔾᔨᐅᙱᑦᑐᒥᒃ ᑐᙵᕕᖃᖅᑐᑦ ᑮᓇᐅᔭᖃᖅᑎᑕᐅᓕᖁᓪᓗᒋᑦ ᐱᖁᑎᕐᔪᐊᓕᕆᔾᔪᑕᐅᔪᓄᑦ ᐃᓄᐃᑦ ᓄᓇᖓᖕᓂ.
ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕐᓂᖃᖅᑲᐅᒋᕗᑦ ᑲᑐᑎᔭᒥᖕᓂᒃ ᑲᒪᒋᓂᐊᕐᓂᕋᖅᓯᒪᔭᖓᓂᒃ ᓄᑖᕈᕆᐊᖅᑎᑕᐅᓪᓗᓂ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖃᑦᑕᕐᓂᖏᑦ ᐊᒻᒪᓗ ᓴᐃᒻᒪᖃᑎᒌᖕᓂᒃ ᑐᙵᕕᒋᔭᐅᓗᑎᑦ ᓇᓗᓇᐃᖅᓯᓯᒪᓂᕗᑦ ᐱᔪᓐᓇᐅᑎᓂᑦ, ᐃᑉᐱᒍᓱᑦᑎᐊᖃᑎᒌᖕᓂᕐᒥᒃ, ᐱᓕᕆᖃᑎᒌᖕᓂᕐᒥᒃ, ᐊᒻᒪᓗ ᐃᖅᑲᓇᐃᔭᖃᑎᒌᖕᓂᕐᒥᒃ.
ᐅᖃᐅᑕᐅᓯᒪᔪᑦ
“ᓄᓇᕐᔪᐊᕐᒥ ᓄᕙᒡᔪᐊᕐᓇᖅ-19 ᐊᐃᑦᑑᑖᓘᖃᑦᑕᑎᓪᓗᒍ ᐊᑦᑐᖅᑕᐅᑎᑦᑎᓯᒪᒃᑲᓐᓂᒻᒪᕆᑉᐳᖅ ᐋᓐᓂᐊᖅᑕᐃᓕᒪᓂᖏᖕᓂᒃ ᐊᒻᒪᓗ ᖃᓄᐃᑦᑕᐃᓕᒪᓂᖏᖕᓂᒃ ᐃᓄᐃᑦ ᓄᓇᖓᖕᓂᒥᐅᓂᑦ. ᐅᓪᓗᒥᐅᔪᖅ ᑲᑎᒪᓂᕗᑦ ᐱᒻᒪᕆᐊᓘᖅᑲᐅᕗᖅ ᑲᒪᒋᔭᖃᖅᖢᑕ ᑕᒪᒃᑯᓂᖓ ᓇᓕᒧᒌᙱᒍᑎᒋᔭᐅᓲᓂᑦ, ᓯᕗᒧᐊᒃᓯᑎᑦᑎᓯᓐᓈᖅᖢᑕᓗ ᓴᐃᒻᒪᖃᑎᒌᖕᓂᑦᑎᓐᓂᒃ, ᓴᙵᑦᑎᑕᐅᓪᓗᓂᓗ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖃᑦᑕᕐᓂᖏᑦ, ᐊᒻᒪᓗ ᐊᑑᑎᖃᓪᓚᑦᑖᖅᑐᒥᒃ ᐃᓄᐃᑦ ᐃᓅᓯᖏᖕᓂᒃ ᖃᓄᖅᑑᖅᖢᑕ ᑲᒪᒋᔭᖃᖅᓯᓐᓈᖅᑲᐅᓪᓗᑕ.”
“ᑭᖑᓪᓕᖅᐹᒥᒃ ᑲᑎᒪᓂᕆᓚᐅᖅᓯᒪᔭᑦᑎᓐᓂᒃ ᑲᓇᑕᐅᑉ ᓯᕗᓕᖅᑎᕐᔪᐊᖓ ᔭᔅᑎᓐ ᑐᕉᑑ ᒫᔾᔨ 2020-ᐅᑎᓪᓗᒍ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᑦᑐᑦ ᑲᑎᒪᔨᖏᑦ, ᓄᓇᕐᔪᐊᖅ ᐊᓯᔾᔨᖅᓯᒪᓕᕐᒪᑦ, ᐊᒻᒪᓗ ᐱᓕᕆᖃᑎᒌᖕᓂᕗᑦ ᐱᕙᓪᓕᐊᒍᑎᒋᔭᐅᓯᒪᔪᖅ ᐱᓕᕆᖃᑎᒌᖕᓂᒃᑯᑦ ᐊᐅᓚᓂᖓᒍᑦ ᐱᕐᔪᐊᖑᓯᒪᒻᒪᕆᓕᖅᐳᖅ ᑐᐊᕕᕐᓇᖅᑐᒃᑯᑦ ᐃᑲᔪᖅᑐᐃᔾᔪᑎᒃᓴᓂᑦ ᑲᑎᖅᓱᐃᓯᒪᓕᖅᖢᑕ ᐃᓄᖕᓄᑦ ᑲᓇᑕᓕᒫᕐᒥ. ᑕᒪᓐᓇ ᐱᓕᕆᖃᑎᒌᖕᓂᕗᑦ ᐱᔾᔪᑕᐅᓪᓗᐊᖅᐳᖅ ᑲᔪᓯᓂᕆᓂᐊᕐᓂᑦᑎᓐᓂᒃ ᐱᕚᓪᓕᖁᓪᓗᑕ ᑲᑐᑎᔭᑦᑎᓐᓂᒃ ᑎᑭᓐᓇᓱᐊᖅᑕᑎᓐᓂᒃ ᓇᓕᒧᒌᔾᔫᒥᓂᐊᕐᒪᑕ ᐃᓄᐃᑦ ᐊᒻᒪᓗ ᐊᓯᖏᑦ ᑲᓇᑕᒥᐅᑕᐅᔪᑦ ᐃᓅᓯᖏᑦ.”
ᓇᐃᓈᖅᓯᒪᔪᑦ ᑐᑭᓯᒋᐊᕈᑏᑦ
- ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᖕᓄᑦ ᑲᑎᒪᔨᖏᑦ ᐋᖅᑭᒃᑕᐅᓚᐅᖅᓯᒪᕗᖅ ᕖᕝᕗᐊᕆ 2017−ᖑᑎᓪᓗᒍ. ᐋᖅᑭᒃᑕᐅᓚᐅᖅᓯᒪᖕᒪᑦ ᑐᙵᕕᖃᖅᖢᑎᑦ ᓇᓕᒧᒌᑦᑐᒃᑯᑦ ᐱᓕᕆᖃᑎᒌᖕᓂᖏᑦ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐱᒻᒪᕆᐅᖕᒪᑦ ᓴᐃᒻᒪᖃᑎᒌᖕᓂᕐᒧᑦ ᐱᕙᓪᓕᐊᑎᑕᐅᓇᓱᐊᕐᓂᖓᓄᑦ.
- ᑲᑎᒪᔩᑦ ᑲᑎᒪᖃᑎᒌᓲᑦ ᐱᖓᓱᐊᖅᑎᖅᖢᑎᑦ ᐊᕐᕌᒍᒥ. ᐊᑕᐅᓯᐊᖅ ᐊᕐᕌᒍᒥ ᐃᒃᓯᕙᐅᑕᐅᖃᑎᒌᓲᒃ ᑲᓇᑕᒥ ᓯᕗᓕᖅᑎᕐᔪᐊᖓᑦ ᐊᒻᒪᓗ ᐊᖓᔪᖅᑳᖓᑦ ᐃᓄᐃᑦ ᑕᐱᕇᑦ ᑲᓇᑕᒥ.
- ᑲᑎᒪᔨᓄᑦ ᓈᓚᒃᑎᖃᐅᓲᖑᒋᕗᑦ ᐊᖓᔪᖅᑳᕆᔭᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ, ᑲᓇᑕᒥ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᑦ, ᐊᒻᒪᓗ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.
- ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᖕᓄᑦ ᑲᑎᒪᔨᖏᑕ ᓯᕗᓪᓕᐅᑎᓪᓗᓂᒋᑦ ᑲᒪᒋᖃᑦᑕᕐᓂᐊᕐᓂᕋᖅᓯᒪᔭᖏᑦ ᐅᑯᐊᖑᕗᑦ:
- ᐃᓄᐃᑦ−ᒐᕙᒪᑐᖃᒃᑯᑦ ᓄᓇᑖᕈᑕᐅᔪᑦ
- ᐃᓄᐃᑦ ᓄᓇᖓᖕᓄᑦ ᐊᑐᐊᒐᖃᕐᕕᖓᑦ
- ᐃᓄᒃᑐᑦ ᐊᑐᕐᔫᒥᓕᖅᑎᑕᐅᒃᑲᓐᓂᖅᑎᑕᐅᓂᖓᑦ, ᐅᖃᐅᓯᖅ ᐊᑐᖅᑕᐅᖏᖕᓇᕐᓂᖓᑦ, ᐊᒻᒪᓗ ᐊᑐᖅᑕᐅᒃᑲᖅᑎᓐᓇᓱᐊᕐᓂᖓᑦ
- ᓴᐃᒻᒪᖃᑎᒌᖕᓂᕐᒧᑦ ᖃᓄᐃᓕᐅᕈᑕᐅᓲᑦ
- ᐃᓕᓐᓂᐊᕐᓂᓕᕆᓂᖅ, ᐃᓕᓐᓂᐊᓕᓵᕐᓂᖅ, ᐊᒻᒪᓗ ᐱᓕᒻᒪᒃᓴᕐᓂᖅ
- ᐋᓐᓂᐊᖅᑕᐃᓕᒪᓂᖅ ᐊᒻᒪᓗ ᖃᓄᐃᑦᑕᐃᓕᒪᓂᖅ
- ᐊᕙᑎᓕᕆᓂᖅ ᐊᒻᒪᓗ ᓯᓚᑉ ᐊᓯᔾᔨᕐᓂᖓᑦ
- ᐃᒡᓗᓕᕆᓂᖅ ᐊᒻᒪᓗ ᐱᖁᑎᕐᔪᐊᓕᕆᓂᖅ
- ᐱᕙᓪᓕᐊᔪᓕᕆᓂᖅ ᐊᒻᒪᓗ ᓂᐅᕕᖃᑦᑕᖅᑐᓕᕆᓂᖅ
- ᐱᖁᔭᒃᓴᓕᐅᕈᑕᐅᓂᐊᖅᑐᑦ ᓯᕗᓪᓕᐅᑎᑕᐅᖁᔭᐅᔪᑦ
- ᐃᓄᐃᑦ ᓄᓇᖓᑦ ᐃᓄᖕᓄᑦ ᓄᓇᖁᑎᒋᔭᐅᖕᒪᑦ ᑲᓇᑕᒥ. ᓄᓇᒋᔭᖏᑦ ᐱᖃᓯᐅᔾᔨᕗᑦ ᓄᓇᒥ, ᐃᒪᕐᒥ, ᐊᒻᒪᓗ ᓯᑯᒥ ᐃᓄᕕᐊᓗᐃᑦ ᓄᓇᖓᑕ ᓄᓇᑦᓯᐊᕐᒥ, ᓄᓇᕗᑦ, ᓄᓇᕕᒃ ᑯᐸᑭ ᐅᐊᖕᓇᖓᓂ, ᐊᒻᒪᓗ ᓄᓇᑦᓯᐊᕗᑦ ᓛᕙᑐᐊᕆ ᐅᐊᖕᓇᖓᓂ ᑖᒃᑯᐊᖑᓪᓗᑎᑦ.
- ᒫᓐᓇᒫᕈᓘᓚᐅᖅᑕᖅ ᑐᓴᖅᑎᑦᑎᓂᕆᓚᐅᖅᑕᖏᑦ ᐅᑭᐅᖅᑕᖅᑐᒥ ᑭᒡᓕᕆᔭᐅᓂᖓᑦ ᐱᔾᔪᑎᖃᓗᐊᖅᑐᖅ ᐱᓕᕆᖃᑎᒌᖕᓂᒃᑯᑦ ᑲᒪᒋᔭᖃᕆᐊᕐᓂᖏᑦ ᐋᖅᑭᓱᖅᓯᒪᓂᕆᔭᐅᒐᔭᖅᑐᑦ ᒐᕙᒪᒃᑯᑦ ᐃᓱᒪᓕᐅᖅᑎᖏᖕᓄᑦ ᓯᕗᒧᐊᓐᓂᖃᖁᓪᓗᒋᑦ ᑕᒪᒃᑯᓂᖓ. ᑲᓇᑕᒥ ᒐᕙᒪᒃᑯᑦ ᐃᖅᑲᓇᐃᔭᖃᑎᖃᐃᓐᓇᕐᓂᐊᖅᐳᑦ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐊᒻᒪᓗ ᓄᓇᓕᐅᔪᓂᑦ ᓯᕗᓪᓕᐅᑎᑕᐅᓪᓗᑎᑦ ᑲᒪᒋᔭᐅᖁᔭᐅᔪᑦ ᓯᕗᒧᐊᒍᑎᒋᔭᐅᔪᓐᓇᕐᓂᐊᕐᒪᑕ ᐊᒻᒪᓗ ᖃᐅᔨᒪᑦᑎᐊᑎᑦᑎᒍᑕᐅᓂᐊᕐᒪᑕ ᐊᐅᓚᑕᐅᓂᖏᑦ ᐱᓕᕆᐊᑦ ᐊᒻᒪᓗ ᐱᔨᑦᑎᕋᕈᑏᑦ ᐊᔾᔨᖃᕐᓂᐊᕐᒪᑕ ᐃᓄᐃᑦ ᓄᓇᖓᑕ ᓄᓇᓕᒋᔭᖏᑕ ᑭᙴᒪᒋᔭᖏᖕᓂᑦ.
- ᑕᖅᑭᐅᓚᐅᖅᑐᒥᒃ, ᑲᓇᑕᒥ ᒐᕙᒪᒃᑯᑦ ᓇᓗᓇᐃᖅᓯᒃᑲᓐᓂᓚᐅᕆᕗᑦ ᑲᒪᒋᔭᖃᕐᓂᐊᕐᓂᕋᖅᓯᒪᔭᑐᖃᖓᓂᒃ ᐊᑐᕐᓂᐊᕐᓗᑎᑦ ᑮᓇᐅᔭᓂᑦ $42 ᒥᓕᐊᓐ ᑮᓇᐅᔭᓂᑦ ᑕᓪᓕᒪᑦ ᐊᕐᕌᒎᓛᖅᑐᓄᑦ ᐊᑯᓂᐅᑎᒋᔪᖅ ᐊᑐᖅᑕᐅᔪᒃᓴᒫᓂᑦ ᐃᑲᔪᖅᑕᐅᖁᓪᓗᒋᑦ ᐃᓄᒃᑐᑦ ᐅᖃᐅᓯᕐᒧᑦ ᖃᓄᐃᓕᐅᕈᑎᒋᔭᐅᓇᓱᐊᖅᑐᑦ ᐊᒻᒪᓗ ᐃᓕᓐᓂᐊᕐᓂᓕᕆᓂᖅ ᓄᓇᕗᒻᒥ.
- ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦᑕ ᐱᖁᔭᖓᑦ, ᐋᖅᑭᓱᖅᑕᐅᓚᐅᖅᓯᒪᔪᖅ ᑐᓴᕆᐊᕐᕕᖃᖃᑦᑕᓚᐅᖅᖢᑎᑦ ᓄᓇᖃᖅᑳᖅᓯᒪᔪᑦ ᐃᓄᖏᖕᓂᒃ, ᐊᒻᒪᓗ ᐃᑲᔪᖅᑐᐃᑎᑦᑎᒍᑕᐅᓇᓱᐊᖅᑐᖅ ᑕᓱᖅᑕᐅᓗᑎᑦ, ᐊᑐᕐᔫᒥᓕᖅᑎᑕᐅᒃᑲᓐᓂᕐᓗᑎᑦ, ᐊᒻᒪᓗ ᐊᑐᖅᑕᐅᖏᖕᓇᕋᓱᐊᖅᖢᑎᑦ, ᓴᙵᑦᑎᑕᐅᓗᑎᓪᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᑲᓇᑕᒥ, ᐊᖏᖅᑕᐅᓚᐅᖅᓯᒪᕗᖅ ᔫᓂ 21, 2019.
- ᐅᑭᐊᒃᓵᖑᑎᓪᓗᒍ 2020-ᒥ, ᑲᓇᑕᒥ ᒐᕙᒪᒃᑯᑦ ᐱᒻᒪᕆᐅᔪᓂᑦ ᐱᕙᓪᓕᐊᓂᖃᓚᐅᖅᓯᒪᕗᑦ ᓯᕗᒧᐊᑦᑎᑕᐅᖁᓪᓗᒍ ᐊᑐᓕᖅᑎᑕᐅᓂᖏᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦᑕ ᐱᖁᔭᖓᓂᒃ ᖃᕆᓴᐅᔭᒃᑯᑦ ᑐᓴᕆᐊᕐᕕᖃᖃᑦᑕᕈᓘᔭᖅᖢᑎᑦ ᑲᓇᑕᓕᒫᕐᒥ.