Main Container

logo

Inuit-Government-kut Piliriqatigiinningita Katimajiralaangit kajusititsijut amiqqaqtaullutik sivulliqpautitauqujausimajunut piliriani

Main Content

Canada-mi Angijuqqaarjuaq Justin Trudeau, Angijuqqaaq Natan Obed, Inuit Tapiriikkunnut Kanatami, Minister-gijaujut Katimajingit, ammalu niruaqtausimallutik Inuit sivuliqtigijangit Inuvialuit Aviktuqsimaningani Corporation-ngasanit, Nunavut Tunngavik Timiqutinganit, Makivik Corporation-nganit, ammalu Nunatsiavut Gavamanganut ullumi katinniqalauqput katimaqatigiinniaqtillugit Inuit-Government-kut Piliriqatigiinnirmut Katimajiralaangit. Katimajiralaat katinniqalauqput qimirruniaqsunigit piliriqatigiiksimalirniujut ammalu sivummugiaqtitausimaliqullugit amiqqaqtaullutik sivulliqpautitaqujausimajut ukiuriliqtanganut sitamanik (4) piliriqatigiinnirni. 

Katimajiralaat ilagiaqsilauqput marruunnik nutaangullutik turaarvigijaujutsanik, Pivalliajulirinirni/pinasuarusiuvagialinni, ammalu Maligarjualirinirmi Sivulliqpautitauqujaujut, piliriaksarilianiktaminnut sivulliqpautitauqujausimajunut. Ilagiaqtitsisimalilaurmijut turaarviksauqujaulluni atuliqtitauvallianingata Iqqaqtuivviktigut Ikajuqtugausimaliqullugit Canada-limaami Killisiniaqtikkut Tukisiniarutigisimajangit Asiujijausimajut ammalu Inuaqtausimajunut Nunaqaqqaaqsimajuit Arnangita ammalu Niviaqsiangita taimaulianiktunut sivulliqpautitauqujaulluti saimmaqatigiiksimalirnirmut, ammalu ilijauqatausimajunut iglulirinirmi ammalu taimaulianiktunut piliriniqarniujunut sivulliqpautitauqujaullutik.

Uqallausiqaqatigiilauqput kajusititausimallutik piliriangujunut amisurlaullutik, ilaqaqtitaullutik:

  • Piusigiaqtitsinirmik atuliqtitauvallianingita Inuit nunalirinirmut angirutingit aaqqiksuiqatigiiksimaniqtigut maligaqutiujunik ammalu qimirruijjutiuvagajaqtunik
  • Tusaumaliqtitsiniq atuliqtitauningita Nunaqaqqaaqsimajut Uqausingita Maligaqutiit, ammalu ikajuqturlugu satuqsivallianiq, pivaalliqtitsiniq, taimaunginnaqtittiniq ammalu sanngiliqtittiniq Inuktut uqausirmik Inuit Nunangannit.
  • Atuliqtitsiniq Ukiuqtaqtumi ammalu Ukiuqtaqtumiut Maligaqutingata Tunngavvinginik, ammalu piliriniqalirnirmik nutauliqtitausimaliqullugit aaqqiksuiqatigiinniujut pilirijjusiuvanniaqtunut pilirianik, maligaqutinik, ammalu maligarjuaqutinik
  • Piliriniqarviujuni ungasikturautiniujut Inuit Nunangatta ammalu Canada-miunguqatingita qaniglisimaliqtillugit piliriniqarniqtigut naittuutitaulutik, qitianiqpasimiittutigut, ammalu akuniiqtumut iglulirinirmi ammalu nunaliujuni iqqanaijarviujunit pijausimaliriaqaqtunik

Ukiuq atuqpallianingani, Canada-mi Government-kungit ammalu Inuit Tapiriikkut Kanatami pimmariutiullutik piliriningit sivummugiaqsimalilaurmijut saimmaqatigiiksimalirajarnirmi piliriani. Tamakkua piliriangusimaliqpalliajut ilaqaqput Canada-mi Government-kut mamiavviqalaurninginik Qikiqtani Inunginnut ilinngaititsisimaniujunut government-tuqakkut maligaqutinginit Qikiqtani aviktuqsimaningata iluani ukiungit 1950-init 1975-inut atuqtillugit.

Inuit-Government-kut Piliriqatigiinnirmut Katimajiralaangit takuksautitsisimavut nutauliriaqtitausimalluni Inuit-Government-kut piliriqatigiinniuliqtunut piliriniqarniarnirminnut ammalu saimmaqatigiiksimalirniarnirnut tunngavviqaqtitausimallutik ilitarijausimalirningita pijunnautigijaujut, upigiturautsiarlutik, piliriaqaqatigiiklutik, ammalu ikajuqatigiiklutik piliriniqarniarnirminnik.

Uqaqtausimajut

“Ullumi katimaqatiqarnivut Inuit sivuliqtigijanginik ikajurniqammarilauqtuq pitaqaliqtitsigiamut ammalu sivunirmi piliriqatigiigunnarnirmut. Piliriqatiqarniqtigut sulillutik piliriaqaqatigiinnirmi, Katimajiralaangujut pimmariujutigut sivummugiaqtitsijunnaqsilaurmata ammalu nanisisimaliqsutik akuniiqtumut ammalu miksiqatsiaqtutigut aaqqigiarutiksaujunnaqtunik pivalliajuliriniujuni nunaliujunit Inuit Nunanganni. Kajusititsimaniaqtugut turaarviksaqarnittinnik pijjutiuluaqsutik nunaliujuni sivulliqpautitauqujausimajunik sulillariktutigut ikajurniqaqpaktunik inunnut, suurlu iglulirinirmut ammalu uumaqtitsigiakkannirnirmik."

Niqturnaqtuq, Justin Trudeau, Canada-mi Angijuqqaarjuaq

“Ullumi katimanirilauqtangat Inuit-Government-kut Piliriqatigiinningita Katimajiralaat piruqtittigiarutiusimavuq sannginiqatsiaqtuulluni piliriqatigiiksimaliuliqtunik ukiunut pingasunut, nutauliqtitsigialauqpugut amiqqarutigillugit piliriniqarumanirnik turaangajunut nunalirinirmi angirutiusimajunit atuliqtitsisimaliriamik, uqausilirinirmut, iqqanaijarviujut aaqqiumanirijanginut, ammalu atuliqtitsigiamik Inuit Nunanganni maligaqutiulirajaqtumik gavamaujut iluani. Ukiuriniaqtattinni, piliriqatigiinniaqtugut 10-ngujunik sivulliqpautitauqujausimajunik saqqitausimaliqullugit asijjiqtausimaliriaqaqtut Inunnut, taimalu ikajurniqalirajaqtunik Canada-miulimaanut.”

Angijuqqaaq Natan Obed, Inuit Tapiriit Kanatami

Qanuilinganinginik Takugiarniq

  • Inuit-Government-kut Piliriqatigiinningita Katimajiralaat pigiaqtitaulauqsimavut February 2017-mi. Pigiaqtitaulauqsimallutik tunngavviqaqtitaullutik naliqqariiglutik piliriqatigiigunnarningit Inuit ammalu Government-kut taimaujariaqallaringmat saimmaqatigiiksimalirajarnirmut.
  • Katimajiralaat iksivautaqatigiiktutik iksivautaqaqput Canada-mi Angijuqqaarjuarijaujumik ammalu Angijuqqaarijaujumik Inuit Tapiriikkunnut Kanatami.
  • Katimajiralaat ilaqatautitsimmijut tusaajaqtuqsimavaktunik angijuqqaangullutik Canada-mi Makkuktut Inuit Katimajinginnit, Pauktuutit Aarnait Inuit Canada-mit, ammalu Inuit Ukiuqtaqtumi Katimajingit Kanatamit.
  • Inuit-Government-kut Piliriqatigiinningita Katimajiralaangita sivulliqpautitaksaqutingit ukuanguvut:
    • Inuit-Government-kut nunaliriningit
    • Inuit Nunangata maligaqutingit aaqqiktausimalirunnarningit
    • Uummaqtitsigiakkannirniq, aaqqiumatitsigiarniq, ammalu quvvaqtitsigiarniq Inuktut uqausirmik
    • Saimaqatigiiksimaliriarnirmut piliriangujut
    • Ilinniarniliriniq, Ilinnialisaaqtuliriniq, ammalu pilimmaksaivanniq
    • Aaanniaqarnanngittuliriniq ammalu qanuinngitsiarniliriniq
    • Avatiliriniq ammalu silaup asijjiqpallianinga
    • Igluliriniq ammalu iqqanaijarviliriniq
    • Pivalliajuliriniq ammalu pinasuarusiuvagiaqaqtunik piliriangujut
    • Maligarjualirinirmi sivulliqpautitauqujaujut

Pitjutauqataujunut Attataqsimavviummijut